Выбрать язык
Книги Ветхого Завета
Книги Нового Завета
с русским текстом1 Визымше Суксо пучым пуалтымеке, мый кава гыч мландыш камвочшо шӱдырым ужынам, тудлан пундашдыме келгытын тавыжын сравочшым пуэныт.2 Шӱдыржӧ пундашдыме келгытын тавыжым почын, да кугу коҥга гыч лекме семын таве гыч шикш нӧлталтын, тушеч лекше шикш дене кече ден юж вудакаҥыныт.3 Шикш гыч мланде ӱмбаке шурнышырчык-влак лектыныт, нунылан мланде ӱмбалнысе скорпионын гай вий пуалтын.4 Мландысе шудылан, нимогай кушкыллан да нимогай пушеҥгылан эҥгекым ынышт ыште манын, шурнышырчык-влаклан каласеныт: кӧн саҥгаштыже Юмын печатьше уке, тугай айдемылан веле эҥгекым ышташ нунылан эрык пуалтын.5 Нунылан еҥ-влакым пуштедаш огыл, а вич тылзе орландараш эрыкым пуымо. Нунын орландарымышт скорпионын айдемым пӱшкылмыжӧ гай.6 Тудо кечылаште еҥ-влак колымашым кычалыт, но огыт му, нуно колынешт, а колымаш нунын деч куржеш.
7 Тӱсышт дене шурнышырчык-влак сарлан ямдылыме имне гай койыныт. Вуйыштышт шӧртньыла койшо вуйшӱдыш гай улмаш, а чурийышт – айдемын гай.8 Нунын ӱдырамаш ӱпла койшо ӱпышт лийын, а пӱйышт – левын гай.9 Ӱмбалнышт кӱртньӧ тувыр гай аралыше тувыр лийын, шулдыр йӱкышт – шуко имне кредалмашке кудалме годым орва лӱшкымӧ гай.10 Нунын скорпионын гай почышт лийын, туштыжо – умдо. Почыштышт вич тылзе жапыште айдемылан эҥгекым ышташ вий улмаш.11 Нунын кугыжашт пундашдыме келгытын суксыжо лийын, еврейла тудын лӱмжӧ Аваддон, а грекла – Аполлион, «Пытарыше».
12 Икымше ойго эртен, тылеч вара эше кок ойго толеш.
13 Кудымшо Суксо пучым пуалтымеке, Юмын ончылнысо шӧртньӧ жертвенникын ныл тӱкыж гыч мый ик йӱкым колынам.14 Пучым кучышо кудымшо Суксылан тудо каласен: «Кугу Евфрат эҥер воктене пидын шогалтыме ныл Суксым руден колто».15 Ныл Суксым мучыштареныт. Айдеме тукымын кумшо ужашыжым пушташ нуным тиде шагатлан, кечылан, тылзылан да ийлан ямдым кученыт.16 А имнешке сарзе-влакын чотышт кокшӱдӧ миллион наре лийын, мый тиде чотым колынам.17 Ужмаштем нине имне ден имнешке мылам тыге койыныт: имнешке-влак ӱмбалне тул гай йошкарге, шем-канде да киш гай нарынче тӱсан аралыше ком лийын. Имне-влакын вуйышт левын гай, нунын умшашт гыч тул, шикш да чӱкчыгиш лектын.18 Тиде кум азап – нунын умшашт гыч лекше тул, шикш да киш – айдеме тукымын кумшо ужашыжым пытарен.19 Имне-влакын вийышт нунын умшаштышт да почыштышт. Почышт – кишке гай да вуян, тудын дене эҥгекым ыштеныт.
20 Еҥ-влак кокла гыч илен кодшо-влакышт, кӧмытым нине азап пуштын огыл, шке кидышт дене мом ыштеныт, тудын деч кораҥын огытыл: нуно иялан да ужынат, колынат, коштынат кертдыме шӧртньӧ, ший, той, кӱ да пу юмылан кумалмым чарнен огытыл.21 Нуно пуштедымышт, юзыланымышт, яжарланымышт да шолыштмышт деч кораҥын огытыл.
Глава 9