Выбрать язык
Книги Ветхого Завета
Книги Нового Завета
с русским текстом1Та учыръёс бере Артаксеркс эксэй Вугейысь Амадафлэсь Аман пизэ вылэ ӝутӥз, сӥё-дано кариз, солэсь пуконзэ ас бордысьтыз вань кивалтӥсьёслэсь вылэгес кариз;2эксэй котырын, эксэй капка дорын бергась эксэйлэн вань ужась-тыршисьёсыз солы йыбыртъязы, Аман азе пыдесъяськыса йыбыртъязы, тазьы карыны эксэй косӥз уго. Нош Мардохей ӧз йыбырттылы, ӧз но пыдесъяськылы.3Эксэй дорын ужаса-тыршыса улӥсьёс, эксэй капка дорын бергасьёс, Мардохейлы шуизы: «Малы тон эксэйлэсь косонзэ ортчыса улӥськод?»4Соос нуналлы быдэ солы вераллязы, нош со соослэсь ӧз кылзӥськы, соку соос Аманлы урттылӥськизы учкон-чаклан вылысь: Мардохей верам кылыз вылын сылыны быгатоз-а, уго со «мон иудей пи» шуыса соослы вераз.
5Аман адӟиз, Мардохей со азе уг пыдесъяськы, уг йыбыртты шуыса, соку Аман туж йыркуръяськыны кутскиз.6Мардохей кыӵе калык пӧлысь потэмын шуыса верамзы бере Аманлы Мардохеез одӥгназзэ быдтыны тырмыт ӧз поты; со малпаз Артаксеркслэн быдэс кунысьтыз вань иудейёсты, Мардохейлэсь калыксэ, быдтыны.7Нырысетӥ толэзе, Нисан толэзе, Артаксеркс эксэй пуконын дас кыкетӥ арзэ пукыку, [кенеш ортчытӥз], Аман азьын нуналлы быдэ, толэзьлы быдэ [Мардохейлэсь калыксэ одӥгаз нуналэ быдтон понна] пур*а – жеребе – куштылӥзы. Пус-жеребе дас кыкетӥ, Адар, толэзь вылэ усиз.8Аман Артаксеркс эксэйлы шуиз: «Тынад эксэйлыкедлэн вань улосвылъёсаз калыкъёс пушкы пазьгиськыса, сураськыса улӥсь одӥг калык вань; соослэн законъёссы вань калыкъёслэн законъёссылэсь висъясько, эксэйлэсь законъёссэ соос уг быдэсъяло; соосты эксэй озьы гинэ медаз кельты.9Эксэйлы ярамон ке, соосты быдтон сярысь косон гожтэмын мед луоз, эксэй казнае понон понна мон эксэйлэн коньдон ужъёсыныз кивалтӥсьёслэн киязы дас сюрс азвесь талант мертаса сёто».10Соку эксэй киысьтыз печать нюртон зундэссэ басьтӥз но сое Вугей выжыысь Амадафлэн Аман пиез кие сётӥз иудейёслы пумит пуктон-косонэз юнматон понна.11Соку эксэй Аманлы шуиз: «Та азвесез но, калыкез но тон кие сётӥсько; соин мар каремед потэ, кар».
12Нырысетӥ толэзьлэн дас куинетӥ нуналаз эксэйлэн подъясьёсыз ӧтемын вал, соку Аманлэн косэмезъя, эксэйлэн кузёйыръёсызлы, котькуд улосвылэн кивалтӥсьёслы [Индиысен кутскыса Эфиопияозь, сю кызь сизьым улосвылэн кивалтӥсьёслы], котькуд калыклэн йырызлы, – котькуд улосвылэ, котькуд калыклы солэн кылаз берыктыса, солэн алфавитэныз гожтыса, гожтэт келямын вал: ваньмыз Артаксеркс эксэйлэн нимыныз гожтэмын, со эксэйлэн зундэсэныз нюртыса юнматэмын вал.13Гожтэт нуисьёс эксэйлэн вань улосвылъёсаз мынӥзы вань иудейёсты – пичиоссэ но, бадӟымъёссэ но, нылпиосты но, кышномуртъёсты но – одӥг нуналэ, дас кыкетӥ толэзьлэн дас куинетӥ нуналаз, Адар толэзе, быдтыны, ваньбурзэс таланы косон нуыса. [Тани со гожтэтлэн списокез:
«Быдӟым Артаксеркс эксэй Индиысен Эфиопияозь интыяськем сю кызь сизьым улосвылэн кивалтӥсьёслы, соослы тэрытскыса улӥсь кузёйыръёслы. Трос калыкъёсын, быдэс дуннеен, эксэй луыса, мон кивалтӥсько, кивалтон ужме аслам кужыменым быдӟымъяськытэк, вылтӥяськытэк, лякыт, зӥбыт нуыны тыршисько, мынам киулам сюремъёс ялан огсыр, бугыръяськытэк мед улысалзы, быдэс кунам-музъемам тупаса улон мед луысал; со пыр вань адямиос капчиен ортчыны мед быгатысалзы, вань калыкъёслэн кема возьмам тупаса улонзы мед пушйысал. Визь-кенеш сётӥсьёсылэсь юай, кызьы меда тае уж вылын быдэстыны луысал шуыса. Ми пӧлын визьлыкеныз висъяськыса улэ Аман. Со ялан ужзэ мыло-кыдо быдэсъя, со туж оскиськымон адями, эксэй бере кыкетӥ сӥё-дано интыын со сылэ. Со милемлы валэктӥз, кызьы быдэс дунне вылысь вань калыкъёс-выжыос пушкы одӥг тушмон калык чуртнаськиз, аслаз законъёсыныз со вань калыкъёслы пумит улэ, асьмелэн кивалтон ужмы янгышъёстэк-шекъёстэк медаз мыны, эксэйлэсь куронъёссэ ялан кулэтэм каре. Озьы, куке тодӥмы, одӥг та калык гинэ котьку но аслаз улон сямъёсыныз, законъёсмес кулэтэм карыса, вань адямиослэсь висъяське, асьмелэн ужъёсмылы пумитъяське, асьмелэн эксэйлыкмы ӟеч улонэз медаз адӟы шуыса, туж уродэсь ужъёс лэсьтэ; ми косӥмы ужъёсты быдэсъяны пуктэм кыкетӥ атаймылэн, Аманлэн, гожтэм грамотаосаз пусъем нимъёсты – ваньзэс кышноосынызы, нылпиосынызы валче тушмонъёссы соосты чик жалятэк, палазы пырытэк мечъёсынызы кораса одӥгтэм мед быдтозы. Туэ арын дас кыкетӥ, Адар, толэзьлэн дас куинетӥ нуналаз таос, азьвыл но, али но тушмоно адямиос, одӥг нуналэ кужмысь дунне пыдсы куштэмын мед луозы, соос ноку но азьпал улонамы каньылэн, бугыръяськонъёстэк улыны медаз ни люкетэ».]14Со нуналлы соос дась мед луозы шуыса, пуктон-косонлэсь списоксэ вань улосвылъёслы сётоно, вань калыкъёслы сое законэз кадь ялоно.15Эксэйлэн косонэныз иворчиос ӝогак сюрес вылэ потӥзы. Сузы шоркарын но пуктон-косонэз ялӥзы; эксэй Аманэн ӵош юыны пуксизы, нош Сузы карын улӥсьёс куалекъяны-бугыръяськыны кутскизы.
*а 3:7 пур – «жребий» шуэм луэ
Глава 3