Выбрать язык
Книги Ветхого Завета
Книги Нового Завета
с русским текстом1 Тиде жапыште тушко мийыше икмыняр еҥ Иисуслан Галилей гыч толшо-влак нерген ойлен: Пилат нунын вӱрыштым надырышт дене варен.2 Иисус нунылан вашештен: «Нунын дене тыге лийын гын, нине еҥ-влак Галилейыште илыше моло деч языканрак лийыныт манын шонеда мо?3 Тыланда ойлем: уке! Но языкда деч огыда кораҥ да Юмо деке огыда савырне гын, чылан тыгак пытеда.4 Але Силоам башне камвочмо годым йымалныже колышо латкандаш еҥ Иерусалимыште моло илыше деч титаканрак лийын, шонеда?5 Тыланда ойлем: уке! Но языкда деч огыда кораҥ да Юмо деке огыда савырне гын, чылан тыгак пытеда».
6 Иисус тыге туштен каласен: «Ик еҥын виноград аҥаштыже смоква пушеҥгым шындыме улмаш. Тудо пушеҥгыште саскам кычалаш миен, но муын огыл7 да виноград ончышылан каласен: ”Ынде кумшо ий тиде смоква пушеҥгыште саскам кычалаш толам, но ом му. Тудым ру! Молан верым арам налын шога?”8 Но тудыжо вашештен: ”Оза, эшеат ик ийлан тудым кодо, мый йырже кӱнчем да терысым оптем.9 Ала саскам пуаш тӱҥалеш. А уке гын, вес ийлан руэт”».
10 Иисус шуматкечын ик синагогышто туныктен.11 Тушто черландарыше шӱлыш дене латкандаш ий орланыше ӱдырамаш лийын. Тудо пӱгыр лийын да вийнен кертын огыл.12 Тудым ужмеке, Иисус Шкеж деке ӱжын да каласен: «Ӱдырамаш, тый чер дечет утлет».13 Вара ӱмбакыже кидшым пыштен. Ӱдырамаш тунамак вийнен шогалын да Юмым чапландараш тӱҥалын.
14 А Иисусын шуматкечын паремдымыжлан синагог вуйлатыше сырен да калыклан каласен: «Пашам ышташ куд кече уло, нине кечылаште шкендам паремдыкташ толза, а шуматкечын огыл».15 Но Господь тудлан вашештен: «Сайла кояш тӧчышӧ! Тендан кокла гыч кажныже шуматкечын ӱшкыжшым але осёлжым, шудо шерча гыч мучыштарен, йӱкташ огеш наҥгае мо?16 Авраамын тиде ӱдыржым сатана латкандаш ий шинчырлен кучен. Тиде кепшыл деч шуматкечын тудым утараш ок лий ыле мо?»17 Кунам тыге ойлен, Тудын ваштареш лийше-влак чылан вожылыныт, а уло калык Иисусын ыштыме чыла чапле пашажлан куанен.
18 Иисус каласен: «Юмын Кугыжаныш могай? Мо дене Мылам тудым таҥастараш?19 Тудо горчице нӧшмӧ гай, тудым айдеме налын да шкенжын пакчашыже ӱден, а тудо кушкын, кугу пушеҥгыш савырнен, да укш коклаштыже кавасе кайык-влак пыжашым оптеныт».
20 Иисус адак каласен: «Юмын Кугыжанышым Мылам мо дене таҥастараш?21 Тудо ру гай, тудым ӱдырамаш кум виса ложаш дене варен, тыгеракын, уло руаш шуын».
22 Иисус ола гыч олашке, ял гыч ялыш коштын да еҥ-влакым туныктен. Тудо Иерусалимыш корным кучен.23 Ик еҥ Тудын деч йодын: «Господь! Утаралтше еҥ-влак шагал улыт мо?»
Иисус нунылан каласен:24 «Шыгыр капка гыч пураш уло вийын тыршыза. Тыланда ойлем, шукын пураш тӧчат, но огыт керт.25 Жап шуэш, пӧрт оза кынелеш да омсам петыра, тунам те тӱжвалне лийыда, омсам пералташ да ойлаш тӱҥалыда: ”Господь, Господь, мыланна поч!” А Тудо тыланда вашештен каласа: ”Те кӧ да кушеч улыда, Мый ом пале”.26 Тунам те ойлаш тӱҥалыда: ”Ме Тый денет пырля кочкын-йӱын улына, Тый мемнан уремлаште туныктенат”.27 А Тудо вашешта: ”Тыланда ойлем: те кӧ да кушеч улыда, Мый ом пале. Чын огыл ыштыше-влак, чылан Мый дечем кораҥза!”
28 Кунам Авраамым, Исаакым, Иаковым да чыла пророкым Юмын Кугыжаныште ужыда, а шкендам – поктен колтымым, те шорташ да пӱйым пураш тӱҥалыда.29 Эрвел да касвел, йӱдвел да кечывалвел гыч толыт да Юмын Кугыжаныште ӱстелтӧреш верланат.30 Тунам южо шеҥгелнысе ончылно лийыт, а ончылнысо – шеҥгелне».
31 Тудо кечынак икмыняр фарисей толын да Иисуслан ойлен: «Лек да тышечын кае, Ирод Тыйым пуштнеже».32 Иисус нунылан вашештен: «Кайыза, тиде рывыжлан каласыза: тачат, эрлат иям поктен луктам да еҥым паремдем, а кумшо кечын шке пашам пытарем.33 Но Мый тачат, эрлат, кумыштат коштшаш улам, вет пророклан Иерусалим деч ӧрдыжеш колаш ок лий.
34 Иерусалим, Иерусалим! Пророк-влакым пуштедыше да тый декет колтымо-влакым кӱм кышкен пытарыше! Кайык игыж-влакым шулдыржо йымак погымо семын мыняр гана Мый тыйын шочшет-влакым погынем ыле, но те тореш лийында!35 А ынде тендан пӧртда яра кодеш. Тыланда ойлем: ”Господь лӱм дене Толшо тек моктымо лиеш!”*а – манмешкыда, те Мыйым огыда уж».
*а 13:35 Пс 117:26.
Глава 13