Выбрать язык
Книги Ветхого Завета
Книги Нового Завета
с русским текстом1 Еҥ-влак чынжымак ойлат, тендан коклаште яжарланымаш уло – тугай яжарланымаш, могайже вес калык коклаштат уке: ала-кӧ ачажын изватыж дене вате-марийла ила.2 А те кугешнеда! Тыланда лучо ойгаҥаш да тыге ыштышым шкендан кокла гыч кораҥдаш ок кӱл ыле мо?3 Мый гын, капем дене тендан дене омыл гынат, шӱлышем дене тендан пелен улам, да пуйто тендан дене лийын, тыге илыше еҥ дене мом ышташ, ынде шонен пыштенам.4 Господьна Иисус Христос лӱмеш погынымыда годым, кунам мый шӱлышем дене тендан пелен улам, да мемнан дене пырля Господьна Иисус Христосын куатшат лиеш,5 тиде еҥым сатаналан кодыза. Тек тудын капше орлана, а чонжо Господьна Иисус Христосын кечынже утаралтеш.6 Тендан моктанымыда сай огыл. Але огыда пале: ру падыраш уло руашым шукта?7 Тыланда у руаш лияш манын, тошто рум луктын кудалтыза. Ынде те ру деч посна улыда, вет мемнан Кугече Пачанам, Христосым, мемнан верч шӱшкылмӧ.8 Тугеже, тошто ру дене огыл, пужлымашын да осаллыкын тошто руышт дене огыл, а арулыкын да чынын шергиндыже дене пайремлышаш улына.
9 Яжарланыше-влак дене кылым кучаш огыл манын, мый серышыштем тыланда возенам.10 Мый тиде тӱнясе чыла яжарланыше, опкынланыше, агыше, шояк юмылан кумалше нерген иктешлен ойлен омыл. Уке гын, тыланда тиде тӱня гыч лекташ кӱлеш ыле.11 Мый возенам ыле: ӱшанышылан шотлалтше еҥ яжарлана, опкынлана, шояк юмылан кумалеш, орла, йӱэш але аген коштеш гын, тудын дене кылым ида кучо, тыгай еҥ дене пырля кочманат огыл.12 Молан мылам ӧрдыж еҥ-влакымат судитлаш? Шкендан кокласе еҥым те шке огыда судитле мо?13 Тӱжвалысе-влакым Юмо судитла. «Осалланышым шкендан кокла гыч кораҥдыза».*а
*а 5:13 Зак.уш 17:7.
Глава 5