Библия на финно-угорских языках

•   
• Главная
• Библия
• Библейские рассказы
• Аудио
• Загрузки
• Контакты

Библия

Выбрать язык vienankarjalakšilivviksevepsän kelelмокшексэрзякскоми кыв вылынкоми-пермяцкöй кыв вылынмарлакырык марлаудмурт кылынмāньси лāтӈылханты ясаӈан

Книги Ветхого Завета про «Ташта Соткс»Содержаниесловарь1-я книга Моисеева. Бытие2-я книга Моисеева. ИсходПритчиИона

Книги Нового Завета Выбрать книгупро «Од Соткс»СодержаниесловариОт МатфеяОт МаркаОт ЛукиОт ИоаннаДеянияИакова1-e Петра2-e Петра1-e Иоанна2-e Иоанна3-e ИоаннаИудаК Римлянам1-е Коринфянам2-е КоринфянамК ГалатамК ЕфесянамК ФилиппийцамК Колоссянам1-е Фессалоникийцам2-е Фессалоникийцам1-е Тимофею2-е ТимофеюК ТитуК ФилимонуК ЕвреямОткровение

МОИСЕЕНЬ ВАСЕНЦЕ КНИГАЦ

УШЕДОМАСЬ

Глава 8

1Но Шкайсь мяляфтсь Ноень колга и сембе вирьбаксянь и кудонь жувататнень колга, конат ульсть Ноень мархта оцю венчса; и сяс Шкайсь кучсь варма масторть лангс, и веттне ушедсть тума.2Сёлговсть модапотмонь крхка веттне, пякставсть менелень вальмятне и пиземсь лоткась.3Шадось валомне кармась тума масторть лангста. Сяда ведьгемонь шида меле ведсь нинге кирсь,4и сисемце ковть кемзисемце шистонза оцю венчсь лоткась Араратонь панттнень лангса.5Веттне валомне тушендсть кемонце ковть самс. Кемонце ковть васенце шистонза веттнень алда лиссть панда прятне.

6Нильгемонь шида меле Ной панжезе оцю венчень вальмянять, конань сонць тиезе,7и нолдась кранч. Кранчсь лиендсь тоза-меки, мзярс модать лангоц ашезь коське веттнень эзда.8Сяльде Ной нолдась гуляня, мялецоль содамс, тусть веттне модать лангста али аш.9Но гулянясь ашезь му пильгонь шятяма васта и мрдась Ноенди оцю венчти, сяс мес модась нинге вельхтяфоль ведьса. Ной венептезе кяденц и сявозе гулянять меки оцю венчезонза.10Сон учсь нинге сисем шит, и меле тага нолдазе гулянять оцю венчста.11Илять гулянясь мрдась тейнза, кирдемок кургсонза вайшуфтонь пиже лопаня. Эста Ной шарьхкодсь, веттне тусть модалангста.12Сон учсь нинге сисем шит, и меле нолдазе гулянять, но сон ни ашезь мрда тейнза.

13Васенце ковть васенце шинцты, ся кизоня, мзярда Ноенди топодсь кота сятт фкя киза, модась коськсь ведть эзда. Ной кеподезе оцю венчть вельхксонц и няезе: модать лангоц коське.14Омбоце ковть комсь сисемце шинцты модась прокс коськсь.

Ноень озксказнец

15Эста Шкайсь мярьгсь Ноенди:16«Листь оцю венчста и сявить мархтот рьвяцень, цёратнень и синь рьваснон.17Лихтить ушу сембе жувататнень, конат мархтот: нармоттнень, кудонь жувататнень и сембе куйхнень-ёзмолдыхнень, конат шашнихть модава. Катк синь срадыхть масторть келес, катк шачфнихть и ламолгодыхть масторть лангса».18И Ной лиссь оцю венчста эсь цёранзон, рьванц и цёранзон рьваснон мархта.19Сембе вирьбаксянь жувататне, сембе куйхне-ёзмолдыхне, сембе нармоттне – сембось, мезсь якай модава, эрсь эсь юромонц коряс, лиссть оцю венчста.

20Ной тись Азорти алтарь*а и кандсь лангсонза марнек плхтамань озксказне*б эрь ару жуватать и нармонть эзда.21Азорсь марязе танцти шинеть и мярьгсь Эсь седисонза: «Мон оду мзярдонга аф сюдоса масторлангть ломанть инкса, сяс мес ломаттнень седиень арьсемасна кяжихть ни идькс пингстокиге. И Мон оду мзярдонга аф машфтса сембе эряйть, кода тиень тяни.
     22Мзярс масторсь эряй-ащи,
     аф лоткай видьмонь видемась и нумась,
     якшамсь и псись,
     кизось и тялось,
     шись и весь».

*а 8:20 алтарь – жертвенник

*б 8:20 марнек плхтамань озксказне – тя озксказне, кона марнек плхневсь алтарь лангса; жертва всесожжения.

 Глава 8