Выбрать язык
Книги Ветхого Завета
Книги Нового Завета
с русским текстом1 Сандене мый, Павел, тыланда кӧра, вес калык гыч улшо еҥ-влаклан кӧра, Иисус Христос верч кучен петырыме улам.2 Тыланда полшышо порылык пашам Юмын мыланем ӱшанен пуымыж нерген те колында, векат:3 кузе мый ондак кӱчыкын возенам, почмаш гоч мыланем тайным палдарыме.4 Кунам лудыда, Христосын тайныжым сайын палымем умылен кертыда.5 Тудым ончычсо тукым еҥ-влаклан палдарыме огыл, а ынде Тудын святой Апостол ден пророкшо-влаклан Святой Шӱлыш дене почмо.6 А тайныже теве тыште: вес калык-влак Поро Увер гоч иудей-влак дене пырля наследник да ик капын ужашыже лийшаш улыт, Юмым мом сӧрымыжым нунат Христос Иисус дене ушнымаште налыт.7 Юмын шуко ыштыше куатше почеш Тудын мылам пуымо порылык пӧлекше гоч мый Поро Уверын служитлышыже лийынам.8 Мылам, святой-влак кокла гыч эн изилан, тиде порылык пуалтын: Христосын шымлаш лийдыме поянлыкше нерген вес калык-влаклан поро уверым каласкалаш9 да чылажымат Иисус Христос гоч ыштыше Юмын Шкеж дене курымла годсек шылтыме тайныже кузе шукталтмым чылалан палдараш.10-11 Вет Господьна Христос Иисус гоч Юмын шуктымо курымашлык шонымашыж дене келшышын, Юмын шуко сынан уш-акылже пылпомышысо вуйлатымаш ден кучемвийлан ынде Черке гоч палдарыме лийшаш.12 Христос дене ушнен шоген да Тудлан ӱшаныме дене ме лӱдде да инанен Юмо деке толын кертына.13 Сандене тендан верч нелылыкыш логалмемлан вуйдам ида саке манын йодам, тиде нелылыкше – тендан чапда.
14 Тидлан кӧра мемнан Господьна Иисус Христосын Ачаж ончылно сукен шинчам –15 ача деч шочшо кеч-могай тукым пылпомыштат, мландымбалнат шке лӱмжым Тудын деч налеш –16 да сӧрвалем: тек Тудо чапшын поянлыкше дене келшышын тендан кӧргӧ чондам шке Шӱлышыж дене виян пеҥгыдемда.17-19 Те йӧратымашеш вожаҥза, тудын ӱмбалан илышдам чоҥыза, чыла святой-влак дене пырля Христосын йӧратымашыжын лопкытшым, кужытшым, келгытшым да кӱкшытшым умылен кертса, Христосын чыла шинчымаш деч кӱшнӧ шогышо йӧратымашыжым пален налза манын, тек тендан шӱмыштыда ӱшанымаш гоч илаш Христосым пуа, тыге те Юмын чыла тичмашлыкше дене темалтын кертыда.
20 Мемнан кӧргыштӧ ыштыше куатше дене мемнан йодмына але шонкалымына деч ятырлан шукырак ыштен кертше Юмылан21 Черкыште Христос Иисус дене ушнымаште тукым гыч тукымыш, курым-курымеш чап лийже. Аминь.
Глава 3