Выбрать язык
Книги Ветхого Завета
Книги Нового Завета
с русским текстом1Иудеялэн эксэезлэн, Охозиялэн, Иоас пиез кызь куинетӥ арзэ эксэйын пукыку, Самарияын Израильлы эксэе пуксиз Ииуйлэн Иоахаз пиез. Со дас сизьым ар ӵоже эксэй пуконын пукиз.2Со Кузё-Инмар азьын ярантэм ужъёс лэсьтыса улӥз, Израилез сьӧлыке пыртэм Наватлэн Иеровоам пиезлэн сьӧлыкъёсыз пӧлын ветлӥз, соослэсь ӧз палэнскылы.3Израиль вылэ Кузё-Инмарлэн вожпотонэз ӝуатскиз но соосты Сириялэн эксэезлэн, Азаиллэн киулаз, Азаиллэн Венадад пиезлэн киулаз сётылӥз.4Соку Иоахаз Кузё-Инмар азьын вӧсяськиз но, Кузё-Инмар сое кылӥз, малы ке шуоно Со адӟиз уго, кызьы израиль калыкез ӝикатыса возё, кызьы Сириялэн эксэез соосты ёртыса возе.5Со виын Кузё-Инмар израиль калыклы мозмытӥсь сётӥз, соос сирия калыклэн киулысьтыз потыны быгатӥзы. Израиль калык азьвыл кадь ик каньылэн балаганъёсаз улӥз.6Озьы ке но Израилез сьӧлыке пыртэм Иеровоам выжылэн сьӧлыкъёсызлэсь ӧз палэнскылэ; соос пӧлтӥ ветлӥзы, Самарияын вӧсяськон тыпы сурд сылӥз.7Иоахазлэн витьтон гинэ буш вал вылын ветлӥсь ожгарчиез кылиз, дас ожмаськон уробоез, дас сюрс пыдын ожмаськисьёсыз, кылемзэ Сириялэн эксэез быдтӥз, соосты пыдул сюйлы пӧрмытӥз.
8Мукетыз сярысь, мар лэсьтӥз Иоахаз, батырлыко ӟеч ужъёсыз сярысь Израиль эксэйёслэн книгаязы гожтэмын.9Иоахаз кулӥз но, сое атайёсыныз огазе Самарияе ватӥзы. Со интые эксэе пуксиз Иоас пиез.
10Иудеяысь эксэй пуконын Иоас куамын сизьыметӥ арзэ пукыку, Самарияын Израиль эксэе пуксиз Иоахазлэн Иоас пиез; со дас куать ар ӵоже эксэйын пукиз.11Кузё-Инмарлэн азяз со ярантэм ужъёс лэсьтыса улӥз, Израилез сьӧлыке пыртэм Наватлэн Иеровоам пиезлэсь сьӧлыкъёссэ одӥгзэ но лэсьтытэк ӧз кыльы, сьӧлыкаса улӥз.
12Мукетсэ, ваньзэ мае Иоас лэсьтӥз, солэн батырлыко ужъёсыз сярысь, кызьы со Иудеялэн Амасия эксэеныз жугиськиз, Израиль эксэйёслэн книгаязы гожтэмын.13Иоас атайёсыз кадь ик кулӥз, нош эксэй пуконэ Иеровоам пуксиз. Иоас Израильысь эксэйёсын огазе Самарияе ватэмын вал.
14Елисей висьыны кутскиз, та висёнэныз со кулӥз. Израильлэн эксэез Иоас со доры лыктыса бӧрдӥз но шуиз: «Эй, атае! Атае! Израильлэн ожмаськон уробоез, солэн ожмаськон валъёсыз!»15Елисей солы шуиз: «Кияд пукыӵ кут, ньӧлъёс кут». Со кияз пукыӵ, ньӧл кутӥз.16Израильлэн эксэезлы шуиз: «Кидэ пукыӵ вылэ пон». Со кизэ понӥз. Елисей аслэсьтыз киоссэ эксэйлэн киосыз вылэ понӥз.17Со шуиз: «Шундыӝужан палась укноез усьты». Со усьтӥз. Елисей шуиз: «Ыб». Иоас ыбиз. Елисей шуиз: «Та ньӧл Кузё-Инмар дорысь мозмытскон басьтон понна, та ньӧл Сириялэн киулысьтыз мозмытскон понна. Сириялэсь ожгарчиоссэ тон Афекын быдэсак погыртод».18[Елисей] солы шуиз: «Ньӧлъёстэ басьты». Со басьтӥз. Израильлэн эксэезлы Елисей шуиз: «Музъем вылэ шуккылы». Со куинь пол шуккиз но дугдӥз.19Инмар адями солы вожзэ поттыса шуиз: «Тыныд вить пол яке куать пол шукконо вал, соку тон Сириялэсь ожгарчиоссэ пыраклы погыртысалыд, нош табере куинь пол гинэ вормод Сириялэсь ожгарчиоссэ».
20Елисей кулӥз, сое ватӥзы. Вуонояз аре но та музъеме моав калыклэн ожмаськись уллёосыз вуизы.21Тазьы вал: кулэм муртэ ватыку, ожмаськыны лыктӥсь уллёез адӟыса, кулэм мурт ватӥсьёс со муртэз Елисейлэн шайгуаз куштӥзы но усьыкуз Елисейлэн лыосыз борды йӧтӥськиз, соку со улӟиз но пыд йылаз султӥз.
22Иоахазлэн вань кивалтон аръёсаз Сириялэн эксэез, Азаил, израиль калыкез ӝикатыса возиз.23Нош Кузё-Инмар соосты жаляз, сьӧлыкъёссэс куштӥз, соос пала кариськиз но Авраамен, Исаакен, Иаковен кутэм Солэн сӥзён-косонэз понна соосты быдтэмез ӧз поты, туннэ нуналозь но соосты Ас азьысьтыз ӧз палэнты.24Сириялэн Азаил эксэез кулӥз но, со интые пиез, Венадад, эксэе пуксиз.25Иоахазлэн Иоас пиез Азаиллэн Венадад пиезлэн киулысьтыз ожмаськыса басьтӥз городъёсты, кудъёссэ Иоахаз атаез дыръя ожен лыктыса киултӥз вал Сириялэн эксэез. Иоас куинь пол сое вормылӥз, Израильлэсь городъёссэ асьсэлы берыктӥз.
Глава 13