Выбрать язык
Книги Ветхого Завета
Книги Нового Завета
с русским текстом1 Ойлышашыжым калыклан чыла каласкален пытарымеке, Иисус Капернаумыш пурен.2 Ик шӱдывуйын тарзыже черле улмаш да колышаш гай киен. Тарзыжым шӱдывуй пешак аклен.3 Иисус нерген колмеке, тарзыжым утараш толаш йодын, шӱдывуй Тудын деке иудей кугурак-влакым колтен.4 Иисус деке толмеке, нуно сӧрвален йодаш тӱҥалыныт: «Тиде еҥ тудлан полшыметым шога.5 Тудо мемнан калыкым йӧрата, мыланна синагогым чоҥыктен».
6 Иисус нунын дене пырля каен. Шӱдывуйын пӧртшӧ деке лишемме годым шӱдывуй йолташыж-влакым Иисуслан тыге каласаш колтен: «Господь, уто пашам ит ыште. Пӧртыш пурыметым мый ом шого.7 Мый шкемым Тый декет мияш йӧрдымылан шотлем. Мутым гына пелеште, тунам мыйын тарзем паремеш.8 Мый шкежат кид йымалысе еҥ улам, мыйынат вуйлатыме сарзем-влак улыт. Иктылан ойлем ”Кае” – тудо кая, весылан ”Тышке тол” манам – тудо толеш, тарземлан ойлем ”Тидым ыште” – тудо ышта».9 Тидым колмеке, Иисус тудлан ӧрын да почешыже кайыше калык веке савырнен каласен: «Тыланда ойлем, тыгай ӱшанымашым Мый Израиль калык коклаштат вашлийын омыл».10 А Иисусым ӱжаш колтымо-влак, мӧҥгӧ пӧртылмекышт, черле лийше тарзым тазам ужыныт.
11 Тидын деч вара Наин лӱман олашке Иисус каен. Тудын дене пырля тунемшыж-влак гыч шукынжо да кугу калык тӱшка лийын.12 Кунам Тудо ола капка деке лишемын, тушечын колышым нумал луктыныт. Тидыже аважын ик шкет эргыже улмаш, аваже тулык лийын. Ӱдырамаш дене пырля ола гыч шуко калык лектын.13 Кунам Господь ӱдырамашым ужын, тудым чаманен да каласен: «Ит шорт».14 Вара миен да колышым наҥгайыме вер деке тӱкнен, нумал кайыше-влак шогалыныт. Иисус каласен: «Рвезе, тылат ойлем: кынел!»15 Колышо кынел шинчын да мутланаш тӱҥалын. Иисус тудым аважлан пӧртылтен.
16 Чылан чот лӱдыныт, Юмым чапландарен, нуно тыге ойленыт: «Мемнан кокла гыч кугу пророк лектын. Юмо шке калыкше деке лишемын».17 Тудын нерген тыгай мут уло Иудейыште да воктенысе чыла верлаште шарлен.
18 Чыла тидын нерген Иоаннлан тудын тунемшыже-влак каласеныт.19 Иоанн шкеж деке кок тунемшыжым ӱжын да нуным Иисус деке йодаш колтен: «Толшашлык Тый улат, але мыланна весым вучыман?»20 Пӧръеҥ-влак Иисус деке толыныт да каласеныт: «Тынеш Пуртышо Иоанн мемнам Тый декет ”Толшашлык Тый улат, але мыланна весым вучыман?” манын йодаш колтен».21 Тиде жапыште Иисус шуко еҥым чер, орланымаш, осал шӱлыш деч паремден, шуко сокырын шинчажым почын.22 Иисус вашештен: «Кайыза, мом ужмыдам-колмыдам Иоаннлан каласкалыза:
сокыр-влак ужыт,
окшак-влак коштыт,
проказе черан-влак эрнат,
соҥгыра-влак колыт,
колышо-влак ылыжыт,
йорло-влак Поро Уверым каласкалат.
23 Ондалалтын, кӧ Мый дечем ок кораҥ, тудо поро пиалан!»
24 Иоаннын колтымо еҥ-влак кайымеке, Иисус калыклан Иоанн нерген каласкалаш тӱҥалын: «Те ир мландыш мом ончаш лектында? Мардеж дене лӱҥгышӧ омыжым мо?25 Мом те ужаш миенда? Шергакан вургемым чийыше айдемым мо? Чапле вургеман-влак да ракатланен илыше-влак кугыжа-влакын полатыштышт улыт.26 Те мом ончаш лектында? Пророкым? Туге, тыланда ойлем, тудо пророк, но пророк деч кугурак.27 Возымо: ”Теве Тый дечет ончыч Мый Шкемын Суксем колтем. Тудо Тыйын ончылно корнетым ямдыла”.*а Тидым Иоанн нергенак каласыме.28 Тыланда ойлем, ӱдырамаш-влак деч шочшо коклаште Тынеш Пуртышо Иоанн деч кугу ик пророкат уке, но Юмын Кугыжаныште эн изижат тудын деч кугу».
29 Тудым колыштшо уло калык, тыгак йозак погышо-влакат Иоанн дене тынеш пурымышт дене Юмын чын улмыжлан ӱшанымыштым ончыктеныт.30 А фарисей да закон туныктышо-влак, Иоанн дене тынеш пурен огытылат, Юмын шонымашыж деч кораҥыныт.
31 Господь умбакыже ойлен: «Тиде тукымысо еҥ-влакым кӧ дене Мылам таҥастараш? Кӧ гай нуно улыт?32 Нуно пазар уремыште икте-весылан ”Ме тыланда шиялтыш дене шоктышна, а те ышда кушто, ме тыланда ойган мурым мурышна, а те ышда шорт” манын кычкырен шинчыше йоча гай улыт.33 Тынеш Пуртышо Иоанн толын, киндымат ок коч, виноград аракамат ок йӱ, а те ойледа: ”Тудын кӧргыштыжӧ ия!”34 Айдеме Эрге толын, кочкеш, йӱэш, а те ойледа: ”Теве кочкаш да йӱаш йӧратыше Айдеме, йозак погышо ден языкан-влакын йолташышт”.35 Уш-акылын чыла шочшыжо-влак уш-акылым чыныш луктыныт».
36 Ик фарисей шкеж деке Иисусым кочкаш ӱжын. Иисус фарисейын пӧртышкыжӧ пурен да ӱстелтӧрыштӧ верланен.37 Теве тиде олаште илыше языкан ӱдырамаш Иисусын фарисейын пӧртыштыжӧ кочмыжым пален налын да алебастр кӱ атеш миром конден.38 Вара Тудын шеҥгеке йол воктекыже верланен, чот шортын, Иисусын йолжым шинчавӱдшӧ дене нӧрташ тӱҥалын, ӱпшӧ дене ӱштын, Тудын йолжым шупшалын да миром шӱрен.39 Тидым ужмеке, Иисусым ӱжшӧ фарисей шке семынже шоналтен: «Тиде Еҥ чынжымак пророк лиеш ыле гын, могай ӱдырамаш Тудын деке тӱкнымым пала ыле, вет ӱдырамашыже языкан».
40 Но Иисус тудлан каласен: «Симон, Мый тыланет иктым каласынем». «Ойло, Туныктышо», – вашештен тудыжо.41 «Арымеш пуышо ик еҥын кок кӱсын налшыже улмаш. Иктыже вичшӱдӧ динарийым пуышаш, весыже – витлым.42 Но нунын тӱлаш нимошт лийын огылат, тудо когыньыштынат кӱсын налмыштым кудалтен. Тыгеже нунын кокла гыч кудыжо арымеш пуышым утларак йӧрата?»43 Симон вашештен: «Мыйын шонымаште, кудын шукырак парымжым кудалтен, тудыжо». Иисус каласен: «Тый чын шонет».
44 Вара, ӱдырамаш велке савырнен, Симонлан каласен: «Тиде ӱдырамашым ужат? Мый пӧртышкет тольым, тый йолым мушкаш вӱдым шыч пу, а тудо Мыйын йолем шинчавӱдшӧ дене нӧртыш да ӱпшӧ дене ӱштӧ.45 Тый Мыйым шыч шупшал, а тиде ӱдырамаш толмем деч вара Мыйын йолем шупшалмым ок чарне.46 Тый вуешем ӱйым шыч йыге, а тудо миро дене Мыйын йолем шӱрыш.47 Сандене тылат каласем: тудын шуко языкше касаралтеш, вет тудо тыгай кугу йӧратымашым ончыктен. Кӧн шагал языкше касаралтеш, тудо шагал йӧрата».48 Ӱдырамашлан Иисус каласен: «Тыйын языкет касаралтын».
49 Тудын дене пырля ӱстелтӧрыштӧ лийше-влак шке семынышт шонаш тӱҥалыныт: «Кӧ Тудо тыгай, айдемын языкшымат касара?»50 Но Иисус ӱдырамашлан каласен: «Ӱшанымет тыйым утарен, тыныслык дене кай».
Глава 7