Выбрать язык
Книги Ветхого Завета
Книги Нового Завета
с русским текстом1Мзярда Иаков содазе: Египетса ули сёра, сон мярьгсь цёранзонды: «Месть тинь ванонттада фкя-фкянь лангс?»2Сон нинге мярьгсь: «Мон кулине, Египетса ули сёра. Арда тоза и рамада тоста тейнек сёра, эста ляттама шиса и аф кулотама».3Иосифонь кемонь брадонза тусть Египету сёронь рамама.4Но Вениаминонь, Иосифонь брадонц, Иаков ашезе куче лия браттнень мархта, сяс мес сон мярьгсь: «Афоль лисе мархтонза кальдяв».5Израилень цёранза састь сёронь рамама лия ломаттнень мархта, сяс мес Ханаанонь модаса ульсь вачаши.
6Иосиф ульсь тевонь вятикс Египетонь масторса. Сон мишендсь сёра ся масторонь сембе ломаттненди. Иосифонь брадонза састь и сюконясть тейнза модать самс.7Мзярда Иосиф няезень эсь брадонзон, сон содазень синь, но ашезь няфте пря, корхтась мархтост казямста, бта аф содасыне. Сон мярьгсь: «Коста тинь саде?» Синь мярьгсть: «Ханаанонь модаста. Минь саме ярхцамбялень рамама».8Иосиф содазень эсь брадонзон, а синь ашезь сода сонь.9Иосиф лятфтазень ононзон, конатнень няендезень синь колгаст, и мярьгсь тейст: «Тинь салава якай-ваны ломаттяда*а. Тинь саде содамс тя масторть лафча ширензон».10Синь мярьгсть тейнза: «Аф, азороньке, тонь покодихне састь ярхцамбялень рамама.11Минь сембонь фкя аляньке, и минь виде вайме ломаттяма. Тонь покодихне мзярдонга ашельхть салава якай-ваны ломанькс».12Но Иосиф мярьгсь тейст: «Аф, тинь саде содамс тя масторть лафча ширензон».13Синь мярьгсть: «Минь эздонк, тонь покодидот, кемгафтува брад. Минь сембонь фкя аляньке, кона эряй Ханаанца. Ёмла брадоньке лядсь кудса аляньконь мархта, а фкясь аш ни шиса».14Но Иосиф мярьгсь тейст: «Кода мон и мярьгонь: тинь салава якай-ваны ломаттяда.15Вага кода варжатядязь тинь: мон варан фараонть эряфса, тинь аф лисефтяда тяста, мзярс аф сай тяза тинь ёмла брадонте.16Кучесть фкять эздонт, катк сон вятьсы тяза брадонтень, а тинь, лиятне, ляттада пякстамгудса. Эста панжеви: видеть тинь азость, али аф. Но кда аф видеть азость, эста варан фараонть эряфонц мархта, тинь салава якай-ваны ломаттяда».17И Иосиф озафтозень синь пякстамгуду колма шинди.
18Колмоце шиня Иосиф мярьгсь тейст: «Мон Шкайда пели ломанян. Вага мезе тиеда, и ляттада шиса:19кда тинь афкукс виде вайме ломаттяда, эста катк фкясь эздонт ляды тязк, пякстамгудса, а тинь арда ускость сёроть куду вачеда ломанентенди.20Тяда меле вятесть тейне эсь ёмла брадонтень и мон няйса: тинь аф васькафнетяда, и эста аф кулотада». Синь тяфта и тисть.21Синь корхнесть эсь ётковаст: «Виде, минь муворуфтама сянкса, мезе тиеме брадоньконди. Минь няеськ, кода ризнась Иосифонь ваймоц, мзярда сон эняльдсь ужяльдемс сонь, но минь ашеськ кулхцонда сонь, и тянкса минь сатомазь тя ризфсь».22Рувим мярьгсь каршезост: «Дяряй мон ашень корхне тейнть, тяда тиенде пеже цёрать каршес? Но тинь ашемасть кулхцонда. Тяни минь кядьстонк вешеви сонь вероц».23Синь ашезь сода – Иосиф шарьхкодьсы корхтамаснон, сяс мес сон корхтась мархтост ётафты вельде.24Иосиф лиссь тоста и аварьгодсь. Меле сон мрдась тейст и корхтась мархтост. Сон мярьгсь сявомда ёткстост Симеононь и ингольдест сотозе сонь цинзерса.
25Иосиф кошардсь пяшкодемс кяскавснон сёроса, а сиянь ярмакснон меки путомс эрть кяскавозонза, и максомс тейст ярхцамбяль ки лангс. Тяфта и тисть мархтост.26Браттне путозь сёроснон ишимснон лангс и тусть тоста.27Мзярда синь лоткасть вень ётафтома, фкясь эздост кармась панжемонза кяскавонц, ёрась таргамс ишимонцты сёра, и аньцек юксозе кяскав кургть – лангса няезе сиянь ярмаконц.28Сон мярьгсь эсь брадонзонды: «Тейне мрдафтозь ярмакозень, ваность, сон кяскавсон». Синь пянкшт мольсть седисна, и эводембачк корхтасть фкя-фкянди: «Мезе Шкайсь тись мархтонк?»
29Мзярда синь мрдасть аляснонды, Иаковонди, Ханаанонь модав, синь азондозь тейнза семботь, мезе лиссь мархтост. Синь мярьгсть тейнза:30«Тона масторонь оцюнясь корхтась мархтонк пяк казямста и лувомазь минь салава якай-ваны ломанькс.31Но минь мярьгоме тейнза: "Минь виде вайме ломаттяма и мзярдонга ашеме уле салава якай-ваны ломанькс.32Минь эздонк кемгафтува брад, сембонь минь фкя аляньке. Фкясь эздонк аш ни шиса, а ёмлась тяни аляньконь мархта Ханаанонь модаса".33Эста ся масторонь оцюнясь мярьгсь тейнек: "Вага кода содаса, виде вайме ломаттяда али аф: катк фкясь эздонт ляды мархтон, а тинь сявость сёроть и арда ускость куду вачеда ломанентенди,34и вятесть тейне ёмла брадонтень. Тяфта мон содаса: тинь аф салава якай-ваны ломаттяда, но виде вайме ломаттяда. Эста мон мрдафтса тейнть брадонтень, и мярьган тейнть аф пелезь мишендемс-рамсемс тя масторса"».
35Мзярда браттне ушедсть шамнемост кяскавснон, эрсь эсь кяскавсонза музе сиянь ярмаконц. Ярмакть няемста, синцьке, алясновок пяк эводсть.36Иаков алясна мярьгсь тейст: «Тинь инксонт сявондевихть монь цёране. Иосиф аш, Симеонга аш, и тяни Вениаминоньге ёрасасть сявомс. Сембе кальдяфне прасть монь лангозон».37Рувим мярьгсь алянцты: «Кда мон меки аф вятьса тейть Вениаминонь, эста тон маштат шавомс монь кафта цёранень. Макск цёрацень кядезон, и мон мрдафтса сонь тейть».38Но Иаков мярьгсь: «Монь цёразе аф моли мархтонт; сонь брадоц кулось, и сон ськамонянза лядсь. Кда ки лангса мархтонза лиси кодамовок кальдяв, эста тя ризфть мархта тинь пачфтьсасть монь шаржу*б прязень калму».
*а 42:9 салава якай-ваны ломань – соглядатай, шпион
*б 42:38 шаржу – седой
Глава 42