Выбрать язык
Книги Ветхого Завета
Книги Нового Завета
с русским текстом2-тӥ книга
1Ровоам Иерусалиме вуиз но, Иудаен Вениамин выжыысь бырйыса, сю тямыстон сюрс ожгарчиосты люказ Израилен ожмаськыны но эксэйлыкез Ровоам кие берыктон вылысь.2Инмар адямилы, Самейлы, Кузё-Инмар дорысь тазьы верам кыл вуиз:3«Соломонлэн пиезлы, Иудеялэн эксэезлы, Ровоамлы но Иудаен Вениамин выжыысь вань израиль калыклы тазьы шу:4”Тазьы шуэ Кузё-Инмар: эн но мынэ, агай-вынъёсыныды ожмаськыны но эн кутске; ваньды дорады бертэ, уго та Монэн лэсьтэмын”». Соос Кузё-Инмарлэсь верам кылъёссэ санэ понӥзы но Иеровоамлы пумит ожмаськон сюрес вылысь берытскизы.
5Ровоам Иерусалимын улӥз; Иудеяысь городъёсты со борддорен котыртӥз.6Со Вифлеемез, Ефамез, Фекояез юнматӥз,7озьы ик Вефцурез, Сохоез, Одолламез,8Гефез, Марешаез, Зӥфез,9Адораимез, Лахисэз, Азекаез,10Цораез, Аиалонэз, Хевронэз, кудъёсыз Иудаен Вениамин выжыослэн музъем вылазы интыяськемын вал.11Та изкаръёсты со юнматӥз но отчы кивалтӥсьёсты пуктӥз, ю-нянь, вӧй, вина возён кеносъёс лэсьтӥз.12Котькудаз городэ щитъёс, шибодыос сётӥз, городъёсты зол-зол юнматӥз. Со кие Иудаен Вениамин кылизы.
13Быдэс Израиль музъемысь, солэн вань люкетъёсысьтыз вань священникъёс, левитъёс со доры люкаськизы.14Левитъёс, город пумъёсысь музъемъёссэс, улон интыоссэс кельтыса, Иудеяе, Иерусалиме лыктӥзы, уго Иеровоам но солэн пиосыз соосты Кузё-Инмарлэн священникез луонлэсь куштӥз но15гурезь йылъёсын вӧсь ортчытӥсьёсты пуктӥз, вӧлыса лэсьтэм кечлы, такаослы, ошъёслы йыбыртъязы.16Нош соос бӧрсьы Израильлэн вань выжыосысьтыз чылкыт сюлэмоос Иерусалиме лыктылӥзы Израильлэсь Инмарзэ Кузё-Инмарез утчаны но атайёссылэн Инмарзылы Кузё-Инмарлы курбонъёс сётон понна.17Соос Иудалэсь эксэйлыксэ юнматӥзы но Соломонлэсь пизэ, Ровоамез, санэ поныса, куинь ар ӵоже улӥзы, вань та куинь аръёс ӵоже соос Давидлэн но Соломонлэн сюрессы кузя ветлӥзы.
18Ровоам Давидлэсь Иеромоф пиезлэсь Махалаф нимо нылзэ но Иессейлэсь Елиав пиезлэсь Авихаиль нылзэ кышно басьтӥз.19Солэн Иеус, Шемария но Загам пиосыз вордскизы.20Собере со Авессаломлэсь Мааха нылзэ кышнолы басьтӥз, солэн Авия, Аттай, Зӥза но Шеломиф пиосыз вордскизы.21Вань кышноосыз, ляльчи кышноосыз пӧлысь со тужгес но юн яратӥз Авессаломлэсь Мааха нылзэ, солэн дас тямыс кышноосыз но куатьтон ляльчи кышноосыз вал, кызь тямыс пиосыз но куатьтон нылъёсыз вордскизы.22Маахалэсь Авия пизэ Ровоам агай-вынъёсызлы кивалтӥсе пуктӥз, уго сое солэн эксэй каремез потэ вал.23Визьмын лэсьтӥз: вань пиоссэ Иудаен Вениамин выжыослэн музъем вылъёсазы интыяськем, вань юнматэм городъёсазы ыстӥз, ӟеч сюдӥз-вордӥз, соослы трос кышноос шедьтӥз.
Глава 11