Выбрать язык
Книги Ветхого Завета
Книги Нового Завета
с русским текстом1Азорсь мярьгсь Моисеенди: «Туда тяста, тон и ломаньтналсь, конань тон лихтить Египетонь масторста. Арда ся модав, конань колга Мон варань Авраамонди, Исааконди и Иаковонди, мярьгомок: "Тонь юромонь поладыхненди Мон максса сонь".2Мон кучан тонь инголет ангел и паньцайне ханаанейхнень, аморрейхнень, хеттейхнень, ферезейхнень, евейхнень и иевусейхнень.3Сон вяттядязь тинь ся модати, коса шуди лофца и медь. Но Монць аф карман молема мархтонт, афток Мон машфттядязь тинь ки лангса, сяс мес тинь каршек моли ломаттяда».4Мзярда ломаньтналсь кулезень ня кяжи валхнень, синь аварьгодсть и кивок изь щафта эсь лангозонза пилькст-месть.5Вдь Азорсь мярьгсь Моисеенди: «Мярьк Израилень ломаньтналти: "Тинь каршек моли ломаттяда, и кда Мон хуш аф ламос молелень мархтонт, Мон машфтоледязь тинь. Валхтость лангстонт мазолгофтомантень и Мон ванца, мезе Тейне тиемс мархтонт"».6Израилень ломаттне валхтозь эсь лангстост мазолгофтоматнень Хорив пандть ала, и оду ни ашезь щафне синь.
7Моисей стяфтсь эстейнза аф оцю кош Израилень ломаньтналть лоткама вастонц эзда ширеса и лемдезе сонь васедемань кошекс. Эрсь, кие вешендезе Азорть мяленц, сашендсь васедемань кошти, кона стяфтфоль ломаньтналть лоткама вастонц эзда ширеса.8Фалу, мзярда Моисей лисендсь васедемань кошти, сембе ломаттне стякшнесть, и эрсь арсесь эсь кошенц сувама вастонц ваксс и ванць Моисеень мельге кошть потмос сувамозонза.9Мзярда Моисей сувсесь кошть потмос, эста валгондсь коволонь орва и арсесь кошть сувама вастонц видеса, и Азорсь корхнесь Моисеень мархта.10Мзярда сембе ломаньтналсь няезе коволонь орвать, кона валгондсь кошть сувама вастонц видес, синь сембе стякшнесть и сюконякшнесть эсь кошезост сувама вастть ваксса.11Азорсь корхнесь Моисеень мархта сельмода сельмос, кода ломанць корхни эсь ялганц мархта. Сяльде Моисей меки мртцесь ломаньтналть лоткама вастозонза. А сонь покодиец Иисус, Навинонь цёрац, од алясь, ашезе кадонда васедемань кошть.
12Моисей мярьгсь Азорти: «Вага, Тон корхтат тейне вятемс тя ломаньтналть, но ашить панжа, кинь кучсак мархтон. Тон мярьготь тейне: "Мон лац содате тонь, и тон сатыть Монь пара мялезень".13Кда мон афкукс сатыне Тонь пара мяльцень, эста эняльдян, панжить тейне Эсь китнень: тянь вельде мон содате Тонь и сяда товга карман сатнемонза Тонь пара мяльцень. Лятфтак: тя ломаньтналсь Тонне».14Азорсь мярьгсь: «Мон Монць молян тонь инголет и ваймафтте тонь».15Моисей мярьгсь Тейнза: «Кда Тон аф молят мархтонк, эста тямасть лихне тяста.16Мезьста лияста содави: Тонь мяльце ладяф тейне и ломаньтналцти? Дяряй аф сянь эзда: Тон молят минь мархтонк? Мезьста нинге няеви, монга, ломаньтналцевок кочкафттама масторлангонь лия ломаньтналхнень ёткста».17Азорсь мярьгсь Моисеенди: «Мон тиса сянь, мезень колга тон эняльдят, сяс мес Монь мялезе ладяф тейть и Мон лац содате тонь».18Моисей мярьгсь: «Эняльдян, няфтьк тейне Эсь иневалдцень».19Азорсь мярьгсь: «Мон ётафтса инголет сембе Эсь парошизень, и тонь инголет азса Азорть*а лемонц. Мон тиян пара сянди, кинди мялезе тиемс пара, и кельгозь ужяльдьса сянь, кинь мялезе кельгозь ужяльдемс».20Меле Сон мярьгсь: «Тон аф няйсак Монь шамазень, сяс мес ломанти аш кода няемс Монь шамазень и тяда меле лядомс шиса».21Азорсь мярьгсь: «Ватт, тяса вакссон ули васта. Стяк тя кевбандть лангс,22и мзярда вакскат ётай Монь иневалдозе, Мон путте тонь пандонь лазфс и вельхтяте кядьса, мзярс аф ётан.23Меле Мон сявса кядезень вельхксстот, и тон няйсамак Монь фталда, но шамазе аф кармай няевома».
Глава 33