Выбрать язык
Книги Ветхого Завета
Книги Нового Завета
с русским текстом1«Вагот койхне-ладяфксне, конат тейть эрявихть пачфтемс Израилень ломаттненди:
2Кда рамат евреень уре, катк сон покоди лангозт кота кизот, а сисемце кизоня катк туй воляшис питнень апак пантт.3Кда сон сась ськамонза, катк ськамонза и туй; а кда рьвяяфоль, эста катк мархтонза туй рьвацка.4Но кда азороц макссь тейнза рьвя, и рьвясь шачфтсь тейнза цёрат али стирьхть, эста катк рьвясь и иттне лядыхть азоронцты, а уресь туй воляс ськамонза.5Но кда уресь мярьги: "Мон кельгса азорозень, рьвязень и иднень, и монь аш мялезе тумс воляс", –6эста катк азороц вятьсы сонь Шкайть инголи*а – ладясы кенкш али кенкш касякть ваксс – и пяльсы пиленц урняса. Эста сон ляды тейнза урекс пефтома пингс.
7Кда кие мисы стиренц урекс, эста ся стирсь аф туви воляс, кода тушендыхть лия уретне.8Кда стирсь аф туй азоронц мяльс, кона ёразе сявомс сонь рьвакс, эста катк азороц мярьги лиятненди рамамс тя стирть. Но азорти аф мярьгондеви мимс сонь лия масторонь ломаненди, сяс мес сонць аердазе стирть.9Кда азорть мялец сявомс стирть рьвакс эсь цёранцты, эста катк вятьсы прянц мархтонза кода эсь стирензон мархта.10Кда азорсь сяви эстейнза нинге фкя рьвя, эста тейнза аф мярьгондеви кирьфнемс васень рьванцты ярхцамбяльть, щамонь максомать и мирдень-рьвянь пингть.11Но кда сон аф тисыне тейнза ня колмотнень, эста катк авась туй эздонза ярмаконь апак пантт».
12«Кие эрьхтьсы ломанть сяшкава, нльне сон кулы, ся максома куломас.13Но кда эрьхтить ашель мялец шавомс, а Шкайсь макссь тянди лисемс сонь кядензон вельде, эста Мон ладян ширесот васта, коза ворьгодема шавити.14А кда ломанць салава и кяжень арьсезь шавсы маластонненц, эста алтарезеньге ваксста сявк сонь куломас.
15Кие эрьхтьсы алянц али тядянц, ся эряви максомс куломас.
16Кие салай ломань и мисы сонь, али салафть мусазь кядьстонза, эста салайсь максома куломас.
17Кие кальдявста корхтай алянц али тядянц колга, ся эряви максомс куломас.
18Кда ломаттне сялгадыхть эсь ётковаст, и фкясь эрьхтьсы омбоцеть кевса али мокшендаса, и ся аф кулы, но аф стяви вастстонза,19эста, кда сон стяви и байдек вельде кармай лисендема кудста, эрьхтись аф максома куломас. Катк аньцек панды ся пингть инкса, мзярда пиксфсь аф покоди, и максы ярмак пчкафтоманди.20А кда кивок эрьхтьсы байдекса уренц али авауренц, и синь кулыхть сонь кядьтонза, эста ся эряви наказамс.21Но кда синь фкя али кафта шит нинге эряйхть, эста куломаснон инкса аф эряви наказамс, сяс мес синь азорть уликсоц.
22Кда алятне тюрембачк эрьхтьсазь пеки авать, и сон ёрдасы иденц, но сонць авась аф токави, эста эрьхтить кядьста сявома питне, конань ладясы авать мирдец. И тя питнесь тейнза пандома сянь коряс, кода мярьги судсь.23А кда авась токави, эста ваймонкса катк максыхть вайме,24сельмонкса – сельме, пеенкса – пей, кяденкса – кядь, пильгонкса – пильге,25пидеманкса – пидема, арженкса – аржа, токаф вастонкса – токаф васта.
26Кда кие эрьхтьсы уренц али авауренц сельмоти и токасы сельмонц, эста катк сельмоть инкса нолдасыне синь воляшис.27И кда кие синнесы уренц али авауренц пеенц, катк нолдасыне синь воляшис пейть инкса».
28«Кда букась куломс кячкордьсы*б алять али авать, эста букась эряви шавомс кевса и сивольдонза аф ярхцамс. Но букать азороц аф мувору тянкса.29А кда букась инголивок ульсь кячкорди, и азороц, содамок тянь, ашезь вана буканц мельге, и букась шавозе алять али авать, эста букась шавома кевса, и азороцка максома куломас.30Кда букань азорть кядьста анайхть питнень пандома, эста катк сон пандсы питнеть, конань ладясазь, и тяфта сон идесы эсь эряфонц.31Тяка койть коряс тиема, кда букась кячкордьсы цёрашабать али стирьшабать.32А кда букась кячкордьсы уреть али авауреть, эста катк букань кирдись панды колмогемонь сиянь шекель уретнень азорснонды, а букась шавома кевса.
33Кда кие панжи али шуви лотка, и аф пякстасы сонь, и тоза прай бука али ишим,34эста лоткть азороц катк панды сиянь ярмак жувататнень азорснонды, а жуватать ловажанц катк кадсы эстейнза.
35Кда киньге букац куломс кячкордьсы лиять буканц, эста катк синь мисазь кячкорди букать, и питненц явсазь кафтова. Тяконь лаца кулоф букатьке катк явсазь кафтова.36Но кда ульсь содаф: букась инголивок ульсь кячкорди, но азороц ашезь вана мельганза, эста катк азорсь макссы эсь буканц, и тяфта пандсы кулоф букать питненц. А кулоф букать катк сявсы эстейнза».
*а 21:6 Тя вастть ули лия шарьхкодемацка: «судьятнень инголи».
*б 21:28 кячкордемс – забодать
Глава 21