Выбрать язык
Книги Ветхого Завета
Книги Нового Завета
с русским текстом1 Каваште мый кугу да ӧрыктарыше вес палдарыше палым ужынам: пытартыш шым эҥгекым кучышо шым Суксо. Нине шым азап дене Юмын шыдыже мучашлалтеш.
2 Мый тул йӧре варыме янда теҥыз гайым ужынам. Янлыкым да тудын тӱсшым, палыжым да лӱм чотшым сеҥыше-влак янда теҥыз ӱмбалне шогеныт да Юмын кӱсле-влакшым кученыт.3 Нуно Юмын тарзыже Моисейын мурыжым да Пачан мурыжым муреныт:
«Господь Юмо, Чылакучышо,
Тыйын ыштымет кугу да ӧрыктарыше!
Святой-влакын Кугыжашт,
Тыйын корнет чын да поро!
4 Господь, кӧ гына Тый дечет огеш лӱд,
кӧ гына лӱметым ок чапландаре?
Тый веле святой улат.
Калык-влак чылан толыт
да Тыйын ончылнет, сукен, вуйым сават,
вет Тыйын чын пашат-влак почылтыныт».
5 Вара мый ужынам: теве пылпомышто таныклымаш скинийысе храм почылтын.6 Шым эҥгекым кучышо шым Суксо храм гыч лектын. Нуно волгалтше ару йытын вургеман лийыныт, а оҥыштышт шӧртньӧ ӱштӧ лийын.7 Вара ныл илыше гыч иктыже курым-курымеш илыше Юмын шыдыж дене темыме шым шӧртньӧ чашым шым Суксылан пуэн.8 Юмын чапше ден Тудын куатше деч лекше шикш храмым темен, да шым Суксын шым эҥгекше шукталтмешке, храмыш нигӧ пурен кертын огыл.
Глава 15