Выбрать язык
Книги Ветхого Завета
Книги Нового Завета
с русским текстом24 Но тендан шинча ончылно Мый Сионышто ыштыме чыла осал пашашт верч Вавилонлан, Халдейыште илыше-влаклан, пӧртылтем, – ойла Господь.
25 Пӱтынь мландым пустаҥдыше да чыла пытарыше курык,
Мый кызыт ӱмбакет толам, – ойла Господь. –
Мый ӱмбакет шке кидем шуялтем,
тыйым кӱшыч сӱмырен кудалтем,
когарген пытыше курыкыш савырем.
26 Пусак ден негызлан кӱм тый дечет огыт нал,
курымешлан тый ир мланде лият, – ойла Господь.
27 Нӧлталза тистым эл ӱмбалне,
калык-влак коклаште пучым пуалтыза!
Вавилон ваштареш калык-влакым ямдылыза,
Арарат, Миний, Аскеназ кугыжаныш-влакым
тудын ӱмбак каяш ӱжса!
Тудын ваштареш каяш сарзывуйым шогалтыза,
шурнышырчык тӱшка семын имнешке-влакым колтыза!
28 Вавилон ваштареш калык-влакым,
Мидийын кугыжаже-шамычым,
кундемтӧра ден вуйлатышыже-влакым,
Мидий кид йымалне улшо чыла мландым кынелтыза.
29 Мланде чытырна, пыртка,
вет Вавилон шотышто Господьын шонен пыштымыже шукталтеш –
Вавилон мландым ир мландыш савыраш,
илыше-влак деч посна кодаш.
30 Вавилон сарзе-влак кредалмыштым чарненыт
да карманыштышт шинчат –
вий-куатышт пытен, ӱдырамаш гай нуно лийыныт.
Вавилонын пӧртшӧ-влак йӱлат,
капка тӱкылтышышт шалатыме.
31 Ик торйол ваштареш весе куржеш,
уверзе почеш уверзе толеш –
Вавилон кугыжалан нуно уверым кондат:
олан чыла могыржо гыч керылт пуреныт,
32 вӱд вончымо верлам руалтеныт,
карман-влак йӱлат, сарзе-шамычым лӱдмаш авалтен.
33 Тыге ойла Господь Саваоф, Израильын Юмыжо:
Вавилон ӱдыр – шийме жаплан тошкен ямдылыме идым гай,
эше изишак – уржа-сорла жап шуэш».
34 «Вавилон кугыжа Навуходоносор мыйым кочкын, нултен,
мыйым яра атым ыштен.
Шучко янлык семын мыйым нелын,
пайрем кочкыш дене мӱшкыржым темен,
вара укшич луктын шуэн.
35 Мемнам индырымыжлан
тек Вавилонлан пӧртылтымӧ лиеш!» –
Сионышто илыше-влак тыге ойлат.
«Вӱрем йоктарымыжлан
Халдейыште илыше-влак тек мутым кучат!» –
Иерусалим каласа.
36 Сандене Господь тыге ойла:
«Мый тыйым пыдал налам да тылат верч ӱчым шуктем,
Вавилонын теҥызшым коштем,
памаш-влакшым вӱд дечын посна кодем.
37 Вавилон кӱ орашке,
тулпире-влакын илемышкышт савырна,
лӱдыктыш ден воштылчык лиеш,
илыше-шамыч деч посна кодеш.
38 Тушто илыше-влак лев семын ырлаш тӱҥалыт,
самырык лев семын йӱкыштым кугемдат.
39 Шокшештмекышт, Мый нунылан ӱстелым погем
да нуным руштмешкышт йӱктем –
тек веселитлат да мален колтат курымаш омо дене,
тек огыт помыжалт тетла, – Господь ойла.
40 Пача, тага ден казатага-влак семын
Мый нуным шӱшкылаш наҥгаем.
41 О, кузе Сесахым сеҥен налме,
пӱтынь мландын чапшым руалтен налме!
Калык-влак коклаште Вавилон лӱдыктышыш савырнен!
42 Теҥыз нӧлталтын Вавилон ӱмбаке,
гӱжлышӧ толкын-влак тудым леведыныт.
43 Олаже-влак пустаҥыныт,
кукшо ир мландыш савырненыт –
еҥ-шамыч тушто огыт иле,
эртен ок кай тушечын нигӧ.
44 Мут кучаш шогалтем Вавилонысо Вилым,
мом нелмыжым укшич луктыктем.
Тудын дек калык-влак тетла огыт погыно,
Вавилонысо пырдыж-влак сӱмырлат.
45 Лек, Мыйын калыкем, тушечын,
ылыжше шыдем деч кажныже шке чонжым утарыже!
46 Ида аптыране, эл мучко шарлыше шомак деч ида лӱд.
Ик ийын иктым кутырат, вес ийын – весым,
эл мучко пызырымаш лиеш,
ик вуйлатыше ваштареш весе шогалеш.
47 Вет кече-влак толыт,
кунам Мый Вавилонысо шояк юмо-влакым мут кучаш шогалтем.
Вавилонын пӱтынь мландыже намысыш пура,
сарыште колышо-шамыч тушто кияш тӱҥалыт.
48 Вавилон дене мо лиймым ужын,
кава ден мланде да мо тушто уло куанен кычкырлаш тӱҥалыт,
вет тушко йӱдвел гыч пустаҥдыше-влак толыт, –
ойла Господь.
49 Кузе Вавилон мландымбалне илыше-влакым пытарен,
израильтян-шамычым пытарымыжлан шкежат тугак пытарыме лиеш.
50 Керде деч утаралт кодшо-влак, ида шого, кайыза!
Мӱндыр кундемыште Господьым шарныза,
Иерусалимым ушыштыда кучыза.
51 ”Мыскылымым колын, ме вожылмашыш пуренна,
чурийнам намыс леведын,
вет Господьын пӧртшын святой верлашкыже
йот тукым еҥ-влак пуреныт”.
52 Сандене жап шуэш, – ойла Господь, –
кунам Мый Вавилонын шояк юмыжо-влакым мут кучаш шогалтем,
тудын мландыже мучко сусыргышо-шамыч кечкыж кияш тӱҥалыт.
53 Кеч Вавилон кава дек шумеш нӧлталтеш
да кӱкшӧ карманже-влакым чоткыдемда,
тудын дек пустаҥдыше-влак садак толыт Мый дечем», –
ойла Господь.
54 Варгыжме йӱк Вавилон гыч шокта,
кугу пытарымаш Халдей мланде гыч солна.
55 Тиде Господь пытара Вавилоным,
кугу йӱк-йӱанлан мучашым пышта.
Тушман толкын-влак кугу вӱд семын гӱжлат,
нунын йӱк-йӱанышт шокта.
56 Пустаҥдыше толеш Вавилон ӱмбак,
тудын сарзыже-влакым пленыш налеш,
пикшйоҥежыштым пудырта.
Вет Господь – мут кучыктышо Юмо,
Тудо пӱтынек пӧртылта.
57 «Мый тудын он ден мунлыеҥже-влакым,
кундемтӧра ден вуйлатышыже-шамычым,
сарзыже-влакым руштмешкышт йӱктем –
мален колтат курымаш омо дене,
огыт помыжалт тетла, – ойла Кугыжа,
лӱмжӧ Тудын Господь Саваоф.
58 Тыге ойла Господь Саваоф:
Вавилонын кӱжгӧ пырдыжше негыз марте шалатыме лиеш,
кӱкшӧ капкаже-влак лийыт йӱлалтыме.
Арам калык-шамыч тыршеныт,
тукым-влак шкеныштым индыреныт –
чылажат лиеш йӱлалтыме!»
59 Теве мом пророк Иеремий Сераийлан, Нирий эргылан, Масейын уныкажлан, кӱштен, кунам тудыжо Иуда кугыжа Седекийын нылымше ий вуйлатымыж годым тудын дене пырля Вавилоныш каяш лектын. Сераийже кугыжан илыме вержылан вуйын шоген улмаш.60 Иеремий Вавилон дене лийшаш туткар-влакым – чыла, мом Вавилон ваштареш возымо лийын – посна вӱдылка книгаш серен.61 Иеремий Сераийлан каласен: «Кунам Вавилоныш толат, чыла возымым йӱкын луд62 да каласе: ”Господь, тиде верым Тый пытарем манын каласенат, тушто еҥат, вольыкат огыт код, курымешлан ир мланде лиеш манын ойленат”.63 Вӱдылка книгам лудын пытарымекет, тудын дек кӱм кылде да Евфрат покшеке кудалте,64 тыге каласе: ”Вавилонат тыге пурен кая, Господьын колтымо туткар деч вара ок нӧлталт, Вавилон йӧршешлан лунчырга”».
Тыште Иеремийын шомакше пыта.
*а 51:1 «Тушто илыше тушманем-влак» – вес семынже Лев-Камай. Тиде – халдей-влакын шолып лӱмышт.
Глава 51