Выбрать язык
Книги Ветхого Завета
Книги Нового Завета
с русским текстом1 Те Христос дене пырля ылыжында гын, тугеже кӱшылысым кычалза. Тушто Юмын пурла могырыштыжо Христос шинча.2 Мланде ӱмбалысе нерген огыл, а кӱшылысӧ нерген шоныза.3 Вет те коленда, да тендан илышда Христос дене пырля Юмо дене ушнымаште уждымын саклалтеш.4 Кунам Христос, тендан илышда, толеш, тунам теат Тудын дене пырля чапланен толыда.
5 Сандене тендан тиде тӱня деч мо уло, тудым пытарыза: яжарланымым, шакшыланымым, сутланымым, осал кумыл шупшмым, опкынланымым. Опкынланымыже шояк юмылан кумалме дене иктак.6 Тыгай верчак мут колыштдымо еҥ-влак ӱмбаке Юмын шыдыже возеш.7 Ала-кунам теат тыгай койыш кид йымалне лийында, шкендам тыгак кученда.8 А ынде те чылажымат ӧрдыжкӧ кораҥдыза: шыдым, ажгынымым, еҥлан осалым шонымым, еҥ ӱмбаке ойлымым, умша гыч лекше шакше мутым.9 Икте-весыланда ида шойышт, вет шке ӱмбачда тошто айдемым пашаж дене пырля кудалтенда,10 у айдемыш вӱдылалтында. Шке Ыштышыжын тӱсан гай лияш келыштаралтын, тудыжо эре уэмеш, Юмым сайынрак да сайынрак палаш тунемеш.11 Тидын шотышто эллинат, иудеят, пӱчмат, пӱчдымат, варварат, скифат, кулат, эрыканат уке, но Христос – тиде чыла да чылаштат.
12 Тыгеже, Юмын ойырен налме, святой да йӧратыме еҥ-влак семын, шӱм чаманымаш, порылык, ӱҥышылык, тыматле улмо, шуко чытыме дене вӱдылалтса.13 Икте-весыдам чытен илыза, тендан кокла гыч иктаж-кудыжын весылан ӧпкеда уло гын, титакшым кудалтыза. Кузе Христос титакдам кудалтен, теат тугак ыштыза.14 Но эн ондак йӧратымаш дене вӱдылалтса, тудо чыла сайым уша.15 Тек тендан шӱмыштыда Юмын тыныслыкше озалана. Тыныслыкышке тендам ик кап семын ӱжмӧ. Тауштен моштышо лийза.16 Тек тендан чоныштыда Христосын шомакшын уло поянлыкше ила. Уло уш-акыл дене икте-весыдам туныктыза, икте-весылан каҥашым пуыза, псаломым, моктеммурым да шӱлыш кумылаҥдыме мурым шӱмыштыда Господьлан тауштен мурыза.17 Мом гына ойледа але ыштеда, чылажымат Господь Иисус Христос лӱм дене ыштыза, Тудын гоч Юмылан да Ачалан таум каласыза.
18 Вате-влак, марийдам колыштса, Господьлан ӱшаныше ӱдырамашлан тиде келшен толеш.19 Марий-влак, шке ватыдам йӧратыза да нунын дене торжа ида лий.20 Йоча-влак, ача-авадам чыла шотыштат колыштса, Господьлан тиде келша.21 Ача-влак, йочада-влак вуйым ынышт саке манын, нуным эре ида шылтале.
22 Кул-влак, мландымбалысе озада-влакым чыла шотыштат колыштса. Тидыжым айдемылан келшаш тӧчен, оза ончымо годым веле огыл, а яндар шӱм дене, Юмо деч лӱдын ыштыза.23 Мом те ыштеда, чылажымат айдемылан огыл, а Господьлан ыштыме семын уло кумылын ыштыза.24 Господь деч пӧлек шотеш югыпогым налшашдам те паледа, вет Христос Господьлан служитледа.25 А осалым ыштыше шкенжын осалже денак налеш. Юмо чыла еҥым ик семын онча.
Глава 3