Выбрать язык
Книги Ветхого Завета
Книги Нового Завета
с русским текстом1Азорсь мярьгсь Моисеенди: «Ватт, Мон путыхтень тонь Шкайкс фараонти, а Аарон брадце ули тонь пророкце:2тон азсак семботь, мезе Мон мярьган азомда, а Аарон брадце мярьги фараонти: катк сон нолдасы Израилень ломаньтналть эсь масторстонза.3Но Мон кевонзафтса фараонть седиенц, и хуш Мон тисайне Египетонь масторса ламоц дивань тяштьксонень и дивань тевнень,4фараонць сяка аф кулхцонттядязь тинь. Эста Мон кеподьса Эсь кядезень Египетть лангс и оцю суттнень вийса лихтьса Эсь ушмовиезень, Израилень ломаньтналозень, Египетонь масторста.5Мзярда Мон кеподьса Эсь кядезень Египетть лангс и лихтьса тоста Израилень ломаньтналть, эста Египетонь ломаттне содасазь: Мон Азорсь».6Моисей и Аарон тисть стане, кода Азорсь кошардозень синь.7Моисеенди ульсь кафксогемонь киза, а Аарононди кафксогемонь колма, мзярда синь корхтасть фараонть мархта.
8Азорсь мярьгсь Моисеенди и Аарононди:9«Кда фараонць мярьги тейнть: "Тиеда дивань тев", эста тон, Моисей, мярьк Аарононди: "Сявк байдекцень и ёрдак сонь фараонть инголи", – байдексь тиеви куйкс».10Моисей и Аарон састь фараонти и тисть стане, кода кошардозень Азорсь. Аарон ёрдазе эсь байдеконц фараонть и сонь покодиензон инголи, и байдексь тиевсь куйкс.11Эста фараонць тердсь смузюфт-содайхть и колдутт, и Египетонь колдуттне эсь колдувамаснон вельде тиезь сякоть:12эрсь эздост ёрдазе байдеконц, и эрь байдексь тиевсь куйкс. Но Аарононь байдекоц нилезень синь байдекснон.13Фараонть седиец сякокс кевонзась, и кода Азорсь азозе – сон ашезень кулхцонда синь.
14Азорсь мярьгсь Моисеенди: «Фараонть седиец кевонзаф, сонь аш мялец нолдамс ломаньтналть.15Ванды шобдава мольхть фараонти и, мзярда сон лиси ведти, арак кинц лангс Нилть трваса, и сявк кядезт байдекть, кона тиендевсь куйкс.16Мярьк фараонти: "Азорсь, еврейхнень Шкайсна, кучемань монь азомс тейть: Нолдак Монь ломаньтналозень, катк сон сюконяй Тейне шавмодаса. Но тон тянемс ашить кулхцонда Сонь.17Тяфта корхтай Азорсь: Мон Азорсь. Тон содасак тянь ва мезьста: мон вачкодян тя байдекса, кона кядьсон, Нил ляйть веденц ланга, и ведсь тиеви веркс.18Калхне ляйса кулыхть, ляйсь шинияй, и Египетонь ломаттне кармайхть туткодома эздонза симома"».19Азорсь мярьгсь Моисеенди: «Мярьк Аарононди: "Сявк байдекцень и венептьк сонь египтяттнень ведьснон шири: ляйхнень, шудерькснень, эрьхкнень и эрь кодама васттнень шири, коса ули ведь, – и синь тиевихть веркс. Версь кармай улема сембе Египетонь масторса, эрь шуфтонь и кевонь кукшеньцонга"».
20Моисей и Аарон тисть стане, кода кошардозень Азорсь. Аарон кеподезе байдеконц фараонть и сонь покодиензон сельминголе, вачкодезе мархтонза Нилть веденц, и сембе ведсь ляйса тиевсь веркс.21Калхне ляйса кулость, ляйсь шиниясь и египтяттненди ашель кода симомс сонь ведьтонза. Версь ульсь сембе вастова Египетса.22Но Египетонь колдуттневок эсь колдувамаснон вельде тиезь тякоть, и фараонть седиец кевонзась, и сон ашезень кулхцонда Моисеень и Аарононь, кода и мярьгсь Азорсь.23Фараонць шарфтсь эздост и тусь куду. И тявок ашезе тока сонь седиенц.24А сембе египтяттне кармасть шувондома Нил ляйть ваксса лихтибрят, вешендсть симомс кондясти ведь, сяс мес Нилонь ведьта ашель кода симомс.
25Ётась сисем шит сяда меле, кода Шкайсь гастязе ляйть.
Глава 7