1Horan ohjandajale. Puhutuzvändimil. Davidan psalm. 2Sur’ Sünduižem, kulišta minun sanad, el’genda minun meled! 3Kulišta, kut kucun sindai abuhu, minun kunigaz da Jumal, sinei minä loičen. 4Sur’ Sünduižem, kulišta minun än’ aigoiš homendesel, tulen sinun edehe aigoiš da varastaškanden.
5Ved’ sinä, Jumal, ed tirpa käskön vastustust, sinunno ei elä nimitte pahuz’. 6Jumalatomad ei voigoi tulda sinun sil’miden edehe, sinä ed navedi ni üht käsköidenmurendajad, 7kelastajid oigendad kadondaha, a rikojad da manitelijad Ižand ei tirpa. 8Vaiše minä sinun suren hüvüden tagut voin tulda sinun kodihe, kumardamoi sinun pühäkodihepäi, sikš ku pidän sindai korktas arvos.
9Sur’ Sünduižem, ve mindai sinun toden tedme, tege te minun edes tazoks, sinun vihanikoiden täht. 10Heiden suspäi ei tule tozisanad, heiden südäin om kadond, heiden keruz om avaitud grob, heiden kel’ om libed da kelastelii. 11Sudi heid, minun Jumal, langekaha hö mantazale pahoiden meliden tagut, kükse heid tägäpäi äjiden pahoiden tegoiden tagut, sikš ku hö libuiba sindai vaste.
12Ilostugha kaik sinuhu vauvatajad, lopmatoi olgha heiden ihastuz! Sinä abutad kaikile sinun suugan al olijoile, i zavodiba kittäs sinun nimel sinun armastajad. 13Sinä, Sur’ Sünduižem, blaslovid tozioiktan, sinun hüvüz’ kaičeb händast kuti rindraud.
с русским текстом