Выбрать язык
Книги Ветхого Завета
Книги Нового Завета
с русским текстом1 Мый пылпомыш гыч Суксо волымым ужынам, тудын кидыштыже пундашдыме келгытын сравочшо да кугу шинчыр лийын.2 Суксыжо драконым – акрет годсо кишкым – кучен, тидыже – диавол да сатана, тудым тӱжем ийлан шинчырлен3 да пундашдыме келгытышке кудалтен, тудын аҥжым петырен, ӱмбаланже печатьым пыштен. Тек дракон, тӱжем ий эртымешке, умбакыже калык-влакым ондален ок керт. Тидын деч вара тудо кӱчык жаплан эрыкыш лукмо лийшаш.
4 Мый престол-влакым да тушто шинчыше-влакым ужынам, нунылан судитлаш кучемвийым пуымо улмаш. Иисусын таныклымыже да Юмын шомакше верч вуйыштым руал ойырымо-влакын чоныштым ужынам. Нуно янлыкланат, тудын тӱсшыланат вуйым савен кумалын огытыл, тудын палыжым саҥгашышт але кидешышт шындыктен огытыл. Нуно ылыжыныт да Христос дене пырля тӱжем ий кугыжаланеныт.5 Моло колышыжо тӱжем ий эртымешке ылыжын огыл. Тиде – икымше ылыжмаш.6 Икымше ылыжмаш годым илышым налшаш-влак пиалан да святой улыт: нунын ӱмбалне кокымшо колымашын кучемвийже ок лий, а Юмын да Христосын иерейышт лийыт да Тудын дене пырля тӱжем ий кугыжаланаш тӱҥалыт.
7 Тиде тӱжем ий жап эртымеке, сатана шке казаматше гыч эрыкыш лукмо лиеш. Тудыжо мландын ныл могырыштыжат илыше калык-влакым, вес семынже Гог ден Магогым, ондалаш лектеш. Тудо нуным сарыш пога, а нунын чотышт теҥыз ошма пырче наре.8 Нуно уло мланде мучко шарлен кынелыныт, святой-влакын илемыштым да йӧратыме олам авырен налыныт,9 но пылпомыш гыч Юмо деч тул волен да нуным пытарен.10 Нуным ондалыше диаволым йӱлышӧ кишан ерыш шуэныт, тушкак ондакше янлыкым да шояк пророкым шуэныт. Тушто нуно йӱдшӧ-кечыже курым-курымеш орландарыме лийыт.
11 Мый кугу ош престолым да тушто Шинчышым ужынам. Тудын чурийже деч мланде ден кава торлен йомыныт – нунылан вер лийын огыл.12 Мый колышо-влакым изимат, кугумат ужынам, нуно Юмо ончылно шогеныт. Книга-влакым почыныт. Адак вес книгам почыныт, тиде – илыш книга. Колышо-влак книгалаш возымо негызеш пашаштлан келшышын судитлыме лийыныт.13 Теҥызат колышо-влакшым пуэн, колымаш ден тамыкат колышо-влакыштым пуэныт. Кажныже пашажлан келшышын судитлыме лийын.14 Колымашымат, тамыкымат тулан ерыш шуымо. Тиде – кокымшо колымаш.*а15 А кӧн лӱмжым илыш книгаште возымым муын огытыл гын, тудым тулан ерыш шуэныт.
*а 20:14 13-14 Тамык – але «вес тӱня».
Глава 20