Выбрать язык
Книги Ветхого Завета
Книги Нового Завета
с русским текстом1Сяс, иняру кемай ялгат, конатненди минь мархтонк марса максовсь менелень тердемась, шарфтость сельмованфонтень Иисус Христосонь лангс. Минь сембонь инголе лемнесаськ Сонь Шкаень Кучфокс и Озксвятиень оцюнякс.2Шкайсь макссь Тейнза покодема, и Сон тиезе тя покодемать Шкайть мяленц коряс, кода Моисейге Шкаень кудса тиезе семботь Шкайть мяленц коряс.3Но Иисус лувови сяда оцюкс Моисеень коряс, тяфта жа кода и кудонь путысь-стяфтысь лувови сяда оцюкс тиф кудть коряс.4Эрь кудсь киньге кядьса путови, а Шкайсь путозе-стяфтозе семботь.5Моисей ульсь покодикс, кона тиендсь Шкайть мяленц коряс сембе Шкаень кудонь тефнень эса, и тейнза ульсь максф няфтемс сянь, мезе Шкайть мялецоль азомс сай пингонь эряйхненди.6А Христоссь – Шкаень Цёра и Шкаень кудть лангса Азор, кона тиенди Шкайть мяленц коряс. Сонь кудоц – тя минь, кда аньцек минь кемоста и педа-пес ванфтсаськ аф пелемашить и надиямать, конаса минь кенярдезь шнафттама пря.
7Сяс, кода корхтай Иняру Ваймопожфсь:
«Тячи, кда тинь кульхтяда Шкаень вайгяль,
8тясть калготкстофта седиентень,
кода ульсь варчсемань шиня шавмодаса,
мзярда тинь кропцяде Монь лангозон и моледе Тейне каршек.
9Тоса тинь алянте мольфнезь мялезень и варчсемазь Монь,
хуш няендезь Монь тевнень нильгемонь киза.
10Сяс Монь састь кяжне синь лангозост и мярьгонь:
"Синь седисна фалу бралги
и синь ашель мяльсна содамс Монь кинень".
11Сяс Мон кяженьбачк варань:
"Мзярдонга синь аф сувайхть Монь ваймама вастозон!"»*а
12Ванода, кемай ялгат, катк киньге эздонт аф ули кяжи и аф кемай седиец, и тяфта афоледе пота эряй Шкайть эзда.13Меколанкт, кемокснеда фкя-фкянь эрь шиня, мзярс нинге ули пинге мярьгомс «тячи». Катк киньге седиец аф васькафтови пежеса и аф калготкстоми тянкса.14Вдь минь суваме марстонь тевс Христость мархта, кда аньцек педа-пес кемоста ванфтсаськ ся кемамать, конац ульсь минь эсонк ушетксста.15Кода Сёрматфксса корхтави:
«Тячи, кда тинь кульхтяда Шкаень вайгяль,
тясть калготкстофта седиентень, кода ульсь ся пингть,
мзярда тинь кропцяде Монь лангозон и моледе Тейне каршек»*б.
16Кит ульсть сят, конат кулезь Сонь и ушедсть кропцяма? Кали аф сембе сят, конатнень Моисей лихтезень Египетста?17И кинь лангс Шкайсь ульсь кяжи нильгемонь киза? Кали аф сятнень лангс, конат сувасть пежес и конатнень пакарьсна илядсть шавмодаса?18И кинь каршес варась Шкайсь: мзярдонга аф сувайхть Сонь ваймама вастозонза? Кали аф сятнень каршес, конат ашесть кулхцонда?19И тяфта минь няйсаськ, синь ашесть сував ся ваймама вастти эсь аф кемамаснон инкса.
*а 3:7-11 Псалтирь 94:7-11
*б 3:15 Псалтирь 94:7-8
Глава 3