Библия
Выбрать язык
Книги Ветхого Завета
Книги Нового Завета
с русским текстом
ПРОРОК МИХЕЙЫН КНИГАЖЕ
3 Глава
Израильын он ден пророкшо-влакым титаклымаш.1 Каласенам мый:
«Иаковын вуйлатышыже-влак,
Израиль тукымын онжо-влак, колыштса!
Те огыл мо чынлыкым палышаш улыда?
2 А тендан порым ужмыда ок шу,
йӧратеда те осалым,
еҥ-влакын коваштыштым ньыктыда,
лушт деч шылым кӱрыштыда.
3 Те мыйын калыкем кочкыда,
еҥ-шамычын коваштыштым ньыктыда,
а лужо-влакым шалатеда.
Калыкем кӧршӧкыш пыштышаш шыл семын руэда,
пуйто подыш пышташ пӱчкыда».
4 Кунам нуно Господьым ӱжын кумалыт,
Тудо нунылан ок вашеште,
осал пашам ыштымыштлан кӧра
шке чурийжым нунын деч савыра.
5 Пророк-влак шотышто Господь тыге ойла:
«Нуно Мыйын калыкем чын корно гыч кораҥдат.
Кӧмыт нуным пукшат –
нунылан тынысым пророклен ойлат,
а кӧ нимомат ок пу –
тудын ваштареш сарым увертарат.
6 Садлан тендам кончымаш укеан йӱд авалта,
ончыкужмаш укеан тӱп пычкемыш вуча.
Кечын волгыдыжо нине пророк-влак дечын шылеш,
нунын кечышт пычкемыш лиеш.
7 Вожылмашыш пурат ончыкужшо-влак,
мужедше-шамыч мыскылалтыт –
вожылмышт дене нуно чурийыштым петырат,
вет Юмо деч вашмут огеш лий».
8 А мый вий-куат да Господьын Шӱлышыж дене,
чынлык да лӱддымылык дене темынам –
Иаковлан осал пашаж нерген,
Израильлан сулыкшо нерген каласем.
9 Колыштса тидым, Иаков тукым вуйлатыше-влак,
Израиль тукымын онжо-шамыч!
Чын суд деч те йырнеда,
чыла тура корным кадырым ыштеда,
10 Сионым вӱр дене чоҥеда,
Иерусалимым – закондымылык дене!
11 Тыште вуйлатыше-влак судитлымыштлан взяткым налыт,
иерей-шамычын туныктымыштлан тӱлыман,
пророк-влакын ойлымыштлан оксам пуыман.
Но тидын годым нуно Господьлан эҥертат,
тыге ойлат: «Господь мемнан коклаште огыл мо?
Мемнан деке туткар огеш тол!»
12 Сандене тыланда верч Сионым пасу семын куралыт,
Иерусалим кӱ орашке савырна,
а тиде курыкышто, кушан Юмын пӧртым чоҥеныт,
кушкын шогалеш чодыра!
Глава 3
