Выбрать язык
Книги Ветхого Завета
Книги Нового Завета
с русским текстом1Пузэз паньгатэм яке кизянэз вандэм пиосмурт Кузё-Инмарлэн калыкез пӧлы пырыны уг быгаты.2Азыса-калгыса улӥсь кышномуртлэн пиез Кузё-Инмарлэн калыкез пӧлы пырыны уг быгаты, дасэтӥ ёзэз-выжыез но Кузё-Инмарлэн калыкез пӧлы пырыны уг быгаты.3Аммон калык, моав калык пӧлысь адями Кузё-Инмарлэн калыкез пӧлы пырыны уг быгаты, дасэтӥ ёзэз-выжыез но пумтэм вапумъёс ӵоже Кузё-Инмарлэн калыкез пӧлы пырыны уг быгаты,4малы ке шуоно, Египетысь лыктыкуды, соос тӥледыз сюрес вылысен нянен, вуэн ӧз пумиталэ, тонэ карган понна, тыныд пумит мыныны Месопотамияысь Пефор городысь Веорлэсь Валаам пизэ уксё тырыса вайизы;5нош Инмаред Кузё-Инмар Валаамлэсь верамзэ санэ ӧз поны, тынад Инмаред Кузё-Инмар Валаамлэсь карганзэ тонэ бакель каронлы пӧрмытӥз, уго Инмаред Кузё-Инмар тонэ яратэ.6Вань улон нуналъёсыд ӵоже, пумтэм вапумъёсы соослы каньыллык, ӟечлык эн сӥзьы.7Идумей калыкез кулэтэм эн кары, уго соос тынад агай-вынъёсыд; эн палэнскы египет калыклэсь, уго тон соослэн музъемазы мыныса улӥд;8куинетӥ ёзысен-выжыысен кутскыса соослэн вордскем нылпиоссы Кузё-Инмарлэн калыкез пӧлы пырыны быгато.
9Тушмонъёсыдлы пумит ожен мыныкуд, вань аламалэсь-уродлэсь утиськы.10Кинэд ке уйин кидысэз кисьтӥськыса саптаськиз ке, со мурт станлэн сьӧраз кошкыны кулэ, станэ пырыны уг яра,11нош ӝыт вуыку, [мугорзэ] вуэн миськыны кулэ, шунды пуксем бере со станэ пырыны быгатэ ини.12Педло потаны ветлон интыды станлэн сьӧраз луыны кулэ;13ожмаськон тӥрлыкед сяна, лопаткаед луыны кулэ, педло потан интыяд [гоп] гудӟы, педло потад ке, со гоптэ сюен ӵокса;14уго Инмаред Кузё-Инмар тонэ мозмытон но тушмонъёстэ [тынад киулад] сётон вылысь станэд пушкытӥ ветлэ, соин ик тынад станэд дун-чылкыт луыны кулэ, тон дорысь Со нокыӵе но юрӟым макеосты медаз адӟы но тон дорысь медаз палэнскы.
15Кузёез дорысь тон доры пегӟем ляльчиез кузёезлэн киулаз эн ни сёты.16Тон дорын со мед улоз, тӥ пӧлын, улон интыосты пӧлысь кудзэ ке но аслыз улыны бырйиз ке, кытын солы кельшиз, отын [мед улоз]; сое ёртыса-ӝикатыса эн возь.
17Израиль нылъёс пӧлын азыса-калгыса улӥсьёс луыны кулэ ӧвӧл, израиль пиос пӧлын но азыса-калгыса улӥсьёс луыны кулэ ӧвӧл.18Ныллэсь азыса-калгыса поттэм дунзэ (коньдонзэ) но, айы пуныез вузаса поттэм дунэз (коньдонэз) но нокыӵе но сӥзиськонъёсты быдэстыку, Инмаредлэн Кузё-Инмарлэн корказ пыртыны уг яра, уго соиз но, таиз но Инмаред Кузё-Инмар азьын юрӟым макеос луо.
19Барыш поттон вылысь, бадӟымгес дун басьтыны малпаса, азвесьтэ но, няньдэ но, мукет мадэ ке но агай-выныдлы пунэмен эн сёты;20мурт музъемысь вуэм муртлы пунэмдэ барыш поттон вылысь сётыны быгатӥськод, нош агай-выныдлы пунэмен сётыкуд, барыш поттыны малпаса эн сёты, Инмаред Кузё-Инмар тонэ бакель мед кароз, киулады басьтыны мыноно музъемад киыныд лэсьтӥськись вань ужъёсты бакель мед кароз.
21Инмаред Кузё-Инмар азьын кыл сётӥд ке, чик ӝегатскытэк сое быдэсты, уго Инмаред Кузё-Инмар сётэм кылыдлэсь быдэсмемзэ юалоз, тон вылын сьӧлык луоз;22тон кыл ӧд ке сёты, соку тон вылын сьӧлык уз луы.23Кылысьтыд-ымысьтыд мар потӥз, сое чакла-уть, быдэсты озьы, кызьы тон ас мылкыдыдъя Инмаред Кузё-Инмар азьын сӥзиськид, со сярысь аслад кылыныд-ымыныд кыл сётыса верад ук.
24Матысь муртэдлэн виноград бакчаяз пырид ке, кӧтыд тырытозь мульыоссэ сиыны быгатӥськод, кӧня сиемед потэ – си, нош сосудад соосты эн бича.25Матысь муртэдлэн арано ана вылаз лыктӥд ке, шепъёсты киыныд ишка, нош сюрлодэ матысь муртэдлэн ана вылаз эн пырты.
Глава 23