Выбрать язык
Книги Ветхого Завета
Книги Нового Завета
с русским текстом1 Пачан шым печать гыч иктыжым почмыжым мый ужынам да ныл илыше гыч иктыжын кӱдырчӧ гай йӱк дене «Тол да ончал!» манын каласымыжым колынам.2 Вара мый ужынам: теве ош имне, тудын ӱмбалне шинчышын пикшйоҥежше лийын. Тудлан вуйшӱдышым пуэныт, тудо сеҥыше семын да сеҥаш лектын.
3 А кунам Пача кокымшо печатьым почын, мый ныл илыше гыч кокымшын «Тол да ончал!» манын ойлымыжым колынам.4 Тул гай йошкар вес имне лектын. Еҥ-влак икте-весым пуштедышт манын, тудым кушкыж шинчышылан мланде ӱмбач тыныслыкым налаш вийым пуэныт, тыгак тудлан кугу кердым пуымо.
5 А кунам Пача кумшо печатьым почын, ныл илыше гыч кумшыжын «Тол да ончал!» манын каласымыжым колынам. Теве шем имньым ужынам, тудын ӱмбалныже шинчышын кидыштыже виса лийын.6 Ныл илыше кокла гыч лекше йӱкым колынам, тудо каласен: «Хиникс виса*а шыдаҥ ик динарийым шога, кум хиникс виса шожат – динарийымак. А олив ӱйым да йошкар аракам ит локтыл».
7 А кунам Пача нылымше печатьым почын, мый ныл илыше гыч нылымшыжын йӱкшым колынам, тудо ойлен: «Тол да ончал!»8 Мый ужынам: теве ужар-сур имне да ӱмбалныже имнешке, тудын лӱмжӧ колымаш, почешыже тамык*б коштын. Тудын кид йымакыже мландын нылымше ужашыже пуалтын. Керде дене, шужымаш дене, чер дене да янлык-влак дене еҥым пуштедаш тудлан кучемвий пуалтын.
9 А кунам Пача визымше печатьым почын, жертвенник йымалне мый Юмын шомак верч да таныклымышт верч пуштмо-влакын чоныштым ужынам.10 Нуно виян йӱк дене кычкыреныт: «Святой да Чын Господь, эше мыняр жап Тый мланде ӱмбалне илыше-влакым от судитле да мемнан вӱрна верч ӱчым от шукто?»11 Нунылан кажныжлан ош вургемым пуэныт. Тендан дене пырля пашам ыштыше еҥ да иза-шольо-влак кокла гыч шукыштым тендан семынак пуштыт, нунын чотышт тичмаш лиймешке, эше икмыняр жап чытыза манын, нунылан каласеныт.
12 А Пачан кудымшо печатьым почмекыже, мый ужынам: теве мланде чот чытырналтын, кече шем чоштыра куэм гайыш савырнен, тылзе вӱр гай йошкарге лийын.13 Кушкын шудымо смоква саскам кугу мардеж рӱзен велыме семын кавасе шӱдыр-влак мланде ӱмбаке йогеныт;14 вӱдылка книгам пӱтырымӧ семын кава чакнен йомын, чыла курык да отро-влак шке верышт гыч тарваненыт.15 Мландымбалысе кугыжа, тӧра ден поян-влак, сарзывуй да виян-влак, чыла кул ден чыла эрыкан-влак мланде помыш ден курык шелше коклаш шылыныт16 да курык ден кӱ-влаклан ойленыт: «Ӱмбакына камвочса да престолышто Шинчышын чурийже да Пачан шыдыж деч мемнам шылтыза!17 Вет Тудын шыдыжын кугу кечыже толын, да кӧ тидым чытен шоген кертеш?»
*а 6:6 Хиникс виса – литр наре.
*б 6:8 Тамык – але: «вес тӱня».
Глава 6