Выбрать язык
Книги Ветхого Завета
Книги Нового Завета
с русским текстом1 Петр ден Иоанн индешымше шагатыште*а кумалме жаплан храмыш каеныт.2 Тушто шочынак окшак еҥ лийын. Тудым кече еда храмын Сӧрал манме капка воктеке нумал конденыт да пурышо-влак деч кӱчаш шынденыт.3 Окшак еҥ храм деке лишемше Петр ден Иоанным ужын да нунын деч кӱчен йодын.4 Нуно тудым тӱсленрак ончалыныт, вара Петр каласен: «Мемнан ӱмбаке ончал».5 Иктаж-мом пуат манын шонен, окшак еҥ нуным тӱткын ончен,6 но Петр каласен: «Шием да шӧртнем уке, а мо мыйын уло, тылат тудым пуэм: Назорей Иисус Христос лӱмеш кынел да ошкыл».7 Вара тудым пурла кид гычше кучен кынелтен, тунамак окшакын йолгопаже да йолшаклякаже*б вийым налыныт.8 Тудо тӧрштен кынелын, йол ӱмбалныже шоген да кошташ тӱҥалын. А вара ошкылын, тӧрштылын да Юмым моктен, Апостол-влак дене пырля храмыш пурен.9 Чыла калык коштмыжым да Юмым моктымыжым ужын.10 Тиде еҥ храмын Сӧрал капкаже воктене ондакше кӱчен шинчыше улмым палымеке, тудын дене тыге лиймылан чот лӱдыныт да ӧрыныт.
11 Паремдыме окшак еҥ Петр ден Иоанн деч кораҥын огыл, садлан калык ӧрмыж дене нунын деке Соломонын леведышан кудывечыже манме верыш писын чумырген.12 Тидым ужмеке, Петр калыклан ойлаш тӱҥалын:
«Израильын пагалыме еҥже-влак! Молан те тидлан ӧрыда? Молан мемнан ӱмбаке ончеда, пуйто ме тудын кошташ тӱҥалмыжым шке вийна але порылыкна дене ыштенна?13 Авраамын, Исаакын, Иаковын Юмышт, ачана-влакын Юмышт, Иисусын, шке Шочшыжын, чапшым нӧлтен. Те Тудым пушташ пуэнда, эрыкыш лукташ пунчалше Пилат ончылно Тудын деке тупынь савырнен улыда.14 Тудо Святой да Чын Ыштыше улмаш, но те Тудын деч кораҥында да еҥым пуштшым эрыкыш колташ йодында,15 те илышым Пуышым пуштында, но Юмо Тудым колымаш гыч ылыжтен, тидлан ме танык улына.16 Иисусын лӱмжылан ӱшанымылан кӧра тендан ужмо да палыме еҥ паремын, Иисусын пуымо ӱшанымаш тудым тендан ончылан тӱрыс тазам ыштен.
17 Туге гынат, иза-шольо-влак, палем: те да вуйлатышыда-влак мом ыштымыдам палыде ыштенда.18 Тыге Юмо, Шкенжын чыла пророкшо-влак гоч мом увертарен, тудым шуктен: Христос орланен колышаш улмаш.19 Тугеже, языкда ӱштылалтше манын, тудын деч кораҥза да Юмо деке савырныза.20 Тек Господь деч тыланда кӧргӧ вийым ылыжтыше жап толеш, тек Тудо тыланда ончылгоч палемдыме Иисус Христосым колта.21 Чыла тӧрлымӧ жап марте Тудо пылпомышто кодшаш. Тиде жап нерген чыла святой пророкшо гоч Юмо шукертсек ойла.22 Ачана-влаклан Моисей каласен: ”Господь Юмына мыйын гай Пророкым шкендан кокла гыч тыланда шогалта, мом гына Тудо тыланда ойла, чыла шотыштат Тудым колыштса.23 Тудо Пророкын мутшым колыштдымо кеч-могай еҥ калык кокла гыч пытарыме лиеш”.*в24 Самуил деч тӱҥалын, пророк-влак чыланат, кӧ гына ойлен, нине кызытсе кече-влак нерген ончылгоч увертареныт.25 Те пророк-влакын да ачада-влак дене Юмын ыштыме ойпидышыжын эргышт улыда. Ойпидышым ыштыме годым Юмо Авраамлан ойлен: ”Тыйын урлыкет гоч мландымбалысе чыла тукым суапландаралтеш”.*г26 Шкенжын Иисус Шочшыжым ылыжтымеке, Юмо кажныдам осал пашада деч кораҥдаш да суапландараш Тудым эн ондак тендан деке колтен».
*а 3:1 Индешымше шагат – кызытсе жап дене кум шагат кечывалым.
*б 3:7 Йолшакляка – лодыжка, щиколотка.
*г 3:25 Тӱҥ 22:18.
Глава 3