1Horan ohjandajale. Davidan psalm. 2Taivhad saneleba: Jumal om sur’! Hänen käziden radoiš saneleb taivhan čuhu. 3Päiv tob vestin päiväle, ö avaidab tedon toižele öle. 4Ei ole kel’t, ei ole paginad, kus ei kuluiži heiden än’t. 5Se än’ levineb kaiked madme, ned sanad kuluba mirun agjahasai. Jumal tegi sinnä elosijan päiväižele. 6Se nouzeb kuti ženih jäl’ghe sajad, lähteb vägestajan hüväs meles joksmaha ičeze matkad. 7Taivhan agjaspäi se lähteb, mäneb toižhe taivhan agjaha, nimidä ei voi peittas sen räkespäi.
8Ižandan käsköd oma täudeližed, ned vahvištaba meiden henged. Ižandan zakon om oiged, se ližadab mel’t abutomile. 9Ižandan nevondad oma tozioiktad, ned ihastoitaba südänt. Ižandan käsk om sel’ged, se andab vauktad sil’mile. 10Ižandan varaidand om puhtaz, se om kaikenigäine. Hänen sudad oma toden sudad, ned kaik oma tozioiktad. 11Ned oma kal’hemb kuldad, kal’hemb mi lujas äi puhtast kuldad, magedamb met i meden tippuid. 12Ned kaičeba sinun käskabunikad-ki, elämižes käsköiden mödhe om sur’ pauk. 13No kenak voib nägištada ičeze vigad? Puhtasta mindai minun peitos olijoiš grähkišpäi. 14Kaiče mindai, sinun käskabunikad, manitajišpäi, miše en putuiži niiden valdha. Siloi minä linnen vigatoi i puhtaz äjiš grähkišpäi. 15Sur’ Sünduižem, hüväl melel kulišta minun sanad, riža minun südäimen tahtod, sinä oled minun luja tugi da polestai.
с русским текстом