Выбрать язык
Книги Ветхого Завета
Книги Нового Завета
с русским текстом1Эксэйын пуконэзлэн укмысэтӥ араз, дасэтӥ толэзезлэн дасэтӥ нуналаз Вавилонлэн Навуходоносор эксэез вань ожгарчиосыныз ӵош Иерусалим доры вуиз но сое котыртӥз, солэн котыртӥз мудэт ӝутӥз.2Седекиялэн дас одӥгетӥ арзэ эксэйын пукытозяз город коыртэмын улӥз.3Толэзьлэн укмысэтӥ нуналаз сиёнлы туж ёрмыны кутскиз, та музъемын улӥсь калыклэн нянез быриз.4Городэз киултӥзы, вань ожгарчиос уйин капка пала нуись сюрес кузя, эксэй сад вӧзысь кык борддоръёс вискытӥ, пегӟизы; халдейёс город котырын сылӥзы, эксэй нёжал пала мынӥсь сюрес кузя кошкиз.5Халдей ожгарчиос эксэй бӧрсьы уйиськыса мынӥзы но Иерихон нёжалысен сутӥзы сое, вань ожгарчиосыз пегӟыса со дорысь кошкизы.6Эксэез кутӥзы но Ривлае Вавилон эксэй доры нуизы, отын солы суд лэсьтӥзы:7Седекиялэсь пиоссэ солэн азяз ик бышкаса виизы, нош ассэ Седекияез синтэм каризы но думылыса Вавилонэ нуизы.
8Витетӥ толэзе, толэзьлэн сизьыметӥ нуналаз, мукет сямен вераса, Вавилонлэн Навуходоносор эксэезлэн дас укмысэтӥ араз, Иерусалиме лыктӥз Вавилон эксэйлэн медоез, мугор возьмасьёслэн кузёйырзы Навузардан.9Со Кузё-Инмарлэсь корказэ, эксэй коркаез сутӥз, Иерусалимысь вань коркаосты но, ваньзэ бадӟымесь коркаосты тылын сутӥз.10Мугор возьмась кузёйырлэн ожгарчиосыз, халдей ожгарчиос, Иерусалим котырысь борддоръёсты но куашкатӥзы.11Городэ кылем мукет калыкез но, Вавилон эксэй киулэ сётӥськем адямиосты но мугор возьмасьёслэн кивалтӥсьсы Навузардан пленэ нуиз.12Мугор возьмасьёслэн кузёйырзы та музъеме кӧня ке гинэ куанер улӥсь калыкез виноград садъёсын ужаны, музъем гырыны кельтӥз.
13Кузё-Инмарлэн коркасьтыз ыргон юбоосты, пуктэтъёсты, Кузё-Инмарлэн коркасьтыз ыргон зарезез халдейёс тӥязы но Вавилонэ нуизы;14вӧсяськон дыръя кулэ луись тазъёсты, лопаткаосты, пуртъёсты, пуньыосты, вань ыргон тӥрлыкез но нуизы;15кадилоосты, чашаосты – соос зарнилэсь вал, азвесьлэсь вал, мугор возьмасьёслэн кузёйырзы басьтӥз;16кык юбоез, одӥг зарезез, Кузё-Инмарлэн корказ Соломонлэсь лэсьтэм пуктэтъёссэ, – вань та арбериосын ыргонэз лыдъянтэм трос вал.17Одӥгезлэн юболэн ӝуждалаез дас тямыс гырпум кузьда; вылаз ыргон венецез, со венецлэн ӝуждалаез куинь гырпум кузьда, сеткаез, венецлэн котыраз гранат улмоос – ваньмыз ыргонлэсь лэсьтэмын. Мукетызлэн сеткаен юболэн но сыӵе ик котырыз.18Соку мугор возьмасьёслэн кузёйырзы Сераия архиереез но Цефанияез, кыкетӥзэ священникез, куиньзэс, ӧс выжыын возьмаськыса сылӥсьёсты кутӥз.19Городысь одӥг ужась басьтӥз, со ожгарчиосын кивалтӥсь вал, эксэй азьын сылӥсь, городын улӥсь вить муртэ, армиысь подъясьёслэсь йырзэс, со та музъемысь калыкез армие гожъя вал, эшшо городэ учырам та музъемысь куатьтон муртэ.20Мугор возьмасьёслэн кузёйырзы Навузардан соосты кутӥз но Ривлае Вавилонлэн эксэез доры нуиз.21Вавилон эксэй соосты погыртӥз, Емаф музъемысь Ривлаын вииз. Иудейёсты ас музъемысьтызы уллязы.
22Нош Иудей музъеме кылемъёсын, кинъёсты отчы улыны кельтӥз Вавилонлэн Навуходоносор эксэез, – соосын кивалтыны Шафанлэсь Ахикам пиезлэсь Годолия пизэ пуктӥз.23Ожгарчиослэн вань кивалтӥсьёссы, соослэн адямиоссы кылӥзы, Вавилонлэн эксэез кивалтӥсе Годолияез пуктэм шуыса, соку соос Массифае Годолия доры лыктӥзы; соос пӧлын вал Нафаниялэн Исмаил пиез, Карейлэн Иоханан пиез; Танхумефлэн Сераия пиез, со Нетофафысь вал, Маахит карысь Иезания но соослэн адямиоссы.24Соослы но, соослэн адямиоссылы но Годолия йыбырттыса шуиз: «Халдейёслы тэрытскыса улонлэсь эн кышкалэ, та музъеме улыны интыяське, Вавилон эксэйлы ужалэ-тырше, соку тӥледлы умой луоз».25Нош сизьыметӥ толэзе татчы дас муртэн ӵош эксэй выжыысь Елишамалэн Нефания пиезлэн Исмаил пиез лыктӥз но Годолияез погыртӥз, сое вииз, озьы ик соин ӵош Массифаын улӥсь иудейёсты но, халдейёсты но.26Соку вань калык, пичиысен кутскыса бадӟымозь, ожгарчиослэн кивалтӥсьёссы но султыса Египетэ кошкизы, уго халдейёслэсь кышказы.
27Иудеялэсь Иехония эксэйзэ улыны ваем дырысен куамын сизьыметӥ араз, дас кыкетӥ толэзезлэн кызь сизьыметӥ нуналаз, Вавилонлэн эксэй пуконаз пуксён араз Евилмеродах Иудеялэсь Иехония эксэйзэ пытсэт коркась поттӥз но28гажан мылкыдын соин вераськиз, солэсь престолзэ Вавилонын соин ӵош улӥсь эксэйёслэн престолзылэсь вылэгес пуктӥз.29Пытсэтын пуконо дӥськутсэ воштӥз, вань улоно нуналъёсыз ӵоже Иехония со дорын сиськыса улӥз.30Сюдон-вордонэз эксэй солы сётъяз, ялан сюдӥзы-вордӥзы, нуналлы быдэ, вань улоно нуналъёсыз ӵоже.
Глава 25