Выбрать язык
Книги Ветхого Завета
Книги Нового Завета
с русским текстом1Дина, Иаковонь стирец, конань тейнза шачфтозе Лия, лиссь васедема ся модань стирьхнень мархта.2Ся модань оцюнять, евеень Емморть цёрац – Сихем няезе сонь, фатязе и вихца удось мархтонза.3Сихемонь седиец педсь Динанди, Иаковонь стиренцты, и тейнза кельговсь стирсь, и сон корхнесь тейнза седиень пети валхт.4Сихем мярьгсь алянцты, Емморонди: «Сявк тя стирть тейне рьвакс».5Иаков кулезе: Емморонь цёрац сувафтозе Дина стиренц оцю визьксс. Но сяс мес сонь цёранза ульсть паксяса стаданзон мархта, Иаков изь кашторда, мзярс синь исть са.
6Еммор, Сихемонь аляц, мольсь Иаковонди корхтама.7Иаковонь цёранза састь паксяста, и мзярда кулезь, мезе лиссь, синь ваймосна колавсть и синь лаказевсть кяжса, сяс мес Сихем, удомок Иаковонь стиренц мархта, тись визьксонь тев Израильса, а тяфта аф мярьгондеви тиендемс.8Еммор корхтась мархтост и мярьгсь: «Монь цёразе Сихем сембе седиса педсь тинь стирентенди. Максость сонь тейнза рьвакс.9Рьвяйседа мархтонк: макссесть стирентень тейнек рьвакс, а минь стиреньконь сявондесть рьвакс эстейнть.10Эряда минь мархтонк. Тя модась тинь инголент. Эряда тяса, якада ланганза коза мяленте и сявода эстейнть сняра мода, мзяра тейнть эряви».11Сихем мярьгсь стирть алянцты и брадонзонды: «Кда тинь няфтьсасть тейне эсь пара мялентень, эста максса семботь, мезе аньцек афоледе ана кядьстон.12Ладясть сембода оцю питнеть стирентень инкса и сембода оцю казнеть, и мон максса тейнть семботь, мезе мярьктяда, но аньцек максость стирентень тейне рьвакс».13Но Иаковонь цёранза ёжу мяльса корхтасть Сихемонь и сонь алянц, Емморонь, мархта. Синь корхтасть тяфта сяс, мес Сихем вятезе Дина сазорснон оцю визьксс.14Синь мярьгсть тейст: «Тейнек аш кода тянь тиемс. Тейнек аш кода максомс сазороньконь рьвакс ломанти, конань апак керк киськопец, сяс мес тейнек тя визьксонь тев.15Минь тихтяма мялентень коряс, аньцек кда тинь аратада минь лацонк: кда сембе алянте керфтсазь киськопеснон.16Эста минь карматама макссемост стиреньконь тейнть рьвакс, а минць карматама рьвяйсема тинь стирентень лангс, и карматама эряма мархтонт, и тяфта тиефтяма фкя ломаньтналкс.17Но кда тинь аф кулхцондсамасть и аф тихтяда киськопень керома, эста минь сявсаськ стиреньконь и тутама».18Синь валсна тусть Емморонь и Сихем цёранц мяльс.19Цёрась пингть ашезе тарксе, тиезе сянь, мезе мярьгсть, сяс мес сон пяк кельгозе Иаковонь стиренц. А Сихемонь валоц сембода пяк лувовсь алянц кудса.
20Еммор и сонь цёрац Сихем састь ошень ортатненди и кармасть корхтама ошсост эряй алятненди. Синь мярьгсть:21«Ня ломаттнень мяльсна ладязь эрямс минь мархтонк. Катк синь эряйхть тя модаса и якайхть ланганза, вдь тя модаса саты васта тейстка. Минь карматама рьвяйсема синь стирьснон лангс, и эсь стиреньконь карматама макссемост тейст.22Но ня ломаттне кармайхть эряма минь мархтонк и тиевихть мархтонк фкя ломаньтналкс, аньцек кда сембе минь аляньке улихть керфт, кода синьге керфт.23Эста синь стадасна, уликс-паросна и сембе жуватасна улихть миннет. Кда аньцек тихтяма мяльснон коряс, синь кармайхть эряма мархтонк».24И сембе алятне, конат пуромкшнесть ошень ортатнень ваксс, кулхцондозь Емморонь и сонь цёранц Сихемонь. Тяфта, ошень сембе алятненди тифоль киськопень керома.
25Колмоце шиня, мзярда синь нинге сярядсть, Иаковонь кафта цёранза, Симеон и Левий, Динань брадонза, сявозь торснон, мезьдонга аф пелезь врьгятсть ошть лангс и шавозь сембе алятнень.26Синь шавозь торса Еммороньге и сонь цёранц Сихемонь, сявозь Динань Сихемонь кудстонза и тусть.27Тяда меле Иаковонь цёранза састь шавфненди и салсезь ошснон, сяс мес сазорсна ульсь вятьф оцю визьксс.28Синь сявозь ошэряйхнень учаснон и сяваснон, траксснон и букаснон, ишимснон и сембоснон, мезьсна ульсь ошса и паксяса.29Синь сявозь полонц сембе синь козяшиснон, сембе идьснон и рьваснон. Синь салсезь семботь, мезе ульсь куттнень потмоса.
30Эста Иаков мярьгсь Симеононди и Левиенди: «Тинь ускоде лангозон зиян, тиемок монь аерксокс сембе эряйхненди тя модаса, ханаанейхненди и ферезейхненди. Монь кржа ломаньдон, а кда нят кочкавихть марс и врьгятихть лангозон, эста шавсамазь монь и сембе монь кудонь ломаннень».31Но Симеон и Левий мярьгсть каршезонза: «А мес синь тисть сазороньконь мархта, кода усксеви ава мархта?»
Глава 34