Библия
Выбрать язык
Книги Ветхого Завета
Книги Нового Завета
с русским текстом
ПРОРОК АМОСЫН КНИГАЖЕ
6 Глава
Азапланыде илыше-влаклан ойго.1 Ойго тыланда, Сионышто азапланыде илыше-влак,
Самарий курыкышто лӱдыкшӧ деч посна илыше-влак,
тыланда, эн ончылно улшо калыкын лӱмлӧ еҥже-шамыч,
кӧмыт дек Израиль калык толеш!
2 Кайыза Калнеш да тудым ончалза,
тушечын кугу Емафыш кусныза,
вара филистим мландысе Гефыш волыза.
Нуно кок кугыжанышда деч сайрак улыт мо?
Нунын мландышт тендан деч кугурак мо?
3 Туткар кечым те тораҥдаш тӧчеда,
но тидын дене лач пызырымашын вияҥме жапшым лишемдеда.
4 Те слон лу дене сӧрастарыме вакшыште киеда,
шке кийыме верыштыда канеда,
кӱтӱ гыч налме эн сай пачам кочкыда,
коя презе шыл дене мӱшкырдам темеда.
5 Кӱсле йӱк почеш муреда,
Давид семын у мурым шонен луктыда.
6 Корка дене йошкар аракам йӱыда,
эн сай тамлыпушан ӱйым ӱмбакыда йыгеда,
а Иосиф тукым дене лийше азаплан ода ойгане.
7 Садлан те пленыш икымше каеда,
веселитлыме ден канен кийымыланда мучаш толеш.
8 Господь Юмо Шкеж дене товатла,
Господь Юмо Саваоф тыге ойла:
«Иаковын кугешнымашыже Мылам йырнык,
полатше-влакым ужмем ок шу.
Олам да тушто мо улым Мый тушманлан пуэм».
9 Иктаж пӧртыштӧ лу еҥ илыше кодеш гын, чыланат колат.10 Нунын родышт толеш але капыштым пӧрт гыч луктын йӱлалташ еҥ мия да пӧрткӧргыштӧ кодшо еҥ деч йодеш: «Тый денет эше иктаж-кӧ уло мо?» Тудыжо вашешта: «Нигӧ уке». Тунам садыже каласа: «Шып лий! Ме Господьын лӱмжым ойлышаш огынал».
11 Теве Господь кӱштымашым пуа:
кугу пӧрт-влакым шалатат,
изи-влак деч лач кӱ ора кодеш.
12 Имне-влак кӱ курыкышто кудалыштыт мо?
Ӱшкыж-шамыч тушто куралыт мо?
А те чынлыкым аярыш савыренда,
чын ыштымашын саскажым – кочо арымшудыш.
13 Те Ло-Деварым сеҥен налмылан куанеда,
да «Карнаимым шке вийна дене сеҥенна» манын моктанеда.*а
14 Господь Юмо Саваоф тыге ойла:
«Израиль тукым, Мый тендан ваштареш калыкым нӧлталам.
Емафыш пурымо вер деч тӧрверысе йогын марте
нуно тендам шыгыремдылаш тӱҥалыт!»
*а 6:13 «Ло-Девар» ’нимо’ манмым ончыкта, а «Карнаим» – ’тӱкӧ-влак’ манмым. Тӱкӧ вий-куатым ончыкта.
Глава 6
