Выбрать язык
Книги Ветхого Завета
Книги Нового Завета
с русским текстом1Тяда меле мон кулень кайги вайгяль, бта пяк лама ломань морась менельса:
«Аллилуйя!
Идемась, шнамась, пара лувкссь и вийсь
минь Азороньконди,
2сяс мес видексшинь и афкуксонь Сонь судонза:
Сон судендазе ся инь оцю усксеви авать,
кона наксафнезе масторть эсь усксевомасонза.
Шкайсь пантфтозе кядьстонза шумоть
Эсь покодиензон верснон инкса».
3И омбоцеда моразевсть:
«Аллилуйя!
Палы ошть качамоц кеподи пефтома пингс».
4Эста комсь нилие атятне и ниле эряй ваймотне прасть и сюконясть Шкайти, кона озаф оцязоронь озама вастсонза, и мярьгсть:
«Аминь! Аллилуйя!»
5Оцязоронь озама вастть ширде кайгозевсь вайгяль, кона корхтась:
«Шкайть сембе покодиенза, шнасть Шкаеньконь,
сембе, кит ванцазь Сонь мяленц,
ёмланек-оцюнек!»
6Сяльде мон кулень бта пяк лама ломанень вайгяль, кона ульсь кода лама ведень увф и кода вии атямонь торама, сон корхтась:
«Аллилуйя!
Азор Шкайсь, Сембонь Кирдись, кармась оцязорондама!
7Эрь кенярттяма оцю кенярдемаса
и шнасаськ Шкаеньконь,
сяс мес сась Верозть рьвяямань илац,
рьвянясь аноклась пря ни.
8Шкайсь щазе сонь ару и пиндолды илянязонь щамса».
Иляназонь щамсь – тя Шкаень ломаттнень видексшинь тевсна.
9Ангелсь мярьгсь тейне: «Сёрматт: павазуфт сят, кит тертьфт Верозть рьвяямань илань каванямас». И нинге сон мярьгсь: «Нят Шкаень виде валхне».10Эста мон прань сонь пильгозонза тейнза сюконязь, но сон мярьгсь тейне: «Ватт, тяк тиенде тянь! Монга Шкаень покодиян, кодамат тон и тонь ялгатне, конат азондыхть Иисусонь колга. Шкайти сюконяк! И содак: Иисусонь колга азондомась – тя пророчендамань ваймопожф».
11Мон няень панжада менель и, вов, акша алаша и лангсонза ластя. Сонь лемоц Валонь Кирди и Виде, и Сон видеста судендай и тюри каршек ащихнень мархта.12Сонь сельмонза кода палы тол, прясонза пяк лама оцязоронь каштазда. Сонь ульсь лемоц, кона сёрматфоль лангсонза, конань кивок, Эстедонза башка, аф содасы.13Сон срхкафоль верса валф щамса и Сонь лемоц: «Шкаень Вал».14Мельганза акша алашаса ардсть менелень ушмовийхне, конат щафольхть ару и акша иляназонь щамса.15Ластять кургстонза лиси оржа тор, конаса Сон эрьхтьсыне ломаньтналхнень, и Сон кармай ваномост синь кшнинь байдекса. Сон люпшнесы виноградонь люпштама лоткса Сембонь Кирди Шкайть кяжса лакай винанц.16Щамонц лангса, пукша видесонза, тяштьф лем: «Оцязорхнень Оцязорсна и азорхнень Азорсна».
17Мон няень фкя ангел, кона ащесь вяре шить лангса и ювадсь сембе нармоттненди, конат лийсть вярдень менельге: «Сада, кочкавода Шкаень оцюдонга оцю каванямати!18Сада ярхцама кулоф оцязорхнень сивольдост, ушмовятихнень и ушматтнень сивольдост, алашатнень и ластятнень сивольдост – сембонь сивольдост: воляшистотнень и уретнень, оцюфнень и ёмлатнень!»
19И мон няине кяжи жуватать и масторлангонь оцязорхнень, и синь ушмовийснон. Синь пуромфтольхть марс и срхкафнесть тюрема алаша лангса Ластять и Сонь ушмовиенц каршес.20Кяжи жуватась кундафоль, а мархтонза аф афкуксонь пророкське, кона тиендсь кяжи жуватать инголе дивань тяштькст и васькафтозень сятнень, кит путфтозь эстейст кяжи жуватать тяштьфксонц и сюконякшнесть сонь ликонцты. Кяжи жуватась и аф афкуксонь пророксь живста ульсть ёрдафт юрнай палыкандоронь эрьхкти.21Лядыхне шавфтольхть Ластять торса, кона лиссь кургстонза. И сембе нармоттне топодемс ярхцасть синь сивольдост.
Глава 19