Выбрать язык
Книги Ветхого Завета
Книги Нового Завета
с русским текстомСмузьшись тернесыне ломаттнень эстейнза
1Кулесть! Смузьшись терди
и ёнць кепсесы вайгяленц.
2 Ки трвань панда прятенди
и ки рашкненди сон стяшенды;
3 ошу вяти ортатнень инголе,
ошу сувама вастть ваксса сон юватькшни:
4 «Ломатть, мон эсонт тердян,
ломанень цёрат, кулесть монь вайгялезень!
5 Эряфонь аф содайхть, тонафнеда смузюста арьсема,
ёньфтомот, кочкада ётть.
6 Кулхцондода,
мон карман корхтама инь эрявиксть колга,
ся, мезе лиси монь кургстон – виде.
7 Монь кургозе пачфни видеши,
шкайфтома корхтамась нулготькс монь трваненди.
8 Сембе монь валне – тя видексшинь валхт,
синь эсост аш ёжуши и васькафнема.
9 Синь сембе шарьхкодевихть ёнюти,
и тёждят сятненди, кит музь содамошить.
10 Сияда питникс лувость монь тонафтомазень,
инь цебярь зрняда питникс – содамошитнень.
11 Вдь смузьшись жемчукта сяда пара,
мянь сявок, мезень колга арьси тонь седице, аф путови мархтонза ряцок.
12 Мон, смузьшись, эрян шарьхкодемать мархта,
содамошись и инголи арьсемась – тя монь ялгане.
13 Азорда пелемась – тя кяжти каршек ащема;
прянь няемать, шалхконь кепсемать,
зиянонь тиемать и васькафни корхтамать
мон афолине няе.
14 Монь кядьсон ёньц путомась и тевса сафтомась;
мон – шарьхкодемась, и монь кядьсон вийсь.
15 Монь вельден оцязорхне оцязорондайхть
и оцюнятне макссихть виде койхть.
16 Монь вельден азорондайхть оцюнятне,
прятне и сембе видексшинь судьятне.
17 Кит кельгсамазь монь, сятнень монга кельгсайне;
кит пяк вешендихть эсон, сят мусамазь.
18 Монь кядьсон козяшись и шнамась,
аф юмай уликсшись и сатфкссь.
19 Монь иможне зрняда сяда цебярьхть,
мянь сембодонга ару зрняда,
монь эздон лезкссь
инь питни сиять лезксонц коряс сядонга оцю.
20 Мон якан видексшинь киге,
виде судонь янга,
21 и сятненди, кит кельгсамазь монь, мон кадан оцю уликс
и пяшкодьсайне козяшинь кяшема утомснон.
22 Мон улень Азорть кядьса Сонь кинц*а ушетксста,
кунардонь пингста, мзярда Сон нинге мезевок ашезь тие.
23 Мон тифолень-ладяфолень кунардонь пингста,
ушетксста, масторлангть тиемдонза инголе.
24 Мон шачень потмаксфтома веттнень тиемдост инголе,
ведьса пяшкотьф лихтибрятнень эвондамдост инголе.
25 Мон шачень панттнень
и губорхнень стяфтомдост инголе,
26 мзярда Азорсь нинге ашезень тие аф модать, аф паксятнень,
аф масторонь васень пульнятнень.
27 Мон улень тоса, мзярда Сон аноклазень менельхнень,
мзярда Сон таргась китькс*б потмаксфтома веттнень вельхксса;
28 мзярда Сон кемокстазень вяре коволхнень,
мзярда нолдазень модапотмонь ведь шудерькснень;
29 мзярда Сон путсь оцюведти перяфкс,
тяст лисенде веттне перяфксонц вельф,
мзярда Сон ладязень-тяштькстазень модать юронзон.
30 Эста мон улень Сонь вакссонза, кода машты кядь ломань,
улень Тейнза эрь шинь кенярдемакс,
и апак лотксек кеняртькшнень Сонь инголенза.
31 Мон кеняртькшнень Сонь Масторонц*в лангса
и пара мяльса арьсень ломаттнень колга.
32 Сяс тяни, идне, кулхцондомасть монь.
Павазуфт сят, кит молихть монь киган!
33 Кулхцондость монь ёньц тонафтоманень и уледа смузюкс,
и тяда шарфне эздост.
34 Павазу ломанць, кона кулхцондсамань монь,
кона шиста шис ащи монь ортанень ваксса
и кона учи эсон кенкшенень инголе!
35 Кие монь мусамань, ся муй эряф,
и сатсы Азорть пара мяленц.
36 А кие ётай вакскан, ся канды зиян эсь ваймонцты:
сембе сят, кит афолемазь няе монь, кельгсазь куломать».
*а 8:22 али: тевонц
*б 8:27 Тяса корхтави горизонтть колга.
*в 8:31 Тяса корхтави Мастор планетать колга.
Глава 8