1Sinuhu, Sur’ Sünduižem, minä vauvatan, ala anda putta huiktaha minei nikonz. 2Sinun tozioiktudes päzuta mindai, pästa valdale, kända ičeiž korv minuhu i abuta minei. 3Ole minei kaičendkal’l’on, kuna voižin peittas. Sinä, ken toivotid mindai päzutada, sinä oled minun vahv i varmed eländsija. 4Minun Jumal, päzuta mindai jumalatoman kädespäi, zakonanmurendajan da ahtištajan kobraspäi. 5Sinä, Sur’ Sünduižem, minun Jumal, oled minun nadei, minun toiv noriš päivišpäi. 6Minun sündundaspäi sinä olid minun tugen, sinä pästid mindai maman vacaspäi, sinei pajatan kaiken ülenzoituzpajoid. 7Äjiden täht minä olin kuti čudosine azj, no sinä oled minun vahv tugi. 8Sikš minun su om täuz’ kitändsanoid, miše ülenzoitta sinun eloarvod, joga päivän – sinun hoštotest.
9Ala hül’gäida mindai minun vanhoil päivil, ala jäta mindai, konz minun vägi väheneb. 10Minun vihanikad pagižeba mindai vaste, a minun henged tahtojad pagižeba kesknezoi 11sanudes: «Jumal jäti händast. Ajagat händast da tabakat, hänel ei ole päzutajad».
12Minun Jumal, ala edene minuspäi! Minun Jumal, rigehti minei abuhu! 13Putkaha huiktaha da kadogaha minun vihankandajad, katkaha huiged da nagranzoituz minun ahtištajad. 14A minä kaiken vauvatan sinuhu, da völ enamba kitän sindai. 15Minä saneleškan sinun tozioiktut, joga päivän – sinun hüvid tegoid, kudambiden lugumärad minä en teda. 16Saneleškan Ižandan Jumalan suriš tegoiš, ülendan sinun oiktad mel’t, vaiše sinun.
17Minun Jumal, sinä openzid mindai noriš päivišpäi, i nügüd’-ki minä sanelen sinun čudtegoiš. 18Jumal, ala hül’gäida mindai vanhazesai, minun hahkoihe hibusihesai, kuni ehtižin sanuda kaiken sinun väges necile da tulijoile sugupol’vile. 19Minun Jumal, sinun tozioiktuz’ om lujas korged, sinun radod oma sured. Minun Jumal, ken om sinun vuitte?
20Sinä oigenzid minei äi tuskad da ahtištust, no sid’-žo eläbzoitid mindai, said mindai man süvüdespäi. 21Sinä libutid mindai i tüništoitid mindai, said mindai man süvüdespäi. 22Minä ülenzoitaškan sindai liral vätes, sinun tot, minun Jumal, pajataškan sinei arfal vätes, Izrail’an Pühä. 23Minun su om ihastusiš, konz pajatan sinei, ilos om minun heng, kudamban sinä oled päzutanu. 24Minun kel’ joga päivän saneleškab sinun tot. A ned, ked eciba minei pahut, om huigenzoittud da pahenzoittud.
с русским текстом