Выбрать язык
Книги Ветхого Завета
Книги Нового Завета
с русским текстом2-тӥ книга
1Та бере моав пиос, аммон пиос, соосын ӵош Маон шаерын улӥсьёс пӧлысь куд-огъёсыз Иосафат вылэ ожен мынӥзы.2Лыктыса Иосафатлы ивор вуттӥзы но шуизы: «Тон вылэ зарезь сьӧрысь, Сирия дорысь, туж но туж трос калык лыктэ, тани соос Хацацон-Фамаре вуизы ни, мукет сямен вераса – Ен-Гедие».3Кышкатскиз Иосафат, Кузё-Инмарез утчан пала берытскиз но быдэс Иудеяез визяны (кӧс утьыны) косӥз.4Иудей калык Кузё-Инмарлэсь юрттэт курыны огазе люкаськиз; Иудеялэн вань городъёсысьтыз соос Кузё-Инмар азьын тэльмырыны лыктӥзы.
5Соку Иосафат выль азбар азе, Кузё-Инмарлэн корказ иудейёслэн но Иерусалимын улӥсьёслэн азьпалазы султыса6шуиз: «Атайёсмылэн Инмарзы Кузё-Инмар! Тон Инмын Инмар ӧвӧл-а? Вань калыкъёслэн эксэйлыкъёсынызы Тон кивалтӥськод, Тынад кияд кужым но юнлык, нокин но Тыныд пумит сылыны уз чида!7Израиль калыкедлэн азьысьтыз та музъемын улӥсь калыкъёсыз, Инмармы, Тон ӧд улля-а но пумтэм вапумъёс ӵожелы Аслад эшедлэн, Авраамлэн, выжыезлы ӧд сёты-а?8Соос татчы улыны интыяськизы но Тыныд, Тынад нимыдлы сӥзем вӧсяськон корка пуктӥзы тазьы шуыса:9”Шугадӟон, вӧсь карись меч, сьӧдчер, сютэм улон ми доры вуиз ке, соку ми та корка азе, Тынад азяд, султомы, уго Тынад нимыд та коркан улэ; ӝикаса-ёрмыса улон интыысенымы Тыныд сюлворыса вазиськомы но, Тон кылод, утёд милемыз”.10Тани табере аммон но моав калыкъёс, Сеир гурезьын улӥсьёс, кинъёслэн музъемзы пыр Египетысь берытскись израиль калыклы потыны ӧд лэзьы, соин ик соос соослэн вӧзтӥзы ортчизы, ӧз быдтэ соосты, –11тани табере со понна соос милемлы тазьы пунэмзэ берыкто – Тынад милемлы люкетлы сётэм музъемысьтыд милемыз улляны лыктӥзы.12Инмармы! Тон соосты судить кар, милям кужыммы ӧвӧл ми вылэ урдскем трослэсь но трос калыклы пумит султыны, ми ум тодӥське, мар милемлы кароно, милям синъёсмы Тон шоры учко!»13Вань иудей калык – пичи пиналъёссы но, кышнооссы но, пиоссы но – Кузё-Инмар азьын сылӥзы.
14Соку люкаськемъёсын ӵош сылӥсь Асаф пиос пӧлысь левит вылэ – Матфаниялэн Иеиел пиезлэн Ванея пиезлэн Захариялэн Иозиил пиез вылэ – Кузё-Инмарлэн Духез васькиз но,15Иозиил шуиз: «Вань иудей калык, Иерусалимын улӥсьёс, Иосафат эксэй, кылзӥське! Тӥледлы тазьы шуэ Кузё-Инмар: та туж но туж трос калыклэсь эн курдалэ, эн куалекъялэ, уго та тӥляд ожмаськонды ӧвӧл, со Инмарлэн ожмаськонэз.16Ӵуказе соослы пумит султэлэ: тӥни соос Циц вырйылэ тубо ни, тӥ соосты нёжаллэн пумысьтыз, Иеруил луоё кыр азьысь шедьтоды.17Та радаз тӥ уд ожмаське; тӥ султэ но учкыса сылэ Кузё-Инмарлэн тӥ доры ыстэм утиськонэз шоры. Иудея но Иерусалим! Эн курдалэ, эн куалекъялэ. Ӵуказе соослэн пумитазы потоды, Кузё-Инмар тӥледын ӵош луоз».18Иосафат ымнырыныз музъемозь йыбырттӥз, вань иудей калык, Иерусалимын улӥсьёс Кузё-Инмар азе, Кузё-Инмарлы йыбырттыны пыдесъяськизы.19Соку Кааф пиос пӧлысь левитъёс, Корей пиос пӧлысь левитъёс Израильлэсь Инмарзэ Кузё-Инмарез бадӟым куараен данъяны султӥзы.
20Соос ӵукна вазь ик султӥзы но Фекоя луоё кыр доры потӥзы, потэм беразы Иосафат султыса шуиз: «Иудей калык, Иерусалимын улӥсьёс, кылзэлэ монэ! Инмардылы Кузё-Инмарлы оске но юнэсь луоды; Солэн пророкъёсызлы оске но тӥляд азинлыкты луоз».21Со калыкен кенешиз, Кузё-Инмарез данъяны кырӟасьёсыз пуктӥз, соос, святой интыын возиськись чебер дӥськут дӥсяса, ожгарчиослэн азьпалазы мед мынозы но, данъян кылъёс вераса, мед шуозы: «Кузё-Инмарез данъялэ, уго Солэн гажан-жалянэз пумтэм вапумъёс улэ!»22Бадӟым куараен черектӥськыса данъян кылъёс вераны кутскизы но, Иудеяе вуэм Сеир гурезьын улӥсьёс но аммон, моав калыкъёс пӧлы Кузё-Инмар сураськон-пожаськон лэзиз но соосты погыртӥзы;23уго аммон но моав калыкъёс Сеир гурезьын улӥсьёс вылэ урдскизы но тышкаса соосты виылӥзы, нош Сеирын улӥсьёсты быдтэм бере огзэс огзы виылыны кутскизы.24Иудейёс луоё кыр вӧзысь вырйылэ вуэм бере туж трос калык люкаськон инты пала учкизы но адӟизы: музъем вылын шӧйёс кыллё, улэп кылем мурт ӧвӧл.25Иосафат но солэн калыкез ваньбур люканы лыктӥзы но соослэсь туж трос ваньбурзэс – дӥськутсэс но, дуно арбериоссэс но – шедьтӥзы, асьсэлы сомында люказы, нуыны ик ӧз ни ворме. Куинь нунал ӵоже соос ваньбур бичазы, сокем со трос вал!
26Нош ньылетӥяз нуналэ соос ”Тау карон нёжалэ” люкаськизы, уго отын соос Кузё-Инмарлы тау каризы. Соин ик туннэ нуналозь но со интыез ”Тау карон нёжал” шуыса нимало.27Вань иудейёс, Иерусалимын улӥсьёс Иосафатлэн валтэм улсаз берытскизы Иерусалиме шулдыр мылкыдын бертон понна, уго Кузё-Инмар соослы тушмонъёссэс вормемзы понна шумпотон сётӥз.28Псалтирьёсын, цитраосын, пеллян гумыосын шудыса, Иерусалимысь Кузё-Инмарлэн корка дораз лыктӥзы.29Израильлэн тушмонъёсызлы пумит Ачиз Кузё-Инмар ожмаськиз шуыса кылэм беразы музъем вылысь вань эксэйлыкъёс вылэ Инмарлэсь кышкан вуиз.30Иосафатлэн эксэйлыкез каньылэн улыны кутскиз, котыр ласянь солэн Инмарез каньыллыко улон сётӥз.
31Тазьы Иосафат Иудеялэн эксэй пуконаз пукиз: куамын вить арес вал солы эксэе пуксьыкуз, кызь вить ар ӵоже со Иерусалимын эксэй луыса кузёяськиз. Анаезлэн нимыз Азува, со Салаиллэн нылыз вал.32Со атаезлэн, Асалэн, сюрестӥз ветлӥз, солэсь ӧз палэнскылы, Кузё-Инмар азьын ярамон ужъёс лэсьтыса улӥз.33Гурезь йылъёсын вӧсяськонъёс гинэ воштэмын ӧй вал, калык но атайёссылэн Инмарзы пала сюлэмзэ юн-юн ӧз на берыкты.
34Иосафатлэн мукет ужъёсыз, нырысетӥосыз но, берпуметӥосыз но, Ананийлэн Ииуй пиезлэн гожъямъёсыз, Израильысь эксэйёслэн книгаязы пыртэмын.
35Нош собере Иудеялэн Иосафат эксэез Израильлэн йӧнтэм улӥсь Охозия эксэеныз кусып возьыны кутскиз,36соин ӵош корабльёс лэсьтыса, Фарсисэ келян понна соин огазе кариськиз; Ецион-Гаверын соос корабльёс лэсьтӥзы.37Соку Марешаысь Додавалэн Елиезер пиез, азьпалзэ тодытыса, Иосафат вылэ вуоноез сярысь вераз: «Охозияен кусып возьыны кутскид бере, тынэсьтыд уждэ Кузё-Инмар куашкатӥз» – корабльёс Фарсисэ мыныны ӧз быгатэ – пазьгиськизы.
Глава 20