Библия
Выбрать язык
Книги Ветхого Завета
Книги Нового Завета
с русским текстом
ПРОРОК ЗАХАРИЙЫН КНИГАЖЕ
10 Глава
Иуда ден Израильым Господь угыч нӧлталаш сӧра.1 Йӱрым кӱлеш жапыште колтыжо манын, Господь деч йодса,
вет кӱдырчан пылым Тудо чумыра.
Господь тыланда кугу йӱрым пуа,
кажныжлан пасушто шурным пӧлекла.
2 А шояк юмо-влак ондалат,
мужедше-шамыч шояк кончымашым ужыт,
пуста омым каласкалат, яра шомак дене лыпландарат.
Санденак калык йомын коштеш шорык семын,
кӱтӱчӧ укелан кӧра орлана.
3 «Кӱтӱчӧ-влаклан ылыжын Мыйын шыдем,
вӱден кайыше-шамычым мут кучаш шогалтем».
Вет Господь Саваоф шке кӱтӱж дек – Иуда тукым дек – мелын савырна,
Тудо нуным кределмашлан тунемше тале имне гайым ышта.
4 Иуда тукым деч негыз пусак кӱ,
омашым пеҥгыдемдыше кошар пашкар,
сарлык пикшйоҥеж лектыт –
тудын деч вуйлатыше-влак лектыт.
5 Тале сарзе гай нуно лийыт,
сарыште тушманым уремысе лавыраш тошкат.
Кредалаш тӱҥалыт – пеленышт Господь лиеш,
имнешке-влакым намысыш пуртат.
6 «Иуда тукымым вияным ыштем,
Иосиф тукымым утарем –
нуным мӧҥгеш пӧртылтем,
вет нуным чаманен налынам.
Нуно угыч Мыйын лийыт, пуйто нуным коден каенат омыл,
вет Мый Господь Юмышт улам,
Мый нуным колам.
7 Ефрем эрге-влак виян сарзе гай лийыт,
йошкар арака деч веселаҥме семын
нунын шӱмышт куан дене темеш.
Тидым ужын, йочашт йывыртат,
Господь лиеш нунын шӱм-чон куанышт.
8 Мый нунылан палым пуэм да пырля погем,
вет Ефрем эрге-влакым сулен налынам,
да ончычсо семын нуно шуко чотан лийыт.
9 Кеч Мый нуным калык-влак коклашке шавенам,
умбал верлаштат нуно Мыйым шарналтеныт.
Нуно шкешт да йочашт-влак
илен лектыт да пӧртылыт мӧҥгеш.
10 Мый нуным Египет гыч пӧртылтем,
Ассирий гыч поген кондем.
Мый нуным Галаадыш да Ливан курыкыш кондем,
но вер нунылан туштат ок сите».
11 Тудо туткарым кондышо теҥыз гоч эрта,
лӱшкышӧ теҥызым пера,
да Нил эҥерын келге вӱдшӧ кошка.
Ассирийын кугешнымашыже пыта,
кугыжан тоя деч посна Египет кодеш.
12 «Мый, Господь, шке калыкем вияным ыштем,
нуно Мыйым колыштын илаш тӱҥалыт», – ойла Господь.
Глава 10
