Выбрать язык
Книги Ветхого Завета
Книги Нового Завета
с русским текстом2-тӥ книга
1Ыргонлэсь курбон сётон ӝӧк лэсьтӥз: кызь гырпум кузьдалаез, кызь гырпум пасьталаез, дас гырпум ӝуждалаез.2Ӵыжатыса зарезь лэсьтӥз – пумысеныз пумозяз дас гырпум – ваньмыз котырес, ӝуждалаез вить гырпум; куамын гырпумъем гозы сое котыртыны тырмиз.3Ошъёслы укшась ӵыжатыса кисьтэм макеос со улын котыр ласянь сылӥзы; дас гырпум кузьда зарезез котыр ласянь кык радэн сылӥсь ошъёс котыртыса сылӥзы, соос соин огазе кисьтэмын вал.4Со дас кык ошъёс вылын сылӥз: куинез уйпала учкыса сылӥз, куинез – шундыпуксён пала, куинез – лымшор пала, куинез шундыӝужан пала учкыса сылӥзы, нош зарезь соослэн вылӥязы; берынызы пуш пала кариськыса сылӥзы.5Зӧкталаез кикур зӧкта вал; дуръёсыз чашалэн выллем лэсьтэмын, сяськаеныз пушъем лилиялы укшало. Со пушкы ог куинь сюрс бат тэре.6Дас мисьтӥськон-гылтӥськон лэсьтӥз, витьсэ бурпалаз пуктӥз, витьсэ – паллян пала, – соос пушкын гылтыны мед луоз, тылын сутӥськись курбон сётон азьын соосты отын гылтылӥзы; нош зарезь – священникъёслы отын мисьтӥськон понна.7Дас зарни лампадаос лэсьтӥз, кызьы луыны кулэ; соосты храме пуктӥз: витьсэ бурпала, витьсэ – паллян пала.8Дас ӝӧк лэсьтӥз но соосты храме пуктӥз: витьсэ бурпала, витьсэ – паллян пала, сю зарни чашаос лэсьтӥз.9Вӧсяськон азбар лэсьтӥз, эшшо одӥг бадӟым азбар, азбаре пырон ӧсъёс лэсьтӥз, тунгонъёссэ ыргонэн шобыртӥз.10Зарезез бурпала пуктӥз, лымшорен шундыӝужан вискы.11Тазъёс, сускичъёс, чашаос [кадилоос, курбон сётыку вань кулэ сосудъёс] Хирам лэсьтӥз. Инмар коркан Соломон эксэйлы лэсьтоно ужъёссэ Хирам йылпумъяз:12кык юбо но соос вылысь чашалы укшась кык венецъёс лэсьтӥз, кык сетка юбоос йылысь венецъёсты шобыртыны;13кык сеткаос бордысь ньыль сю гранат улмоос; котькуд сеткалы кык радэн гранат улмоос; юбоос йылысь кык венецъёсты шобыртон понна лэсьтӥз.14Пуктонъёс лэсьтӥз, пуктонъёс вылэ мисьтӥськон-гылтӥськон арбериос лэсьтӥз;15одӥг зарезь но со улэ дас кык ош,16тазъёс, лопаткаос, вилкаос, – Хирам-Авий Соломон эксэйлы, Кузё-Инмар коркалы кулэ вань арбериосты чилясь ыргонлэсь лэсьтӥз.17Иордан ёросын, горд сюё музъемын, Сокхофен Цереда вискын, эксэй ыргонзэ ӵыжатӥз.18Вань та арбериосты Соломон туж трос лэсьтӥз, ыргонлэсь мертэтсэ ик ӧз тодэ.
19Инмар коркалы вань арбериосты озьы ик Соломон лэсьтӥз. Зарнилэсь курбон сётон ӝӧк, курбон нянь тырон ӝӧкъёс,20чылкыт зарнилэсь светильникъёс, лампадаоссэс пуктон-косонъя давир азьын ӝуатъян понна лэсьтӥз.21Сяськаос, лампадаос, чепыльтон кортъёс зарнилэсь, самой чылкыт зарнилэсь, лэсьтӥз,22пуртъёс но, вуэн пазянъёс но, эгыр тырон но, чашаос но чылкыт зарнилэсь, Святойлэсь но Святой интыысь ӧсъёсты, храмлэсь вӧсяськон интые нуись ӧсъёссэ зарнилэсь лэсьтӥз.
Глава 4