Выбрать язык
Книги Ветхого Завета
Книги Нового Завета
с русским текстом1 Тыгеже, Христос дене ушнымаш тендам кумылаҥда гын, Тудын йӧратымыже тендам лыпландара гын, Шӱлыш дене ушнымаш уло гын, шӱм кумыл да порылык уло гын,2 мыйын куанем тичмашым ыштыза: чылан ик семын шоныза, икгай йӧратымашан, икоян да ик кумылан лийза.3 Тавалымылан але чапланаш тыршымылан кӧра нимом ида ыште, а ӱҥышын икте-весым шке дечда кугураклан шотлыза.4 Тек кажныже шке пайдаж нерген веле огыл, а молынат пайдаж нерген шона.5 Тендан шонымашда да шӱм шижмашда Христос Иисусын гаяк лийже.
6 Тудо, чын Юмо улмыж ӱмбач,
Юмо дене тӧр лияш тӧчен огыл,
7 а Шкенжым Шке ӱлык шынден,
тарзын тӱсшым налын, айдеме гай лийын,
Тудым чылан айдеме тӱсаным ужыныт.
8 Тудо Шкенжым Шке изиэш луктын,
колымо марте, ыресеш колымо мартеат,
мутым колыштшо лийын.
9 Садлан Юмо Тудым кӱшкӧ нӧлтен,
чыла лӱм дечат кӱшнӧ шогышо лӱмым пуэн.
10 Тыгеракын, пылпомышысо, мландысе да мланде йымалысе-влак
Иисус лӱм ончылно чылан сукен шичшаш улыт,
11 кажне йылме, Ача Юмын чапшым нӧлтен,
Иисус Христосым Господь манын почын ойлышаш.
12 Тыгеракын, йӧратыме иза-шольым-влак, тендан дене лиймем годым кузе мыйым эре колыштында, ынде тендан деч тораште улмем годым эшеат утларак колыштса: шкендан утаралтмашдам лӱдын да тыршен шуктыза.13 Юмо Шкеак тендан кӧргыштыда пашажым ышта, тыгеже те Тудын поро кумылжо дене келшыше пашам ыштынеда да ыштеда.14-15 Локтылалтше да пужлышо тукым коклаште те шылталаш амалдыме, яндар, Юмын титакдыме икшывыже лийза манын, чылажымат ӧпкелыде да кокыте шоныде ыштыза. Тыгай тукым коклаште те тӱняште шӱдыр семын йолгалтыда,16 илыш шомакым кучеда. Чыла тидлан кӧра Христосын кечынже мый моктанен кертам, вет тидыже мыйын арам огыл тыршымем да арам огыл пашам ыштымем ончыкта.17 Но ӱшанымашда верч надырым пуэн эртарыме служитлымаште жертве лиям ыле гынат, мый куанем, чыланда дене пырля йывыртем.18 Тыгак теат куаныза, мый денем пырля куаныза.
19 Тендан кузе илымыда нерген пален налын, мыйынат кумылем нӧлтшӧ манын, тендан деке вашке Тимофейым колтен керташ Господь Иисус дене ушнен ӱшанем.20 Тудын семын уло чон дене тендан верч тыршыше мыйын нигӧ весе уке,21 вет чылан Иисус Христосын пашаж верч огыл, а шкеныштын пашашт верч веле тыршат.22 А Тимофейлан ӱшанаш лиеш манын, те паледа: Поро Уверлан тудо мый денем ачаж дене эрге пырля ыштыме семын ыштен.23 Тугеже, мый денем мо лийшашым пален налмекем, тудым тунамак колтен кертам манын ӱшанем.24 Мый шкежат вашке тендан деке толам манын, Господь мылам ӱшаным пуа.
25 Но Епафродитым, мый денем пырля ыштыше да тыршыше изанам, мыланем кӱлмӧ годым полшаш колтымо еҥдам, тендан деке колташ кӱлешлан шотлем.26 Тудо тендам чыландам пешак ужнеже да черланымыж нерген уверым колмыланда тургыжлана.27 Епафродит чынжымак колышаш гай черле лийын, но Юмо тудым чаманен, да тудым веле огыл – мылам ойго ӱмбак ойго ынже ешаралт манын, мыйымат чаманен.28 Тыгеже тыланда, тудым угыч ужмеке, куан лийже, а мыланем шагалрак ойго лийже манын, мый тудым вашкерак колтенам.29 Тудым Господь дене ушнымаште куанен вашлийза да тудын гай еҥ-влакым пагалыза.30 Тудыжо Христосын пашажлан лийын изиш гына колен огыл. Могай полышым те мыланем пуэн кертын огыдал, тудым пуаш манын, илышыжымат чаманен огыл.
Глава 2