Выбрать язык
Книги Ветхого Завета
Книги Нового Завета
с русским текстом1 Мо нерген те мыланем возен улыда – туге, ӱдырамаш деке пӧръеҥ ок тӱкнӧ гын, сай.2 Но, яжарланымаш деч кораҥ кошташ манын, кажне пӧръеҥын шке ватыже, кажне ӱдырамашын шке марийже лийже.3 Марий йӧратымашыжым ватыжлан пуышаш, тыгак вате йӧратымашыжым марийжылан пуышаш:4 вате шке капшылан оза огыл, а марийже оза, тыгак марият шке капшылан оза огыл, а ватыже оза.5 Икте-весе деч ида кораҥ. Пырля мутланен келшен, пӱтылан да кумалмылан шкем пуаш манын, икмыняр жаплан веле кораҥаш лиеш, вара угыч пырля лийза. Уке гын шкем кучен кертдымыланда сатана тендам алгаштара.6 Но мый тидым кӱштен огыл, а эрыкым пуэн ойлем.7 Чыла еҥ мыйын гай лийже манын шонем, но кажныжын Юмын пуымо моштымашыже уло, иктыжын икте, весыжын весе.
8 А кӧн пелашыже уке але кӧн пелашыже колен, нунылан ойлем: мыйын семын шкет илат гын, нунылан сай.9 Но шкеныштым кучен огыт керт гын, тек мужыраҥыт, вет кап йӱлен коштмеш, мужыраҥаш сайрак.10 Но мужыраҥше-влаклан мый огыл, а Господь кӱшта: вате марийже деч ойырлышаш огыл.11 Ойырла гын, тек мужыраҥде кодеш але шке марийже дене сӧраса. А марий ватыжым кудалтышаш огыл.12 Молыжлан Господь огыл, а мый ойлем: иктаж-кудо ӱшаныше пӧръеҥын ватыже ӱшаныдыме, но пырля илаш келша гын, тудо ватыжым кудалтышаш огыл.13 А ӱдырамашын марийже ӱшаныше огыл, но пырля илаш келша гын, тудо марийжым кодышаш огыл.14 Вет ӱшаныдыме пӧръеҥ ӱшаныше ватыж гоч святитлалтеш, а ӱшаныдыме ӱдырамаш ӱшаныше марийже гоч святитлалтеш, уке гын тендан йочада ару огыт лий ыле, а кызыт святой улыт.15 А ӱшаныдыме пелаш ойырлынеже гын, тек ойырла. Ӱшаныше пӧръеҥ але ӱдырамаш тыгай годым ойырлаш эрыкан лиеш. Юмо мемнам тыныслын илаш ӱжын.16 Кушеч палет, вате, мариетым утарен кертат мо? Але марий, кушеч палет, ватетым утарен кертат мо?
17 Могай илышым Юмо палемден да могай дене Господь ӱжын, тек кажне тугаяк илыш дене умбакыжат ила. Мый чыла черкыште тыге кӱштем.18 Кӧ пӱчман ӱжалтын, тек тидым шылташ ок тырше, кӧ пӱчдымӧ ӱжалтын, тек пӱчмӧ йӱлам ок эрте.19 Айдеме пӱчмӧ але пӱчдымӧ – садак, Юмын кӱштымыжым шуктымаш веле кӱлешан.20 Юмын ӱжмӧ годым айдеме могай лийын, тугаяк кодшаш.21 Тыйым кул семын ӱжмӧ гын, тек тиде тыйым ок тургыжландаре, а эрыкан лийын кертат гын, сайракшым ойырен нал.*а22 Вет Господьын ӱжмӧ кул Господьын эрыкыш колтымо еҥже улеш, тыгак ӱжмӧ годым эрыканже Христосын кулжо улеш.23 Те шергын тӱлен налме улыда, айдемын кулжо ида лий!24 Иза-шольо-влак, Юмын ӱжмӧ годым кӧ могай лийын, Юмын ончылно кажныже тугаяк кодшо.
25 А ӱдыр-влак шотышто кӱштымым Господь деч мый налын омыл, но Господьын порылыкшо дене мый ӱшанле улам да шке шонымем каласем.26 Тыгеракын, кызытсе неле жаплан кӧра айдемылан ончычсо гаяк кодаш сайрак, шонем.27 Вате дене кылдалтынат гын, ойырлаш ит тырше. Тыйын ватет уке гын, ӱдырым налаш ит тӧчӧ.28 Но мужыраҥат гынат, языкым от ыште, ӱдырат марлан лектеш гын, языкыш ок пуро. Но тыгай еҥын илышыштыже нелылык лиеш, а мый тендам тидын деч аралынем.29 Мый тыланда каласем, иза-шольо-влак: ынде жап шагал. Ончыкыжым тек ватан-влак ватыдыме гай лийыт,30 шортшо-влак – шортдымо гай, куаныше-влак – куаныдыме гай, тӱлен налше-влак – погыдымо гай,31 тӱняште мо улмо дене кӧ пайдалана, пайдам налдыме гай лийже, вет тиде тӱнян тӱсшӧ эрта.32 Те тургыжланыде илыза манын шонем. Господьлан келшыше лияш манын, ватыдыме айдеме Господьын пашаж верч тырша,33 а ӱдырым налше – тӱнясе нерген шона, ватыжлан келшаш тырша. Марлан лекше ден ӱдыр икте-весышт деч ойыртемалтыт:34 ӱдыржӧ, кап денат, шӱлыш денат святой лияш манын, Господьын пашаж верч тырша, а марлан лекше тӱнясе нерген шона, марийжылан келшаш тырша.35 Тидым мый тендам кепшылташлан огыл, а тыланда полшаш шонен ойлем. Те шкендам сайын кучыза да Господь дене эре порын ушнен шогыза манын шонем.
36 Иктаж-кӧ ӱдыржым марлан пуыдымыж дене сайын ок ыште манын шона, ӱдыржын марлан кайыме жапше эртен да тыге лияш кӱлеш гын, тек кузе шона, туге ышта, тиде язык огыл, тек тыгай-влак мужыраҥыт.37 Но кӧ нимогай ӧкым деч посна, шӱмыштыжӧ пеҥгыдын шоген, шке шонымыжлан оза лиеш да шке ӱдыржым ӱдырымак кодаш шонен пыштен, тудо сай ышта.38 Тугеже, кӧ ӱдыржым марлан пуа, сай ышта, а кӧ ок пу, эшеат сай ышта.*б
39 Марийже илыме годым ватыже тудын дене закон почеш кылдалтын, а марийже кола гын, кӧлан шона, тудлан марлан лекташ эрыкше уло, но тидыже Господь дене ушнымаште лийшаш.40 Туге гынат тудо марлан лекде кодеш гын, пиаланрак лиеш. Тиде мыйын шонымем, а мый шонем: мыйынат Юмын Шӱлыш уло.
*а 7:21 Грекла возымым кок семын умылаш лиеш: «Сайракшым ойырен нал» кул лийын кодмымат, эрыкыш лекмымат ончыктен кертеш.
*б 7:36-38 Грекла возымым тыгеат умылаш лиеш: « 36 Иктаж-кӧ налшаш ӱдыржӧ шотышто тудым марлан налде сайын ок ыште манын шона, шкенжым кучен ок керт да тыге лияш кӱлеш гын, тек кузе шона, туге ышта, тиде язык огыл, тек тыгай-влак мужыраҥыт. 37 Но кӧ, шӱмыштыжӧ пеҥгыдын шоген, шкенжым кучен кертеш, шке шонымыжлан оза лиеш да налшаш ӱдырым ӱдырымак кодаш шонен пыштен, тудо сай ышта. 38 Тугеже, кӧ налшаш ӱдыржым марлан налеш, сай ышта, а кӧ ок нал, эшеат сай ышта».
Глава 7