Выбрать язык
Книги Ветхого Завета
Книги Нового Завета
с русским текстом1«Тердить Израилень ломаньтналста Аарон брадцень и сонь цёранзон: Надавонь, Авиудонь, Елеазаронь и Ифамаронь. Катк синь улихть Тейне озксвятикс.2Тик Аарон брадцти иняру щапт, катк синь улихть оцюшинь и мазышинь няфтемакс.3Кошардыть тя тевса маштыхнень, конатнень Мон пяшкодине смузьшинь ваймопожфса, катк синь стайхть Аарононди иняру щапт. Тя щамса сон максови озксвятемань покодемас и арай Тейне озксвятикс.4Вагот щапне, конат тейст эрявихть стамс: мяштелангакс, инголькс, вярдень паля*а, алгань кувака панар*б, кона кодаф иляназонь сюреста, прянь ашкотфкс*в и каркс. Катк синь тиихть иняру щапт Аарон брадцти и сонь цёранзонды. Улест синь Тейне озксвятикс.5Катк стайхне сявихть зрня, валда-сенем, якстерь и шобда-якстерь понань сюрет, и пяльтьф иляназонь сюрет,6и мазыста кодайхть инголькс, нолдамок тевс зрня, валда-сенем, якстерь и шобда-якстерь понань сюрет и пяльтьф иляназонь сюрет.7Кафцьке пяльде лафтубряса катк улихть кирдемат, конатнень вельде инголькссь кармай кирдема.8Ингольксть ланга щафневи каркссь катк ули тиф ингольксть лаца и фкя сяка пяльксста: кодаф зрняста, валда-сенем, якстерь и шобда-якстерь понань сюреста и пяльтьф иляназонь сюреста.9Сяфть кафта питни кевнят-оникст, и лангозост керыть-сёрмадыть Израилень цёранзон лемснон:10кота лепнень васенце кевнять лангс и лия кота лепнень омбоце кевнять лангс, шачема пингснон коряс.11Сёрмадыть Израилень цёранзон лемснон ня кафта кевнятнень лангс стане, кода кевонь керсись кевста тии тяштьксонь путома. Тонгить ня кевнятнень зрнянь лотконятнень потмос.12Кемокстайть ня кафта кевнятнень ингольксть лафтубрянзон лангс: ня кефне кармайхть лятфнема Израильть цёранзон колга. Катк Аарон каннесыне синь лемснон лафтубрянзон лангса кода лятфнембяль Азорть инголе.13Тик зрняста лотконят14и зрнянь кафта уськт. Тиить уськнень, кода пяльтьф пикскя, и кемокстайть синь лотконятненди».
15«Тик судонь мяштелангаксть маштозь. Тик сонь стане жа, кода ингольксть: зрняста, валда-сенем, якстерь и шобда-якстерь понань сюреста и пяльтьф иляназонь сюреста.16Катк сон ули ниле ужа мархта, кафтонь крда мянтьф, фкя кядьлувонь*г кувалмоса и фкя кядьлувонь келеса.17Щафтт лангозонза ниле рядга питни кевнят. Васенце рядса, фкя-фкянь маласа, катк улихть: рубин, топаз, изумруд;18омбоцеса: бирюза, сапфир и алмаз;19колмоце рядса: яхонт, агат и аметист;20и нилецеса: хризолит, оникс и яшма. Синь сембе тонгомат зрнянь лотконяс.21Тяфтама кевняда катк ули кемгафтува – Израилень цёранзон лемснон коряс – и катк эрь кевть лангса ули лем. Эрь кевняса, кода тяштьксонь путома лангса, катк ули керф-сёрматф фкя лем кемгафтува юропнень эзда.22Тик мяштелангаксти зрнянь пяльтьф уськт, конат улихть тифт-кодафт пикскя лаца.23Тяфта жа тик мяштелангаксти зрнянь кафта суркст и кемокстайть ня суркснень мяштелангаксть вярдень кафта ужа пензонды.24Кемокстайть кафта зрнянь уськнень сурксненди, конат ащихть мяштелангаксть ужа пензон лангса,25а уськнень омба песнон – кафта лотконятненди, и кемокстайть синь ингольксть лафтубрянзонды, инголь пяльде.26Тик нинге кафта зрнянь суркст и кемокстайть синь мяштелангаксть алдонь ужа пензонды, веляньбяльдень ширде.27Тик нинге кафта зрнянь суркст и кемокстайть синь инголь пяльде ингольксть лафтубрянь кафцьке пензон ала, ся вастса, коса синь стафт ингольксти, карксть вельхксса.28Катк мяштелангаксть алдонь сурксонзон кемокстасазь ингольксть сурксонзон мархта валда-сенем пикскяняса: улеза сон ингольксть карксонц вельхксса и кирделезе мяштелангаксть: афоль нюрьге ингольксть ланга.29Иняру васту сувамста Аарон кармай каннемост Израилень цёранзон лемснон судонь мяштелангаксса, седиенц ваксса. Тя фалу ули лятфнембялькс Азорть инголе.30Судонь мяштелангаксть потмос тонгить уримть и туммимть*д, катк синь улихть Аарононь седиенц ваксса, мзярда сон кармай сувсема иняру вастти Шкайть шамаликонц инголи. Тяфта Аарон кармай каннемост Израилень ломаттнень судендамбяльснон седиенц ваксса Азорть инголе».
31«Тик вярдень паля, конань ланга кармай щафневома инголькссь. Вярдень палять марнек тик валда-сенем понань сюреста.32Кучкасонза катк ули прянь тонгомс варя, и тя варять перьфке нолдак котфонь каеркс, стама, кодама ваксарщамса*е, – афоль сязендев вярдень палясь.33Вярдень палять эленц перьфке тик марьнят валда-сенем, валда-якстерь, якстерь и шобда-якстерь сюреста. Марьнятнень ёткова тик зрнянь пайгонят сембе эльть перьфке:34зрнянь пайгоня и марьня, зрнянь пайгоня и марьня, и тяфта вярдень палять сембе эленц перьфке.35Тя щамсь ули Аарононь лангса, мзярда сон кармай покодема иняру кошса. Катк пайгонятнень кальдердемасна кулеви, мзярда Аарон кармай сувсема иняру вастти Азорть шамаликонц инголи и мзярда кармай лисендема тоста, афток сон кулы.
36Тик ару зрняста вадяв коняфкс, и керхт лангсонза валхт, кода керсихть тяштьксонь путомать лангса: "Азорть иняруяфоц".37Сотк сонь валда-сенем тюсонь карькскаса прянь ашкотфксть ингольце пяльксонцты.38Тя вадяв коняфкссь ули Аарононь конясонза и кармай няфнема: Аарон сявсыне эсь лангозонза ломаньтналть эрь кодама афсатыксснон, конатнень Израилень ломаттне тиендьсазь иняру озксказнетнень кандомста. Катк тя коняфкссь фалу ули Аарононь конясонза, улест Израилень ломаттнень озксказнесна Шкайть мяленц коряс.
39Стак шуваня иляназста Аарононди алгань кувака панар и прянь ашкотфкс, и тик сёрма мархта каркс.40Аарононь цёранзондывок кодак алгань кувака панархт, тейстка тик каркст и прянь ашкотфкст – катк улихть оцюшинь и мазышинь няфтемакс.41Щафтыть ня щапнень Аарон брадцень и сонь цёранзон лангс. Ладяйть синь покодемас, вадемок вайса, и иняруяфтыть, катк синь улихть Тейне озксвятикс.42Стак тейст плманжа видьге иляназонь понкст, тязаст штафтов визькс вастсна.43Катк Аарон и сонь цёранза щакшнесазь ня понкснень, мзярда кармайхть сувсема васедемань кошу, али мзярда маладыхть озксказнень кандома алтарти иняру вастса озксвятиень покодемать тиемста, афток таргайхть эсь лангозост пеже и кулыхть. Тя ладяфкссь максф пефтома пингс Аарононди и сембе сонь уноконь-уноконзонды».
*а 28:4 Вярдень паля – тя щам, конань озксвятихне щакшнезь алгань панарть ланга, но ингольксть алга; верхняя риза.
*б 28:4 алгань кувака панар – хитон
*в 28:4 прянь ашкотфкс – тяса: озксвятихнень пря щамсна; тюрбан, кидар
*г 28:16 Кядьлув – тя ётка оцю сурть и вяшкянять ёткса, мзярда сурхне келептьфт.
*д 28:30 Урим и туммим – синь вельдест ёрясть жерьба и кизефнезь Азорть мяленц.
*е 28:32 ваксарщам – броня, кольчуга
Глава 28