Выбрать язык
Книги Ветхого Завета
Книги Нового Завета
с русским текстом1 Тылеч вара мый ужынам: теве пылпомышто почмо омса. Мыланем ондак пуч семын йоҥген ойлышо йӱк каласен: «Тышке кӱзӧ, тылеч вара мо лийшашым тыланет ончыктем».2 Тунамак мыйым Шӱлыш авалтен. Теве пылпомышто престол шога, а престолышто – Шинчыше.3 Шинчышыжын тӱсшӧ яспис ден сардис кӱ гай койын, престол йыр смарагдыла койшо шонанпыл лийын.4 Тиде престол йыр коло ныл престол лийын, тушто коло ныл старец шинчымым ужынам, нуно ош вургеман лийыныт, вуйыштышт шӧртньӧ вуйшӱдыш лийын.5 А престол деч волгенче да кӱдырчӧ да йӱк-йӱан лектыныт. Престол ончылно шым светильникыште тул йӱлен, нуно Юмын шым шӱлышыжӧ улыт.6 А престол ончылно хрусталь гай янда теҥыз лийын.
Престол покшелне да престол йыр ныл илыше шоген, нунын капыштышт чыла вере, ончылнат, шеҥгелнат, шинчашт лийын.7 Икымшыже лев гай лийын, кокымшыжо – ӱшкыж гай, кумшыжо айдемын гай чуриян лийын, а нылымшыже – чоҥештыше пӱркыт гай.8 Ныл илыше кокла гыч кажныжын куд шулдыржо лийын, шинчашт – уло кап мучко, кӧргыштыштат. Йӱдшӧ-кечыже чарныде ойлат:
«Святой, Святой, Святой
Господь Юмо, Чылакучышо!
Тудо лийын, уло да толеш».
9 А кунам илыше-влак престолышто Шинчышым, курым-курымеш Илышым, чапландарат, Тудлан пагалымашым ончыктат да тауштат,10 коло ныл старец престолышто Шинчыше ончылан кумык возеш, курым-курымеш Илышылан вуйым сава, вуйшӱдышыжым престол ончыко пышта да ойла:
11 «Господь,
Тый чапымат, пагалымашымат, вийымат налаш йӧрышӧ улат:
мо уло – чыла Тый ыштенат,
Тыйын шонымет почеш чылажат уло да ышталтын».
Глава 4