Выбрать язык
Книги Ветхого Завета
Книги Нового Завета
с русским текстом1«Аслам садам мон лыктӥ, сузэре мынам, ичимень;
мирраме, ческыт зын поттӥсь арбериосме бичай,
карасэн чечыме сии, винаме йӧлыным кӧты тырымон юи.
Сие, эшъёсы, юэ, кӧттэс тырелэ, яратоноосы!»
2«Мон изисько, нош сюлмы уг изьы;
тани, яратонэлэн куараез кылӥське, со йыгаське:
”Сузэре, усьты мыным,
яратонэ мынам, кырдыдыке тон мынам, чылкытэ тон мынам!
Йыры мынам быдэсак лысвуэн шобырскемын,
йырсиелэн бабляосыз уйлэн мускытэныз котмемын уго”.
3”Вылысьтым дӥсянме мон куштӥ,
кызьы нош таре мон сое выльысен вылам дӥсялом на?
Аслэсьтым пыдъёсме мон миськи ни,
кызьы нош мон соосты сапталом на?”
4Мынам яратонэ кизэ тунгон пыр мычиз но,
мынам пушкы таин бугырскиз.
5Мон султӥ яратонэлы ӧсэз усьтыны,
мынам киысьтым мирра вияса улӥз,
чиньыосы вылысь мирра тунгонлэн кутӥськон вылаз вияса улӥз.
6Яратонэлы мон ӧсэз усьтӥ,
нош мынам яратонэ берытскыса кошкемын вал ини.
Со вераку, лулы пушкам ӧй ни вал;
мон утчай но ӧй шедьты сое;
мон кесяськыса утчай, нош со мыным ӧз вазиськы.
7Город котыртӥ ветлӥсь возьмаськисьёс монэ пумитазы но
жугыса куштӥзы, монэ яраё каризы;
борддорез возьмасьёс вылысьтым шобырме кылизы.
8Иерусалим нылъёс, тӥледыз тэльмырыса курисько:
яратоно пиме пумитады ке, мар тӥ солы шуоды?
Солы шуэлэ: ”Яратыса-яратыса мон кынартэм кылисько ини”».
9«Кышномуртъёс пӧлысь чеберлэсь но чебер мурт,
тынад яратонэд мукет яратӥсьёслэсь маин умойгес?
Тынад яратонэд маин умойгес мукет яратӥсьёслэсь,
сокем тон милемыз тэльмырыса куриськод бере?»
10«Мынам яратонэ тӧдьы мугоро, льӧль-ӵыжыт бамо;
мукет дас сюрс муртъёслэсь со мусогес, чебергес:
11йырыз солэн – чылкыт зарни;
йырсиез солэн бабылес, кырныж кадь со сьӧд.
12Солэн синъёсыз – бызись вуос дурысь дыдыкъёс кадесь,
номырлы ӟудытэк пукись, йӧлын уясь дыдыкъёс кадесь;
13солэн бамъёсыз – ческыт зыно сяська бакча кадь,
ческыт зын поттӥсь будосъёсын мерттэм убо кадь;
солэн ымдуръёсыз – лилия сяська, отысь мирра бызьыса улэ;
14солэн киосыз – зарни модосъёс, вылазы топаз изъёс бырттылэмын;
кӧтыз – слон лылэсь лэсьтэм щит кадь,
вылаз сапфир изъёс бырттылэмын;
15пыдъёсыз – зарни инъет вылэ пуктэм мрамор юбо кадесь;
тусыныз Ливанлы укша, кедыр писпуос кадь туж юн, кужмо.
16Ымыз – ческыт, нош ачиз – лякытлэсь но лякыт.
Тӥни кин мынам яратонэ, тӥни кин мынам эше, Иерусалим нылъёс!»
Глава 5