Библия
Выбрать язык
Книги Ветхого Завета
Книги Нового Завета
с русским текстом
PSALMOIDEN KIRJ
85 Psalm
Davidan loičend.1Sur’ Sünduižem, kärauda ičeiž korv
i kulišta mindai,
sikš ku minä olen gol’l’ i niššat.
2Kaiče minun henged, ved’ minä kumardamoi sinun edehe.
Minun Jumal, päzuta sinun käskabunik,
kudamb vauvatab sinuhu.
3Sur’ Sünduižem, armahta mindai!
Joga päivän kucun sindai abuhu.
4Ihastoita sinun käskabunikan heng,
minä sinunnoks sen libutan, Sur’ Sünduižem.
5Ved’ sinä, Sur’ Sünduižem, oled hüvä i armoline,
andad äi armoid kaikile, ked kucuba sindai abuhu.
6Kule minun loičend, Sur’ Sünduižem,
käraute minun loičendoihe.
7Sindai kucun minä gor’as,
ved’ sinä kulištad mindai.
8Sur’ Sünduižem, ei ole jumaloiden keskes sinun karthišt,
kut ei ole mugoižid tegoid, kut sinun.
9Sinä oled tehnu kaik mirun rahvahad.
Hö tuleba sinun edehe kumardamhas sinei,
hö korgenzoitaba sinun nimed, Sur’ Sünduižem.
10Sinä oled sur’ da teged čudoid,
minun Jumal, sinä oled üks’.
11Sur’ Sünduižem, nevo mindai sinun tele,
miše tegižin sinun toden mödhe.
Pane süväs minun südäimehe
sinun nimen varaiduz.
12Ižand, minun Jumal,
kitäškan sindai täudel südäimel,
ülenzoitaškan sinun nimed igän.
13Sur’ om sinun hüvüz’ minun edes,
sinä päzutid minun hengen surman valdkundaspäi.
14Minun Jumal, korgednenaižed libuiba minun päle,
valdanhimoičii rahvazkogo tahtoib otta minun hengen.
Hö ei tahtoigoi nähta sindai.
15No sinä, Sur’ Sünduižem, oled hüvä i südäimeline Jumal.
Sinä oled tirpai, äiarmoline i todesine.
16Kacuhta minuhu da armahta mindai!
Anda minei väged, päzuta mindai,
ved’ minä olen sinun käskabunik,
sinun käskabuniknaižen poig.
17Anda minei znam, mitte toivob hüväd.
Nägištagha sidä minun vihanikad, tehkahas heile huiged.
Ved’ sinä, Sur’ Sünduižem, abutid da tüništoitid mindai.
Глава 85
