Выбрать язык
Книги Ветхого Завета
Книги Нового Завета
с русским текстом1 Иза-шольо-влак, жап да шагат нерген тыланда возаш кӱлешыже уке.2 Те шкеат сайын паледа: Господьын кечыже йӱдым толшо вор семын толеш.3 Кунам «Ынде тыныслык, нимогай лӱдыкшӧ уке» манын ойлаш тӱҥалыт, тунам нелемше ӱдырамашын азам ыштыме орланымашыже тӱҥалме семын азап нуным вучыдымын авалта, да утлен огыт керт.4 Но те, иза-шольо-влак, пычкемыште огыдал, да тудо кече тендам вор семын авырен ок керт.5 Те чылан волгыдын шочшыжо, кечывал кечын икшывыже улыда. Ме йӱдынат, пычкемышынат шочшыжо огынал.6 Тыгеже моло семын малышаш огынал, ме шекланен шогышаш да айык шонымашан лийшаш улына.7 Вет малыше-влак йӱдым малат, да йӱшӧ-влак йӱдым йӱыт.8 Ме кечывал кечын шочшыжо улына гын, айык шонымашан лийшаш улына, аралыше кӱртньӧ тувыр семын йӧратымаш ден ӱшанымашым чийышаш, утарымашым ӱшанен вучымым ӧшлӧк семын упшалшаш улына.9 Вет Юмо мемнам шке шыдыжлан огыл, а Господьна Иисус Христос гоч утарымашым налаш палемден.10 Ме илена але колымаш омо дене малена, мыланна Христос дене пырля илаш манын, Тудо мемнан верч колен.11 Сандене икте-весыдам кумылаҥдыза да пеҥгыдемдыза. Те тидым ынде ыштен шогеда.
12 Иза-шольо-влак, тендан коклаште пашам ыштыше, Господь дене ушнымаште тендам виктарыше да каҥашым пуышо еҥ-влакым жаплаш йодына.13 Ыштен шогымо пашаштлан нуным поснак пагалыза да йӧратыза. Шке коклаштыда тынысын илыза.14 Шот деч посна илыше-влакым туныктыза, лӱдшӧ-влакым кумылаҥдыза, вийдыме-влаклан полшыза, чыла декат чытышан лийза манын, иза-шольо-влак, тендам сӧрвалена.15 Нигӧат весын осалжылан осал дене ынже вашеште манын шекланыза, икте-весыланда да чылаланат эре порым ышташ тыршыза.
16 Эре куаныза.17 Чарныде кумалза.18 Чыла годымат Юмылан таум ыштыза. Тендан деч, Христос Иисус дене ушнен шогышо-влак деч, Юмо тидымак вуча.19 Шӱлышын тулжым ида йӧртӧ,20 пророклен ойлымым ӱлык ида шынде.21 Чыла тергыза, сайжым кучыза.22 Чыла тӱрлӧ осал деч кораҥза.
23 А тыныслыкым пуышо Юмо Шкеак тендам пӱтынек святитлыже, тек тендан шӱлышда, чонда да капда мемнан Господьна Иисус Христос толмылан шылталаш лийдымын тӱрыснек аралалт кодеш.24 Тендам Ӱжшӧ – ӱшанле, Тудо тидым ышта.25 Иза-шольо-влак, мемнан верч кумалза.26 Святой-влак семын шупшалын, чыла иза-шольо дене саламлалтса.27 Тиде серышым чыла святой иза-шольылан лудаш Господь лӱм дене кӱштем.28 Мемнан Господьна Иисус Христосын порылыкшо тендан дене лийже. Аминь.
Глава 5