Выбрать язык
Книги Ветхого Завета
Книги Нового Завета
с русским текстом1Пизэ улӟытэм кышномуртлы Елисей шуиз: «Султы, мын, тон но, семьяед но ул отын, кытын улыны быгатод, уго Кузё-Инмар сютэм улонэз ӧтиз, со та музъем вылэ лыктоз сизьым арлы».2Со кышномурт султӥз но Инмар адямилэсь верам кылзэ быдэстӥз; со кошкиз, солэн семьяез но, Филистим музъемын сизьым ар улӥз.3Сизьым ар ортчем бере та кышномурт Филистим музъемысь берытскиз но эксэй доры корказэ, бусызэ курыны мынӥз.
4Эксэй со дыре Инмар адямилэн медоеныз Гиезиен вераськыса улэ вал, со шуиз: «Вера ваньзэ, мар ӟечсэ лэсьтӥз Елисей».5Кулэм муртэ улӟытэмез сярысь Елисей эксэйлы вераса улон дыръя пизэ улӟытэм кышномурт коркаез сярысь, бусыез сярысь юалляськиз. Соку Гиезий шуиз: «Эксэй кузёе, та самой со кышномурт, та самой со пи, кинэ Елисей улӟытӥз».6Эксэй кышномуртлэсь юаз, кышномурт солы вераз. Эксэй юртын одӥгзэ ужасьсэ солы сётыса, эксэй шуиз: «Маиз солэн вал, ваньзэ берыктэ; бусызэ кельтыса кошкем дырысеныз туннэ нуналозь отысь поттэм вань табышсэ берыктэ».
7Сириялэн Венадад эксэез висьыку, Елисей Дамаске лыктӥз. Венадад эксэйлы таӵе ивор вуттӥзы: «Инмар адями татчы лыктӥз».8Эксэй Азаиллы шуиз: «Кияд кузьым кут но Инмар адямилэн пумитаз пот, со пыр Кузё-Инмарлэсь юа: ”Та висёнлэсь мон бурмо на-а?”»
9Азаил солэн пумитаз мынӥз, саламзэ кияз кутӥз, Дамаскын мар вал умоез, ньыльдон верблюдъёс мае нуыны быгато, кутӥз но, Инмар адями доры лыктыса, азяз султӥз но шуиз: «Тынад пиед Венадад, Сириялэн эксэез, монэ тон доры юаны лэзиз: ”Та висёнлэсь мон бурмо на-а?”»10Елисей солы шуиз: «Мын, вера солы: ”Бурмод”. Но Кузё-Инмар мыным усьтӥз: со кулоз».11Елисей синмыныз со шоры мертчиськиз, озьы со кемозь со улӥз: соиз кепыр вайыны кутскиз. Инмар адями бӧрдыны кутскиз.12Азаил вераз: «Малы мынам кузёе бӧрдэ?» Со шуиз: «Израиль пиослы азьланяз кыӵе урод ужъёс лэсьтондэ тодыса; изкаръёссэс тылын сутод, егит пиоссэ мечен виылод, нонӥсь нуныоссэс быдтылод, нуны ваёно кышнооссэс коралод».13Соку Азаил шуиз: «Таӵе бадӟым ужъёсты лэсьтыны быгатон понна кин мон тынад ляльчиед, мон [кулэм] айы пуны ук?» Елисей шуиз: «Кузё-Инмар мыным возьматӥз, Сириялы тон эксэй луод».
14Елисей дорысь кошкыса, аслаз кузё-эксэез доры вуиз. Та солы шуиз: «Елисей мар тыныд вераз?» – «Тон бурмод, со шуиз».15Нош мукетаз нуналэ шобрет басьтыса сое вуэн коттӥз но солэн ымныр вылаз понӥз, собере со кулӥз. Со интые Азаил эксэе пуксиз.
16Израильлэн Ахав эксэезлэн Иорам пиез витетӥ арзэ эксэйын пукыку, Иудеялэн Иосафат эксэез бере эксэе пуксиз Иосафатлэн Иорам пиез.17Эксэе пуксьыкуз, солы куамын кык арес вал; тямыс ар ӵоже со Иерусалимын эксэй пуконын пукиз.18Израильысь эксэйёслэн сюрес вылтӥзы ветлӥз, кызьы лэсьтэ вал Ахавлэн выжыез, малы ке шуоно Ахавлэн нылыз солэн кышноез вал, Кузё-Инмар азьын ярантэм ужъёс лэсьтыса улӥз.19Но Аслаз ляльчиезлы Давидлы луыса Кузё-Инмарлэн Иуда выжыез быдтэмез уг поты вал; Со кыл сётӥз нылпиосыз пыр пумтэм вапумъёс ӵожелы солы югдытӥсь лампада сётыны.
20Солэн кивалтон аръёсаз Иуда выжылэн киулысьтыз Едом кошкиз, соос асьсэлы эксэй пуктӥзы.21Иорам Цаире кошкиз, вань ожмаськон уробооссэ сьӧраз нуиз; уйин султыса сое котыртӥсь идумей ожгарчиосты погыртӥз, ожмаськон уробоослэсь кивалтӥсьёссэс но, нош калык балаганъёсаз пегӟиз.22Та нуналозьлы но Едом Иуда выжылэн киулысьтыз кошкыса улэ. Со дыре ик ӝутскиз Ливна но.
23Иорам сярысь, солэн вань мукет лэсьтэм ужъёсыз сярысь Иудей эксэйёслэн книгаязы гожтэмын.24Иорам кулӥз но, сое атайёсыныз одӥг интые, атайёсын огазе Давидлэн городаз, ватӥзы. Со интые пиез, Охозия, эксэе пуксиз.
25Израиль эксэйлэн Ахавлэн Иорам пиез дас кыкетӥ арзэ эксэйын пукыку, Иорамлэн Охозия пиез Иудеялы эксэе пуксиз.26Охозиялы кызь кык арес вал эксэе пуксьыкуз, одӥг ар со Иерусалимын эксэйын пукиз. Анаезлэн нимыз Гофолия, Израиль эксэйлэн, Амврийлэн, нылыз вал со.27Ахав выжылэн сюрес вылтӥз со ветлӥз, Ахав выжы кадь ик Кузё-Инмарлэн син азяз ярантэм ужъёс лэсьтыса улӥз, малы ке шуоно Ахав юртысь адямиосын со одӥг выжыысь вал.28Ахавлэн Иорам пиеныз ӵош со Сириялэн Азаил эксэезлы пумит Галаадысь Рамоф каре ожен мынӥз. Сирия пиос сое яраё каризы.29Сириялэн Азаил эксэеныз ожмаськыку, Сириялэн ожгарчиосызлэсь Рамофын яраё карем бервылзэс эмъяны Иорам эксэй берытскиз Изреельын эмъяськон понна. Иудеялэн эксэез, Иорамлэн Охозия пиез, Изрееле Ахавлэн Иорам пиез доры лыктӥз, уго со висе вал.
Глава 8