Выбрать язык
Книги Ветхого Завета
Книги Нового Завета
с русским текстом1 Юмын кумылжо почеш Иисус Христосын Апостолжо лийше Павел деч Ефесыште илыше да Христос Иисус дене ушнен шогымаште ӱшанле святой-влаклан.
2 Мемнан Юмо Ачана деч да Господь Иисус Христос деч тыланда порылык да тыныслык лийже.
3 Мемнан Господьна Иисус Христосын Юмыжо да Ачаже моктымо лийже! Тудыжо пылпомышто Шӱлышын уло суапландарымыж дене Христос гоч мемнам суапландарен.4 Шкенжын ончылныжо мыланна святой да шылталаш амалдыме лияш манын, тӱням шочыктымо деч ончычак Тудо мемнам Христос гоч ойырен налын. Шке йӧратымыж дене,5 шке поро кумылжо дене Иисус Христос гоч Тудо мемнам шке эргыже лияш ончылгоч палемден.6 Тыгеже йӧратыме Эргыж гоч мыланна пӧлеклыме чапланыше порылыкшо моктымо лиеш.7 Тудын гоч, Тудын Вӱржӧ дене, ме тӱлен налме улына, Юмо поян порылыкшо дене сулыкнам кудалтен.8 Тиде порылыкшым Тудо чыла тӱрлӧ уш-акыл да умылымаш дене мыланна лыҥ пӧлеклен.9 Христос гоч ондакак ямдылыме тайныжым Тудо поро кумылжо дене мыланна палдарен.10 Жап тичмашлыкышкыже шумеке, Юмо тидым шукта: пылпомыштат, мланде ӱмбалнат чылажымат, Христосын кид йымакыже пуэн, уша.
11 Тудын дене ушнен, ме наследник лийынна, чылам шуктышо Юмын кумылжо почеш тидлан ончылгоч палемдыме улына. Тудын шонымыжо да каҥашыже почеш12 ме, эн ондак Христослан ӱшаннам пыштыше-влак, Юмын чапшылан моктымашым кондышо илыш дене илышаш улына.13 А чын шомакым, тыланда утарымашым кондышо Поро Уверым, колмекыда да Тудлан ӱшанымекыда, Христос дене ушнымаште теат сӧрымӧ Святой Шӱлыш дене палемдыме улыда.14 Тудо мемнан югыпогынан залогшо, Тудым Юмын еҥже-влакым тӱлен налмылан пуымо, тыге Юмын чапше мокталтеш.
15 Чыла тидлан кӧра мый, Господь Иисуслан ӱшанымыда да чыла святой-влакым йӧратымыда нерген колмекем,16 кумалмем годым тендам эре шарнем да тендан верч Юмылан чарныде таум ыштем.17 Мемнан Господьна Иисус Христосын Юмыжо, чапланыше Ача, Тудым пален налмаште тыланда уш-акыл да почмаш шӱлышым пуыжо.18-19 Мом ӱшанен вучаш Юмо мемнам ӱжмым палыза, Тудын святой-влаклан пуышаш чапле югыпогыжо могай поян улмым умылыза да Тудын вий-куатше мемнан дене, ӱшаныше-влак дене, таҥастараш лийдыме могай кугу улмым те палыза манын, Юмо тендан шӱм шинчадам волгалтарыже. Тиде кугу вий-куатшым20 Христос гоч ончыктен, Тудым колымаш гыч ылыжтен да пылпомышто Шкенжын пурла могырышкыжо шынден.21 Христосым Юмо чыла тӱҥалтыш, кучемвий, куат да озаланымаш деч кӱшкӧ, тиде курымышто веле огыл, а шушаш курымыштат пуымо чыла лӱм деч кӱшкӧ шынден.22 Юмо чылажымат Христосын йол йымакыже пыштен да Тудым чыла деч кӱшкӧ Черкын вуйжылан шогалтен.23 Черке – Тудын Капше, чылаштат чылам тичмашым Ыштышын тичмашлыкше.
Глава 1