Выбрать язык
Книги Ветхого Завета
Книги Нового Завета
с русским текстом1 Иуда кугыжа Иоакимын, Иосий эргын, нылымше ий вуйлатымыж годым Иеремийлан Господь деч тыгай шомак лийын:2 «Вӱдылка книгам нал да тушан Израиль, Иуда да чыла калык нерген мом ойлымем возо – чыла тудым, мом Мый тыланет Иосийын вуйлатымыж годым ойлаш тӱҥалме кече гыч таче кече марте ойленам.3 Ала Иуда калык, Мыйын нунылан ышташ шонымо чыла туткар нерген колмекше, осал корныж гыч кораҥеш. Тунам Мый нунын титак ден сулыкыштым кудалтем».
4 Иеремий Варухым, Нирий эргым, ӱжын. Господьын Иеремийлан ойлымо чыла шомакшым Варух вӱдылка книгаш возен.5 Вара Иеремий Варухлан каласен: «Мылам Господьын пӧртышкыжӧ каяш ок лий.6 Пӱтым кучымо кечын Господьын пӧртышкыжӧ тый кай, мыйын умшам гыч лекше да тыйын кидет дене вӱдылка книгаш возымо Господьын шомакшым калыклан йӱкын луд. Тек илыме олашт гыч толшо пӱтынь Иуда калыкат тудым колеш.7 Ала тунам нуно Господьым сӧрвален кумалыт да осал корнышт гыч кораҥыт, вет Господьын тиде калыклан сӧрымӧ шыдыже пеш кугу».
8 Варух, Нирий эрге, пророк Иеремийын кӱштымыжым шуктен – вӱдылка книгаште возымо Господьын шомакшым Тудын пӧртыштыжӧ лудын.
9 Иуда кугыжа Иоакимын, Иосий эргын, визымше ий вуйлатымыж годым индешымше тылзынже Иерусалимыште илыше да тушко Иуда мландысе олала гыч толшо-шамычлан Господь ончылно пӱтым кучымо нерген увертареныт.10 Вӱдылка книгаште возымо Иеремийын шомакшым Варух тунам Господьын пӧртыштӧ возкалыше Гемарийын, Шафан эргын, пӧлемыштыже уло калык ончылно йӱкын лудын. Тиде пӧлемже Господьын пӧртшын У капкаже воктенысе кӱшыл кудывечыште верланен улмаш.
11 Михей, Гемарийын эргыже, Шафанын уныкаже, Господьын вӱдылка книгасе чыла шомакшым колын.12 Тудо кугыжан полатыш, возкалышын пӧлемышкыже, волен. Туштыжо тӧра-шамыч шинченыт: возкалыше Елишама, тыгак Шемайын Делаий эргыже, Ахборын Элнафан эргыже, Шафанын Гемарий эргыже, Ананийын Седекий эргыже да моло тӧра.13 Варухын вӱдылка книга гыч калыклан йӱкын лудмыж годым колмо шомакым Михей нунылан чыла каласен.14 Тунам тӧра-влак Варух деке Иегудийым – тудыжо Нафанийын эргыже, Шелемийын уныкаже, Хусийын кугезе уныкаже лийын – тыге каласаш колтеныт: «Калыклан лудмо вӱдылка книгатым нал да тышке тол». Варух, Нирий эрге, книгам налын да нунын деке толын.15 Тӧра-влак тудлан каласеныт: «Шич да мыланнат луд». Варух нунылан лудын.16 Кунам нуно чыла тиде шомакым колыныт, икте-весышт ӱмбаке лӱдын ончалыныт да Варухлан каласеныт: «Чыла тиде шомакым ме кугыжалан каласена».17 Эше нуно Варух деч йодыныт: «Каласе мыланна, кузе тый чыла тидым возенат? Нуным Иеремий ойлен?»18 Варух нунылан вашештен: «Чыла тиде шомакым тудо мылам шке ойлен, а мый чернила дене вӱдылка книгаш возенам».19 Тӧра-влак Варухлан каласеныт: «Иеремий дене коктын кайыза да шылза, тек кушто улмыдам нигӧ ок пале».
20 Тӧра-шамыч кугыжа деке полатыш каеныт, а вӱдылка книгам возкалыше Елишаман пӧлемыштыже коденыт. Кугыжалан нуно вӱдылка книгасе чыла шомакым каласеныт.21 Кугыжа Иегудийым книгалан колтен. Тудыжо Елишаман пӧлемже гыч книгам конден да кугыжа ден воктеныже шогышо тӧра-влаклан лудын.22 Кугыжа тунам, индешымше тылзын, телылан ыштыме полатыште илен, ончылныжо коҥгаште тул йӱлен.23 Кунам Иегудий кум-ныл корным лудын, кугыжа нуным возкалыше-шамычын кӱзышт дене пӱчкын да коҥга тулыш кудалтен. Тыге тудо коҥгаште уло вӱдылка книгам йӱлалтен.24 Кугыжат, тарзыже-влакат, чыла нине шомакым колмеке, лӱдын огытыл, ӱмбал вургемыштым кушкедын огытыл.25 Вӱдылка книгам ынже йӱлалте манын, Элнафан, Делаий да Гемарий сӧрваленыт, но кугыжа нуным колыштын огыл.26 Тудо Иерахмииллан, кугыжа тукым эргылан, тыгак Сераийлан, Азриил эргылан, да Шелемийлан, Авдиил эргылан, возкалыше Варух ден пророк Иеремийым руалтен кучаш кӱштен. Но Господь нуным шылтен.
27 Тидын деч вара, кунам кугыжа вӱдылка книгам йӱлалтен – туштыжо Иеремийын ойлымыж почеш Варухын возымо шомак-влак лийыныт – Иеремийлан Господь деч шомак лийын:28 «Вес вӱдылка книгам нал да тушан Иуда кугыжа Иоакимын йӱлалтыме книгаштыже лийше шомак-влакым угыч возо.29 А Иуда кугыжа Иоакимлан каласе: ”Господь тыге ойла: тый тиде вӱдылка книгам йӱлалтенат, тыге ойленат: ’Вавилон кугыжа толеш да тиде мландым пустаҥда, тушто улшо калык ден вольыкым пытара манын, молан возенат?’30 Садлан Иуда кугыжа Иоаким шотышто Господь тыге ойла: тудын тукымжо гыч Давидын престолыштыжо шинчыше еҥ ок лий. Тудын колышо капше кече шокшылан да йӱд юалгылан кудалтыме лиеш.31 Иоакимым, тудын тукымжым, тарзыже-влакым Мый осал пашаштлан мут кучаш шогалтем. Мый нунын ӱмбак, Иерусалимыште илыше да Иуда калык ӱмбак ончыч каласыме чыла туткарым колтем, вет нуно Мыйым колыштын огытыл”».
32 Тунам Иеремий вес вӱдылка книгам налын да возкалыше Варухлан, Нирий эргылан, пуэн. Тудыжо Иеремийын ойлымыж почеш тушан Иуда кугыжа Иоакимын йӱлалтыме книгаште лийше чыла шомакым возен. Тушко эше тыгаяк шуко шомак ешарыме лийын.
Глава 36