Библия
Выбрать язык
Книги Ветхого Завета
Книги Нового Завета
с русским текстом
ИЕРЕМИЙЫН ШОРТМО МУРЫЖО
1 Глава
Иерусалим шкет кодшо тулык вате гай лийын.1 О, шкет шинча рӱдола,
ала-кунам шуко еҥан улшо!
Калык-влак коклаште кугу лийше
ынде тулык вате гай кодын,
кундем-влак коклаште он лийше
кызыт кулыш савырнен.
2 Кочын шортеш тудо йӱдым,
чурийже гыч шинчавӱд йога.
Кӧмыт тудым йӧратеныт,
нунын коклаште лыпландарыше уке.
Чыла йолташыже ондален,
тушманыш савырнен.
3 Орланен илыме деч вара Иудам пленыш наҥгаеныт,
перкан илыш деч вара тудо кул пашаш кычкалтын.
Йот калык-влак коклаште кызыт ила,
ласкалыкым ок му.
Ойго-орлыкшо годым
чуриктарыше-влак тудым поктен шуыныт.
4 Сион корно-влак ойгаҥыныт,
вет пайремыш толшо нигӧ уке.
Олан капкаже-влак пустаҥыныт,
тушто иерей-шамыч йӧсын кечкыжыт,
ӱдыр-влак ойгырен шортыт,
олам шкенжымат шӱлык авалтен.
5 Тушман-влак лийыныт оза,
сеҥен налше-влак эсен илат.
Шуко сулыкым ыштымыжлан
Господь тудлан ойгым колтен.
Йочаже-влакым пленыш наҥгаеныт,
тушман нуным поктен каен.
6 Сион ӱдыр шке чапшым йомдарен.
Онжо-влак пуйто пӱчӧ улыт,
кудышт огыт му кочкын коштмо верлам,
поктышо-влак деч куржаш тӧчат,
но вийышт пытен.
7 Ойган, кусныл коштмо кечылаштыже
Иерусалим ончычсо суапшым шарналта.
Кунам калыкше тушман кидыш логалын,
нигӧ тудлан полшен огыл.
Тушман-влак ӱмбакше онченыт,
сеҥалтмыжым ужын, воштылыныт.
8 Кугу сулыкыш пурен Иерусалим,
сандене шакшыш савырнен.
Кӧ тудым ончыч кугуэш ужын – кызыт койдара,
вет тудын чара улмыжым ужын.
Нелын шӱлештеш Иерусалим,
вожылмыж дене чурийжым савыра.
9 Вургемжым ару огыллыкшо амыртен.
Шонен огыл тудо ончыкылык нерген,
сандене сӱмырлымыжӧ чылаштым ӧрыктарен,
нигӧ уке тудым лыпландарыше.
«Господь, ончал мыйын орлыкем,
кузе тушманем вуйжым нӧлталын!»
10 Мо лийын шерге тудлан, тушман чыла поген налын.
Ужеш тудо: йот калык еҥ-влак храмыш пуреныт,
а вет нуно Тыйын калыкет коклаште лийшаш огытыл.
11 Киндым кычалын,
тудын калыкше йӧсын кечкыжеш,
илыше кодаш манын,
чыла мо шергаканжым кочкышлан вашталта.
«Ончал, Господь, ончал!
Могай мый мыскынь лийынам!»
12 «Воктеч эртен кайыше-влак,
тек тендан дене тыгае ок лий!
Ончалза да шекланыза –
уло мо орлык, мылам логалше дене икгай?
Йӱлышӧ шыдыжын кечынже
мылам тудым Господь колтен.
13 Кӱшычын тулым колтен,
тудыжо эсогыл луэм авалтен!
Йолемлан Тудо вапшым шынден
да мыйым мӧҥгеш савырен.
Господь мыйым кудалтен коден,
кажне кечын мый улнем.
14 Сулык-влакем Тудо кидышкыже налын,
нунын дене пидын мылам омытам.
Нуным, иктыш пунен, шӱйышкем пыштен,
вий-куат деч посна мыйым коден.
Господь мыйым тыгай-влакын кидышкышт пуэн,
кӧмыт ваштареш мый ом керт шоген.
15 Виян сарзем-влакым Господь
чылаштым нимош луктын,
самырык пӧръеҥ-влакемым пытараш
тушман-шамычым поген.
Виноградым тошкымо семын
Иуда ӱдырым Господь тошкен!
16 Теве молан шортам мый,
шинчам гыч чарныде вӱд йога.
Лыпландарыше мый дечем умбалне,
уке чонемым ылыжтарыше.
Уке йочам-влакын ончыкылыкышт,
вет мыйым тушман сеҥен».
17 Шуя шке кидшым Сион,
но уке тудым лыпландарыше.
Иаков шотышто Господь тыге кӱштен:
тек пошкудо калык-влак тудлан тушман лийыт.
Иерусалим нунын коклаште амырген.
18 «Чын ыштен Господь,
вет мый Тудын кӱштымыж ваштареш шогенам.
Колыштса, чыла калык-влак,
мыйын орлыкем ӱмбак ончалза:
ӱдыр ден рвезе-влакем наҥгаеныт,
нуно пленыште улыт.
19 Йолташ-влакем ӱжынам,
но нуно мыйым ондаленыт.
Иерей ден кугурак-влакем
олаште шужен коленыт,
илыше кодаш манын,
шкаланышт кочкышым кычалыныт гынат.
20 Ончал, Господь, кузе мый орланем:
кӧргыштем чыла йӱла,
шӱмем вургыжеш,
вет Тыйын ваштареш чот шогенам.
Уремыште керде пытарен кая,
а пӧртыштӧ колымаш вуча.
21 Тушман-влак колыт йӧсын кечкыжмем,
но уке мыйым лыпландарыше!
Орлыкем нерген нуно колыт
да тидым Тыйын ыштыметлан куанат.
Тек Тыйын сӧрымӧ кечет толеш –
тек нунат мый гаемак лийыт!
22 Тек нунын чыла осал пашашт
Тыйын шинча ончылнет лиеш.
Кузе Тый сулыкемлан мыйым мут кучаш шогалтенат,
нунын денат тугак ыште.
Мучаш уке кечкыжмемлан,
чонемже мыйын улнен».
Глава 1
