Выбрать язык
Книги Ветхого Завета
Книги Нового Завета
с русским текстом1Саул выжыен Давид выжы куспын кема дыр ӵоже тэрытэк улон вал. Давид кужмогес но кужмогес луиз, нош Сауллэн выжыез ялан лябӟиз но лябӟиз.
2Давидлэн Хевронын [куать] пиосыз вордскизы. Нырысь Изреельысь Ахиноама кышноезлэсь Амнон вордскиз,3кыкетӥзэ пизэ, Далуияез, вайиз Авигея, Кармилысь Наваллэн азьвыл кышноез; куинетӥ пиез – Авессалом, сое вайиз Гессур эксэйлэн, Фалмайлэн, Мааха нылыз;4ньылетӥ пиез – Адония, Аггифалэн нуныез; витетӥез – Сафатия, Авиталалэн нуныез;5куатетӥ пиез – Ифреам, Давидлэн Эгла кышноезлэн ваем нуныез. Давидлэн таосыз пиосыз Хевронын вордскизы.
6Саул выжыен Давид выжы куспазы тэрытэк улон дыръя Авенир Саул выжы пала пырыса улӥз.7Сауллэн ляльчи кышноез вал, Айялэн Рицпа нимо нылыз. [Со доры Авенир пыриз. Иевосфей] Авенирлы шуиз: «Малы тон атаелэн ляльчи кышноез доры пырид?»8Иевосфейлэн кылъёсызлы Авенир туж вожзэ поттыса шуиз: «Мон – пуны йыр шат? Иуда выжылы пумит мыныса, мон та виын Саул выжыез – атайдэ, солэсь агай-вынъёссэ, солэсь эшъёссэ – гажаса-жаляса улӥ, тонэ Давид киулэ ӧй сёты, нош тон али кышномуртлы луыса сьӧлыкъёсме утчаса улӥськод.9Инмар Авенирлы сое но сое мед лэсьтоз, эшшо троссэгес но мед лэсьтоз! Кызьы Кузё-Инмар Давидлы кыл сётӥз, озьы ик мон солы лэсьто [та нуналэ ик]:10Саул выжылэсь эксэй луонзэ талало но Давидлэсь эксэй пуконзэ быдэс Израиль вылэ, Иудея вылэ но пукто, Дан музъемысен Вирсавияозь».11Иевосфей Авенирлы пумит кыл вераны ӧз быгаты, уго солэсь со кышка вал.
12Авенир Давид доры, [солэн улон интыяз, Хевронэ], адямиоссэ тазьы вераны ыстӥз: «Кинлэн та музъемез?» Эшшо тазьы шуыны: «Монэн кусып кылдыты, соку вань израиль калыкез ас палад берыктон понна мынам киы тыныд юрттоз».13[Давид] шуиз: «Умой. Мон тонэн кусып кылдыто, но одӥгез пумысен тонэ курисько – монэн адӟиськыны лыктыкуд, Сауллэсь Мелхола нылзэ сьӧрад ӧд ке вайы, мынэсьтым ымнырме уд адӟы».14Соку Давид Сауллэн Иевосфей пиез доры адямиоссэ ыстӥз тазьы шуыны: «Сёт мынэсьтым Мелхола кышноме, сое мон сю филистим пиослэсь йылзэ вандэм поннам басьтӥ».15Иевосфей адямиоссэ Лаишлэн Фалтий пиез дорысь Мелхолаез басьтыны ыстӥз.16Кышноез бӧрсьы картэз но мынӥз, сое Бахуримозь бӧрдыса келяз; Авенир солы шуиз: «Дорад берт». Со дораз бертӥз.
17Израильысь тӧроослы Авенир тазьы шуыса вазиськиз: «Толон но, толон валлян но тӥляд Давидэз асьтэлы эксэй каремды потэ вал.18Табере сое быдэстэ, уго Кузё-Инмар Давидлы шуиз: ”Аслам Давид ляльчиелэн киыныз Мон Аслэсьтым израиль калыкме филистим калыклэн, солэн мукет вань тушмонъёсызлэн кизылэсь утё”».19Авенир Вениамин выжыысь пиослы но тазьы ик вераз. Израильлэсь, быдэс Вениамин выжылэсь мылкыд каронзэс Авенир Хевронэ Давидлы вераны мынӥз.20Авенир кызь адямиосыныз ӵош Хевронэ Давид доры лыктӥз, Авенирез но соин ӵош лыктэмъёсты куно карыса, Давид юондыр ортчытӥз.21Авенир Давидлы шуиз: «Султыса мыно но кузёе, эксэе, доры вань израиль калыкез люкало, соос тонэн кусып кылдытозы, соку тон кызьы лулыдлы-сюлмыдлы кельше, ваньмызлы соослы эксэй луод». Давид Авенирез лэзиз, со каньыл мылкыдын кошкиз.
22Тани, Давидлэн медоосыз Иоавен ӵош ожмаськыны ветлӥзы, бӧрсязы трос талам ваньбур вайизы; нош Авенир Давидэн огазьын Хевронын ӧй ни вал, уго Давид сое лэзиз но со каньыл мылкыдын кошкиз.23Иоав но соин ӵош ветлэм ожгарчиос берытскем бере Иоавлы веразы: «Авенир, Нирлэн пиез, эксэй доры вуылӥз, со сое лэзиз но соиз каньыл мылкыдын кошкиз».24Соку Иоав эксэй доры лыктыса шуиз: «Мар тон лэсьтӥд? Тани, тон доры Авенир вуылӥз; малы тон сое кошкыны лэзид?25Тон тодӥськод Нирлэсь пизэ Авенирез: со тонэ ӧрекчаны ветлӥз, потондэ, пырондэ тодыны ветлӥз, – тодыны ваньзэ, мар тон лэсьтӥськод».26Иоав Давид дорысь потӥз но Авенир бӧрсьы уйиськисьёсты ыстӥз; Давидлэсь юатэк, сое Сӥра гудӟем дорысен берыктӥзы.27Авенир Хевронэ берытскем бере Иоав сое пуш капка пыр нуиз – лушкемен вераськыны шуыса кадь, нош отысен сое кӧтаз бышкалтыса вииз. Иоавлэн Асаил братэзлэн вирыз понна Авенир кулӥз.
28Бӧрысьгес та сярысь кылыса, Давид шуиз: «Нирлэн Авенир пиезлэн вирыз понна мон но, мынам эксэйлыке но Кузё-Инмар азьын пумтэм вапумъёс ӵоже янгыш ӧвӧл;29со Иоавлэн йырыз вылэ, солэн атаезлэн быдэс выжыез вылэ мед усёз; Иоавлэн выжыез ноку но медаз кыльы кидысэз кисьтӥськись, я гижлочерен висись, я боды вылэ пыкиськыса ветлӥсь, я меч улэ погрась, я няньлы ёрмыса улӥсь мурттэк».30Иоав Авесса братэныз ӵош Авенирез виизы Гаваон дорын ожмаськон дыръя соослэсь Асаил братсэс вием понна.
31Иоавлы но соин огазьын сылӥсь вань адямиослы Давид шуиз: «Дӥсяндэс кесялэ но чурыт бышкись дӥськут дӥсялэ, Авенирез жаляса бӧрдэ». Давид эксэй сое келяса мынӥз.32Авенирез Хевронэ ватыку, солэн шайгу вылаз эксэй бадӟым куараен бӧрдӥз; вань калык бӧрдӥз.
33Авенир понна бӧрдыса, эксэй тазьы шуиз: «Таӵе укылтэм кулонэн кулоно вал-а Авенирлы?34Киосыд думылэмын ӧй вал, пыдъёсыд но сьӧлтамын ӧй вал, нош тон усид йырвандӥсьёслэн погыртэмзы кадь». Сое жаляса, вань калык эшшо но золгес бӧрдыны кутскиз.
35Нуназе куазьын калык Давидлы сиыны нянь ӵектыны кутскиз, но Давид кыл сётыса шуиз: «Инмар мыным озьы но, озьы но мед кароз, эшшо золгес но мед кароз, шунды пуксьытозь нянь куртчи ке, яке мукетсэ мае ке оскалтӥ ке».36Та сярысь вань калык тодӥз но та солы кельшиз, эксэй мар гинэ ӧз лэсьты, ваньмыз калыклы кельшиз.37Со нуналэ вань калык, быдэс Израиль тодӥз, Нирлэсь Авенир пизэ виён эксэй дорысь ӧз поты шуыса.38Эксэй аслаз медоосызлы шуиз: «Тодӥськоды-а, та нуналэ Израильын азьветлӥсь, бадӟым пиосмурт кулӥз шуыса?39Мон ляб на, эксэе вӧйын зырӟыса пуктэмын ке но, нош та адямиос, Саруялэн пиосыз, мынэсьтым кужмоесьгес; Кузё-Инмар урод уж лэсьтӥсьлы уродэн пунэмзэ мед берыктоз!»
Глава 3