Выбрать язык
Книги Ветхого Завета
Книги Нового Завета
с русским текстом1 Вавилон кугыжа Валтасарын икымше ий вуйлатымыж годым Даниил шке вакшыштыже омыж дене пророк кончымаш-влакым ужын. Тудо шке омыжым возен, теве тудын каласкалымыже.2 Тыге ойла Даниил: «Йӱдымсӧ кончымашыште ужынам: кугу теҥызысе вӱдым кавасе ныл мардеж пудыратен.3 Вара теҥыз гыч ныл кугу янлык лектын, нуно икте-весышт деч ойыртемалтыныт.4 Икымше – лев гай, но тудын арыслангайыкын гай шулдыржо лийын. Мыйын шинчам ончылно тудын шулдыржым кӱрлыныт, вара мланде деч кӱшкӧ нӧлталыныт. Тудым, пуйто айдемым, йол ӱмбаке шогалтеныт, да тудлан айдеме шӱм пуымо лийын.5 Вара кокымшо янлык лектын, тудо маскала койын. Тудо кок йола шоген, умшаштыже пӱй-влак коклаште кум азупӱй*а лийын. Тудлан каласеныт: ”Кай да шуко шылым коч!”6 Вара мый эше ик янлыкым ужынам: тудо леопард гай койын, тупыштыжо – кайыкын гай ныл шулдыр. Тиде янлыкын ныл вуйжо лийын, да тудлан кучемвий пуалтын.7 Тидын деч вара йӱдымсӧ кончымашыштем мый нылымше янлыкым ужынам: тудо шучко, лӱдмашым лукшо да пеш виян лийын. Тудын кугу кӱртньӧ пӱйжӧ-влак лийыныт. Тудо чыла пӧжген да пытарен каен, а мо кодшыжым йолжо дене тошкен. Тудо ончыч лийше янлык-влак деч ойыртемалтын, да тудын лу тӱкыжӧ лийын.8 Мый нине тӱкӧ-влакым онченам да ужынам: нунын коклаште эше ик изи тӱкӧ лектын, тудлан верым пуаш манын, кум тӱкӧ вожге лукмо лийын. Тиде изи тӱкын айдемын гай шинчаже да кугешнен ойлышо умшаже лийыныт.
9 Вара мый теве мом ужынам: престол-влак шындыме лийыныт, да тушко Акрет Кечыласе шинчын. Тудын вургемже лум гай ошо, ӱпшӧ яндар ош меж гай лийыныт. Престолжо Тудын – тулйолкын гай, ораваже-влак – пуйто йӱлышӧ тул.10 Тудын деч тулан эҥер лектын да йоген шоген. Тӱжем-тӱжемле-влак Тудлан служитленыт, тӱжем-тӱмесыр*б Тудын ончылныжо шоген. Судья-влак шинчыныт, да книга-влак почмо лийыныт.11 Тунам мый ужынам: тӱкын кугешныше мут-влакым ойлымыжлан янлык мыйын шинча ончылнем пуштмо, а капше пытарыме, тул дене йӱлалтыме лийын.12 Моло янлык деч кучемвий шупшын налме лийын, но нуным палемдыме жап марте илышым коденыт.13 Йӱдымсӧ кончымашыште мый тыгак ужынам: кавасе пыл ӱмбалне айдеме эрге гай койшо толеш. Тудо Акрет Кечыласе дек толын шуын да Тудын деке вӱден кондымо лийын.14 Чыла калык, тукым да йылме гыч улшо еҥ-влак тудлан служитлышт манын, тудлан кучемвий, чап да кугыжаланымаш пуымо лийыныт. Тудын озаланымыже – курымаш озаланымаш, кудо нигунам ок пыте, да тудын кугыжаланымыже нигунам ок шалане.
15 Мыйын, Даниилын, уло чонем пудыранен – ужмо кончымаш-влак мыйым лӱдыктеныт.16 Мый тушто шогышо-влак кокла гыч иктыж деке миенам да чыла тиде мом ончыкта манын йодынам. Тудо мый денем кутыраш тӱҥалын да мом ужмым умылтарен:17 ”Ныл кугу янлык – тиде ныл кугыжа, кӧмыт мландымбалне лийыт.18 Но вара кугыжаныш кучемвий Чыла деч Кӱшылысын святойжо-влак кидыш кусна, нуно эре, курым-курымеш кугыжаланаш тӱҥалыт”.19 Тунам мый нылымше янлык нерген умылтараш йодынам, тудыжо чылашт деч ойыртемалтын да пеш чот шучко лийын – кӱртньӧ пӱян, той кӱчан. Тудо чыла пӧжген да пытарен каен, а мо кодшыжым йолжо дене тошкен.20 Эше мый тудын вуйыштыжо улшо лу тӱкӧ нерген палаш шоненам, тыгак вара лекше тӱкӧ, кудылан верым пуаш манын, вес кумытшо лектын возын – саде тӱкӧ нерген, кудын шинчаже да кугешнен ойлышо умшаже лийыныт, кудо моло тӱкӧ деч эн кугун койын.21 Мый ужынам: тиде тӱкӧ святой-влак ваштареш сарым тӱҥалын да нуным сеҥен шоген,22 тыге лийын Акрет Кечыласын толмешкыже. Тунам Чыла деч Кӱшылысын святойжо-влаклан чынле суд ышталтын, да нунын кугыжаланыме жапышт шуын.23 Тидын шотышто тудо тыге каласен: ”Нылымше янлык теве мом ончыкта: мландымбалне моло деч ойыртемалтше нылымше кугыжаныш лиеш. Тудо уло мландым пӧжгаш, тошкаш да шалаташ тӱҥалеш.24 Лу тӱкӧ – тиде кугыжаныш гыч лу кугыжа лектеш. Нунын деч вара – эше икте, нунын деч ойыртемалтше, тудо кум кугыжам сӱмырен кудалта.25 Тиде кугыжа Чыла деч Кӱшылысӧ ваштареш ойлаш да Тудын святойжо-влакым темдаш тӱҥалеш, пайрем ден законыштым вашталташ тӧча. Святой-влак тудын кидыш ик пагытлан, кок пагытлан да пел пагытлан*в пуымо лийыт.26 Тидын деч вара судья-влак шинчыт да тудын деч кучемвийым налыт. Тудын кучемвийже курымешлан пытарыме лиеш.27 А кава йымалне улшо чыла кугыжанышын куатышт, кучемвийышт да кугулыкышт святой-влаклан, Чыла деч Кӱшылысын калыкшылан, пуымо лийыт. Тудын кугыжанышыже курымаш кугыжаныш лиеш, чыла кучемвий Тудлан служитлаш, Тудым колыштын илаш тӱҥалеш”.
28 Тыште каласкалымылан мучаш. Мыйым, Даниилым, шонкалымаш-влак кугу аптыранымашыш пуртеныт, да чуриемат вашталтын. Но чыла тидым мый шӱмыштем кученам».
*а 7:5 Азупӱй – але ӧрдыжлу.
*б 7:10 Тӱжем-тӱмесыр – бесчисленное множество.
*в 7:25 Але «ик ийлан, кок ийлан да пел ийлан».
Глава 7