Выбрать язык
Книги Ветхого Завета
Книги Нового Завета
с русским текстом1 Тендан коклаште кучедалмаш да вашпижмаш кушеч лектеш? Тендан капыштыда кучедалше кумыл шупшмашда деч огыл мо?2 Те тӱрлым налнеда, но тендан нимо уке, те пуштедеда да кӧранеда, а шонымашкыда шуын огыда керт. Те вашпижыда да кучедалыда, а тендан нимо уке, вет Юмо деч огыда йод.3 Йодыда гынат, огыда нал, вет порылан огыл йодыда, шкендан кумыл шупшмаштыда кучылташ манын веле тидым йодыда.4 Те, Юмо деч кораҥше, яжарланыше-влак! Тӱнян йолташыже лиймаш Юмын тушманже улмым огыда пале мо? Тугеже, кӧ тӱнялан йолташ лийнеже гын, тудо Юмын тушманже лиеш.5 «Мемнан кӧргыш илаш пурышо шӱлыш кӧранымаш марте йӧрата» манын, Возымаш арам ойла шонеда мо?6 Но Юмо кугурак порылыкым пуа. Сандене Возымаш ойла:
«Юмо кугешныше-влак ваштареш шога,
а ӱҥышӧ-влаклан порылыкым пуа».*а
7 Тугеже Юмын мутшым колыштса, а диаволлан ваштареш шогалза, тыге тудо тендан деч куржеш.8 Юмо деке лишемза, тунам Тудат тендан деке лишемеш. Языкан-влак, киддам мушса, кок семын шонышо-влак, шӱмдам эрыктыза.9 Ойгаҥза, шӱлыкаҥза да йӱкын шортса. Воштылмыда тек шӱлыкыш савырна, а куанда – ойгышко.10 Господь ончылно шкендам ӱлыкӧ шындыза, да Тудо тендам кӱшкӧ нӧлталеш.
11 Иза-шольо-влак, икте-весыда ӱмбаке осалым ида ойло. Иза-шольо ӱмбаке осалым ойлышо але тудым судитлыше айдеме закон ӱмбаке осалым ойла да законым судитла. А тый законым судитлет гын, тый законым шуктышо огыл, а судья улат.12 Законым Пуышо ден Судья – икте: Тудо, Кӧ утарен да пытарен кертеш, а лишылетым судитлаш тый кӧ улат?
13 А ынде те, «Таче але эрла ме тыгай олаш каена да тушто ик ий илена, ужалкалаш-наледаш тӱҥалына да парышым налына» манын ойлышо-влак, колыштса.14 Те эрла мо лийшашымат огыда пале. Тендан илышда – тиде мо? Тиде – тӱтыра, тудо кӱчык жаплан шарла, а вара шалана.15 Тидын олмеш те тыге ойлышаш улыда: «Господьлан йӧра гын, ме илаш да тидым але тудым ышташ тӱҥалына».16 Но ынде кугешнылше улыда да моктанеда. Чыла тыгай моктанымаш – осал.17 Тыгеракын, кӧ поро пашам ыштышашым пала, но ок ыште гын, тиде тудлан язык лиеш.
*а 4:6 Тун.кал 3:34.
Глава 4