Выбрать язык
Книги Ветхого Завета
Книги Нового Завета
с русским текстом1Кема зорытэк улон дыръя Кузё-Инмар дорысь Иеремиялы верамын вал:
2Иуда бӧрдэ, солэн капкаосыз пограллям,
музъем вылын кылльыса сьӧдэктӥллям,
Иерусалимысь викышъям-бӧрдэм кылӥське.
3Кузёйыръёс медооссэс ву вайыны ысто;
соос гудӟемъёс дуре лыкто но ву уг шедьто;
тырттэм ведраосынызы берытско;
возьытэ вуэменызы, ӝоже усеменызы сэрен
соос йыръёссэс шобырто.
4Музъем вылэ кемалась зор усьымтэен, му выл пилиськылӥз,
соин ик музъем ужасьёс но ӝожомеменызы
асьсэлэсь йырзэс шобырто.
5Пужей пия но пиоссэ бусые кельтэ,
малы ке шуоно турын-куар ӧвӧл.
6Кыр ишакъёс вырйылъёсын сыло но
шакалъёс музэн пушказы омыр кыско;
синъёссы бездэмын, малы ке шуоно турын-куар ӧвӧл.
7Законлы пумит улэмъёсмы милемыз шарае потто ке но,
нош Тон, Кузё-Инмаре, Аслад нимыд понна милемлы юртты;
куштӥськонмы-усёнмы туж бадӟым, Тон азьын ми сьӧлыкамы.
8Израильлэн Оскиськонэз, куректоно-кайгуо дыръёсы солэн Утисез!
Мар понна Тон та музъемын мурт адями кадь улӥськод,
кӧлыны пырем палэнысь адями кадь Астэ возиськод?
9Мар понна Тон – абдрам мурт кадь,
утьыны кужымтэк кылем батыр кадь?
Зэм ик, Кузё-Инмаре, Тон ми пӧлын, Тынад нимыд ми йылын;
куштыса эн кельты милемыз.
10Тазьы шуэ Кузё-Инмар та калык сярысь:
«Та калык кезыса ветлыны яратэ бере, пыдзэс кутыса уг возё бере,
со понна Кузё-Инмар соослы ӟеч мылкыдзэ уг возьматы,
табере соослэсь законлы пумит улэмъёссэс тодаз вае но
сьӧлыкъёссы понна вӧсь каре».
11Кузё-Инмар мыным шуиз: «Та калык понна, солы ӟеч мед луоз шуыса, тон эн вӧсяськы.12Соос визяса улӥзы ке но, соослэсь викышъяса бӧрдэмзэс Мон уг кылы; тылын сутӥськись курбон, кузьым сётӥзы ке но, соосты кабыл уг басьты; тӥр-пуртэн, сютэм аръёсын, урод черъёсын быдто соосты».13Соку мон шуи: «Инмаре Кузё-Инмаре! Тани, соослы пророкъёс верало: тӥр-пуртэз уд адӟе, тӥ дорын сютэм ар но уз луы, та интые тӥледлы пырак ӵожелы тупаса улон сёто».14Нош Кузё-Инмар мыным шуиз: «Пророкъёс Мынам нимыным ӧрекчаськыса верасько; Мон соосты ӧй ысты, ӧй косы, ӧй но вера соослы; соос тӥледлы оскыны ярантэм адӟонъёс, тунаськонъёс, ӧвӧлтэмзэ, ас сюлэмызлэсь малпанъёссэс верало».15Соин ик Кузё-Инмар пророкъёс сярысь тазьы шуэ: «Соос Мынам нимыным азьпалзэ тодытыса верало, нош Мон соосты ӧй ысты; соос шуо: ”та музъем вылын тӥр-пурт но, сютэм ар но уз луэ” – тӥр-пурт улын, сютэм улонэн быдтэмын луозы та пророкъёс;16адямиос, кинъёслы соос азьпалзэ тодытыса верало, сютэм улыса кулозы, тӥрен-пуртэн виылэмын луозы, Иерусалимлэн урамъёсаз пазямын луозы; соосты, соослэсь кышнооссэс но, пиоссэс но, нылъёссэс но ватӥсь уз луы; соослэсь лек ужъёссэс Мон асьсэ вылэ кисьто.
17Та кылэз соослы вера:
”Уй но нунал мынам синъёсысьтым синкыли мед виялоз,
медаз но дугды;
уго нылмурт, мынам калыкелэн нылыз,
сӧсыртэмын, секыт шуккетэн погыртэмын.
18Мон бусые потӥсько, – но тани, тӥр-пуртэн виылэмъёс;
каре пырисько, – но тани, сютэм улонэн катьтэммемъёс;
пророкен священник гинэ но,
йырсазьзэс ыштыса, музъем вылтӥ ветло”».
19Иудаез Тон чылкак кулэтэм карид шат?
Тон азьын Сӥон сокем синазькыль луиз шат?
Мар понна Тон милемыз такем, бурмыны луонтэм, вӧсь карид?
Каньыллыкез витиськомы, нош номыр но ӟечез ӧвӧл;
бурмон дырез витиськомы – но тани,
шимес адӟонъёс ми котыре вуо.
20Кузё-Инмаре, сьӧлыклэсь кышкатэк улэммес ум ватӥське,
атайёсмылэсь но законлы пумит улэмзэс ум танӥське;
Тон азьын уго ми сьӧлыкамы.
21Аслад нимыд понна эн палэнты милемыз;
Аслад данлыкедлэсь престолзэ эн ултӥя:
тодад вай, Аслэсьтыд милемын тупатэм сӥзён-косондэ эн сӧры.
22Язычникъёслэн алекчи инмаръёссы пӧлын вань-а зор сётӥсьёсыз?
Яке ас понназ ачиз инбам быгатэ-а кисьтӥсь зор сётыны?
Тон ӧвӧл-а зор сётӥсь, Кузё-Инмаре, милям Инмармы?
Тон вылэ ми оскиськиськомы, уго ваньмыз Тон киын, Инмаре.
Глава 14