Выбрать язык
Книги Ветхого Завета
Книги Нового Завета
с русским текстом1Та бере Авессалом аслыз ожмаськон уробоос, валъёс, витьтон егит мугор утисьёсты басьтӥз.2Авессалом, ӵукна вазь ик султыса, кар капка дурысь сюрес вылэ султылӥз но, кин ке но, кинэн ке тэрытэк улыкуз, эксэй доры судэ мынэ ке вал, Авессалом сое дораз ӧтьыса юалляз: «Кыӵе городысь тон?» Со мурт шуэ ке: «Израильлэн сыӵе-сыӵе выжыысьтыз тынад ляльчиед»,3соку Авессалом солы шуылӥз: «Тани, тон ӟеч, шонерлыко уж малпамед, но эксэй дорын тонэ нокин но уз кылзы».4Авессалом шуылӥз: «Э-э, та музъеме монэ ке судьяе пуктысалзы! Соку мон доры лыктысал котькудӥз ӝоже усем, шонерлык утчась мурт, мон соосты шонерлыко судить карысал».5Кин ке со доры лыктыса йыбырттэ ке, со, киоссэ пасьтана вӧлъяса, со муртэ ӟыгыртыса чупалляз.6Эксэй доры судэ лыктэм вань израиль пиосын Авессалом тазьы вырылӥз, израиль пиослэн сюлмазы пырыны быгатылӥз.
7Давидлэн эксэйын пукемезлы ньыльдон ар тырмем бере Авессалом эксэйлы шуиз: «Мыно, Хевронысен Кузё-Инмарлы сӥзиськонме быдэсто;8уго мон, тынад ляльчиед, Сирияысь Гессурын улыкум, кыл сётӥ: Кузё-Инмар монэ Иерусалиме берыктӥз ке, мон Кузё-Инмарлы курбон сёто».9Соку эксэй солы шуиз: «Мын каньылэн». Со султӥз но Хевронэ мынӥз.10Вань Израиль выжыос пӧлы Авессалом лушкем чакласькисьёсты ыстӥз но шуиз: «Гумы куараез кылӥды ке, шуэлэ: Хевронэ Авессалом эксэе пуксиз».11Авессаломен ӵош Иерусалимысь солэн ӧтем кык сю адямиосыз мынӥзы, нокыӵе кескич малпанъёстэк, ужпумлэсь пуштроссэ валатэк мынӥзы.12Курбон сётыку, Авессалом Гило карысь Давидлэсь визь-кенеш сётӥсьсэ Ахитофелэз, Гило пиез, ӧтьыса вайиз. Кужмо пумитъяськон кылдыны кутскиз, Авессалом доры трос калык вуыны кутскиз, тросгес но тросгес соос луизы.
13Давид доры ивор вайись вуыса шуиз: «Израиль калыклэн сюлмыз Авессалом пала берытскиз».14Соку Давид ас бордаз улӥсь Иерусалимысь вань медоосызлы шуиз: «Султэлэ, ойдолэ пегӟоме, Авессалом асьмелы улыны маза уз сёты; дыртэлэ, кошкыны мед вуомы, асьмеды медаз суты, медаз киулты, асьме вылэ курадӟонъёс медаз вутты, городмес мечен медаз кора».15Эксэй медоос эксэйлы шуизы: «Кызьы кулэ эксэймылы, кузёмылы, озьы мед луоз, ми – тынад ляльчиосыд».16Эксэй, со бӧрсьы вань семьяосыз пыдын потӥзы. Дас ляльчи кышнооссэ юртсэ возьманы кельтӥз.17Эксэй потӥз, пыдын мынӥсь калык но, Беф-Мерхат доры вуыса, соос дугдӥзы.18Вань медоосыз мыд-мыд палтӥз мынӥзы, вань хелефейёс, вань фелефейёс, Гефысь соин ӵош лыктэм ог куать сю мурт эксэйлэн азьпалтӥз мынӥзы.19Гефысь Еффейлы эксэй шуиз: «Малы тон но милемын ӵош мынӥськод? Берытскы, соиз эксэй борды кариськы, тон мурт музъемысь адями ук, ас интыысьтыд татчы лыктоно луид;20толон тон лыктӥд, нош туннэ милемын ӵош мыныны косӥсько? Мон мынӥсько отчы, кытчы пӧрмоз; берытскы, ас сьӧрад агай-вынъёстэ но берыкты; Кузё-Инмар тыныд гажан-жалянзэ, шонерлыксэ мед возьматоз!»21Эксэйлы ответ сётыса, Еффей шуиз: «Улэп Кузё-Инмар, эксэй но, мынам кузёе, кема мед улоз; эксэй, мынам кузёе, котькытын со мед луоз – отын ик луоз тынад ляльчиед – кулоно ке но луиз».22Соку Давид Еффейлы шуиз: «Озьыен, ойдо ветлы мон сьӧрын». Гефысь Еффей, солэн вань адямиосыз, соосын ӵош ветлӥсь вань нылпиос но со бӧрсьы мынӥзы.23Быдэс музъем бадӟым куараен бӧрдӥз. Вань калык выжиз, эксэй но Кедрон ӧр сьӧры выжиз; вань калык, [эксэй но], кыр дуннее нуись сюрес кузя вамыштӥз.
24Тани Садок [священник], соин ӵош вань левитъёс но [Вефараысь] Инмарлэн сӥзён-косонэныз Инмар ковчегез нуыса пуктӥзы; нош Авиафар, вань калык городысь потытозь, вырйылын сылӥз.25Эксэй Садоклы шуиз: «Инмарлэсь ковчегзэ берен городэ ну, [ас интыяз ик со мед сылоз]. Кузё-Инмарлэсь гажан-жалян басьтӥ ке, Со монэ Иерусалиме берыктоз, соку Со мыным луонлык сётоз ковчегез но солэсь возиськон интызэ адӟыны.26Нош Со тазьы шуиз ке: ”Ӟеч мылкыдме тыныд уг возьматы, тонэ кулэ уг кары”, соку тани мон: мар Солы кулэ, мед лэсьтоз».27Соку эксэй Садок священниклы шуиз: «Адӟиськод-а, каньылэн городэ берытскы, Ахимаас пиед но, Авиафарлэн Ионафан пиез но, асэныды ӵош кыкез но пиосты городэ мед берытскозы.28Тодэ, тӥ дорысь мыным ивор вуытозь, мон кыр дуннеысь нёжалын возьмаса уло».29Садокен Авиафар Инмарлэсь ковчегзэ Иерусалиме ваем бере соос отын улӥзы.
30Нош Давид Елеон гурезе тубиз, бӧрдыса вамышъяз; йырыз шобыртэмын вал; со гольык пыд мынӥз, соин ӵош мынӥсьёс ваньзы йырзэс шобыртӥзы, бӧрдыса мынӥзы.31Давидлы ивор вуттыса шуизы: «Пумитъяськисьёс пӧлын Ахитофел но Авессаломен огазьын». Давид шуиз: «[Инмаре] Кузё-Инмаре! Ахитофеллэсь визь-кенешсэ медаз быдэсъялэ».32Давид гурезь йылэ тубем бере отын со Инмарлы йыбыртъяса улӥз, тани, солэн пумитаз Архи выжыысь Хусий, Давидлэн эшез, лыктэ; дӥськутэз кесямын, йыр вылаз сюй пызьнамын.33Давид солы шуиз: «Тон монэн ӵош мынӥд ке, мыным секыт луоз;34нош городэ берытскыса, Авессаломлы шуид ке: ”Эксэй, [тынад агай-вынъёсыд но, атаед эксэй но мон вӧзтӥ кошкизы, табере] мон тынад ляльчиед; [монэ улэп кельты], та дырозь мон тынад атаедлэн ляльчиез вал, нош табере тынад ляльчиед луи”, соку тон мон понна озьы лэсьты: Ахитофеллэсь визь-кенешъёссэ медаз быдэсъялэ.35Тани, отын тонэн ӵош Садок но Авиафар священникъёс, эксэй юртысь кыӵе ке ивор кылӥд, ваньзэ Садокен Авиафар священникъёслы вера.36Отын, соосын огазьын соослэн кык пиоссы луозы: Садоклэн Ахимаас пиез но Авиафарлэн Ионафан пиез; кыӵе гинэ ивор уд кылэ, ваньзэ соос пыр мыным ыстэлэ».37Хусий, Давидлэн эшез, городэ вуиз; со виын Авессалом Иерусалиме пыре вал.
Глава 15