Выбрать язык
Книги Ветхого Завета
Книги Нового Завета
с русским текстом2-тӥ книга
1Иосия Иерусалимын Кузё-Инмарлы сӥзем Пасха ортчытӥз, нырысетӥ толэзьлэн дас ньылетӥ нуналаз Пасхалы сӥзем ыжпиез вандӥзы.2Ас интыосазы священникъёсты со пуктӥз, Кузё-Инмар коркан соосты служить карыны лӧпкытъяз;3Кузё-Инмарлы улонзэс сӥзем левитъёслы, вань израиль калыклэн дышетӥсьёсызлы, со шуиз: «Израильлэн эксэезлэн, Давидлэн Соломон пиезлэн, пуктэм храмаз святой ковчег пуктэ; кулэез ӧвӧл тӥледлы сое пельпум вылады нуллыны; табере Инмармылы Кузё-Инмарлы, Солэн израиль калыкезлы ужаса-тыршыса улэ.4Израиль эксэйлэн Давидлэн но солэн Соломон пиезлэн косэмзыя черодды вуиз ке, выжыен-выжыен султэ;5вӧсяськон интыын сылэ, агай-вынъёстылэн, калыклэн пиосызлэн выжыен люкиськемзыя, левитъёслэн выжыен люкиськемзыя,6Пасхалы сӥзем ыжпиез вандэ но дун-чылкытэсь луэ, Кузё-Инмарлэн Моисей пыр верам кылъёсызъя сое агай-вынъёстылы дасялэ».7Отчы люкаськем вань калыклы Иосия кузьымлы-саламлы, Пасхаез ортчытыны курбонлы куамын сюрс ыжпиос, кечпиос, куинь сюрс ошпиос сётӥз. Ваньмыз та эксэйлэн ваньбур пӧлысьтыз.8Иосиялэн кивалтӥсьёсыз ас мылкыдзыя калыклы, священникъёслы, левитъёслы саламъёс-кузьымъёс сётӥзы: Инмар коркан кузёяськись Хелкия, Захария, Иехиил Пасхае курбон сётон понна священникъёслы кык сюрс куать сю ыжъёс, ыжпиос, кечпиос, куинь сю ош сётӥзы;9Хонания, Шемаия, Нафанаил, солэн агай-вынъёсыз, левитъёслэн кузёоссы Хашавия, Иеиель, Иозавад Пасхае курбон сётон понна левитъёслы вить сюрс ыж, вить сю ош сётӥзы.
10Тазьы радъямын вал службаез нуон. Священникъёс ас интыязы султӥзы, левитъёс асьсэ черодэ эксэйлэн косонэзъя султӥзы;11Пасха ыжпиез вандӥзы, священникъёс, левитъёслэн киысьтызы басьтыса, вирен пазязы, нош левитъёс ку ниизы;12тылын сутоно курбонлы люкылӥзы, Моисей книгаын гожтэмъя сое вань калыклы, выжы-кумыосъя, люкылон Кузё-Инмарлы курбон сётон понна. Ошъёсыз но озьы ик каризы.13Пуктон-косонъя Пасха ыжпиез тыл вылын пыжизы; вӧсям курбонъёсты пуртыосын, горшокъёсын, мискаосын пӧзьтӥзы но дыртыса калыклы люкылӥзы,14нош бӧрысь ини асьсэлы но священникъёслы дасязы, уго священникъёс, Аарон пиос, тылын сутыса курбон сётон котырын, кӧй дасян котырын пеймытозь бергазы, малы ке шуоно левитъёс асьсэлы но, священникъёслы но – Аарон пиослы – курбон сӥлез сётыны дасязы.15Давидлэн, Асафлэн, Еманлэн, эксэй дорысь азьпалэз адӟись Идифунлэн пуктэм-косэмзыя Асаф пиос, кырӟасьёс, ас интыязы кылизы. Капка возьмасьёс вань капкаос дорын сылӥзы: асьсэ удысысь соослы кошкыны кулэлыкез ӧй вал, уго соослэн левит агайёссы соослы курбон сӥлез сётыны дасязы.16Тазьы та нуналэ Кузё-Инмарлы вӧсяськон радъямын вал Пасхаез ортчытыны Кузё-Инмарлы сӥзем курбон сётон ӝӧк вылын тылын сутӥськись курбонъёс сётон понна, кызьы косӥз Иосия эксэй.17Израиль пиос, со дыре отчы люкаськыса, Пасхаез ортчытӥзы, сизьым нунал ӵоже Юмал Нянь Сиён праздникез ортчытӥзы.18Самуил пророк дырысен Израильын таӵе Пасха ортчытэмын ӧй ни вал; Израильлэн вань эксэйёсыз пӧлысь одӥгез но тазьы Пасхаез ӧз ортчыты, кызьы сое ортчытӥзы Иосия, священникъёс, левитъёс, отчы люкаськем Иудеяысь, Израильысь вань калык, Иерусалимын улӥсьёс.19Та Пасха ортчытэмын вал, Иосия эксэйын дас тямысэтӥ арзэ пукыку.
20Иосия Инмар коркан вань ужзэ быдэстӥз, – [Иосия эксэй Иудеяысь но Иерусалимысь веднаськисьёсты, туно-пеллёосты, куалаосты, сульдэръёсты, вӧсяськон тыпы сурдъёсты тылын сутӥз, – Кузё-Инмар коркась Хелкия священниклэн шедьтэм книгаяз гожтэм законлэсь кылъёссэ юнматон понна озьы лэсьтэмын вал; таӵеез, солы укшасез, солэсь азьвыл но ӧй вал, кин Кузё-Инмар пала вань сюлмыныз, вань лулыныз, вань юнлыкеныз, Моисейлэн законэзъя мед берытскысал; Иосия эксэйлы укшасез берло ӧз ни поты. Озьы ке но Кузё-Инмар Аслаз туж зол вожпотонэзлэсь ӧз куштӥськы, – Манассиялэн вань йӧнтэмлэсь но йӧнтэм ужъёсыз бере Кузё-Инмарлэн Иудея вылэ вожпотонэз ӧз ни кысы. Кузё-Инмар шуиз: «Израиль выжыез кулэтэм кареме кадь ик Иудеяез но, Аслым быръем Иерусалимез но Аслам азьыстым палэнто, храмез но, кудӥз сярысь мон шуи вал: ”Отын Мынам нимы улоз”».] Соку Египетлэн Нехао эксэез Евфрат дуре интыяськем Кархемисэ ожен мынӥз; Иосия солэн пумитаз потӥз.21Нехао со доры адямиоссэ тазьы вераны ыстӥз: «Иудей эксэй, тыныд но, мыным но маиз? Али мон ожен тон доры уг мынӥськы, мон мынӥсько отчы, кытын мынам оже мынэ. Инмар монэ дыртыны косӥз; монэн ӵош мынӥсь Инмарлы эн пумитъяськы, тонэ медаз погырты шуиськод ке».
22Нош Иосия со дорысь ӧз палэнскы, соин ожмаськыны дасяськиз, Инмар азьысь Нехаолэсь верам кылъёссэ санэ ӧз поны, Мегиддо нёжалысен ожмаськыны кутскиз.23Пукыӵчиос ньӧлъёссэс Иосия эксэй вылэ лэзизы, соку эксэй медоосызлы шуиз: «Нуэ монэ, мон туж вӧсь каремын».24Медоос сое, ожмаськон уробо вылысь басьтыса, мукетаз уробояз пуктӥзы но Иерусалиме нуизы. Со кулӥз но, атайёсызлэн шайгу вӧзазы ватӥзы. Быдэс Иудея но Иерусалим Иосия эксэй понна бӧрдӥзы.25Иеремия пророк но Иосия пумысен бӧрдыса ӝож гурзэ кырӟаз; вань кырӟась пиос, нылъёс Иосия сярысь бӧрдыса кылазы-буразы, соос туннэ нуналозь но тодмо, соосты Израиле мед кырӟалозы шуыса сётӥзы; тани, соос бӧрдон кырӟанъёсын книгае пыртэмын.
26Иосиялэн мукет ужъёсыз, ӟеч ужъёсыз, кудъёсыз Кузё-Инмарлэн законэзъя лэсьтэмын,27солэн нырысетӥосыз но, берпуметӥосыз но ужъёсыз Израильлэн, Иудеялэн эксэйёссылэн книгаязы гожтэмын.
Глава 35